मुंबई- अजय आणि अतुल या जोडीने फक्त मराठी सिनेसृष्टीचं नाही तर हिंदी सिनेसृष्टीलादेखील आपल्या गाण्यांवर थिरकायला लावलं आहे. या अफलातून जोडीची सर्वच गाणी सुपरहिट आहेत. अशी ही महाराष्ट्राची लाडकी जोडी आता सोनी मराठी वाहिनीच्या 'सिंगिंग स्टार'च्या मंचावर येणार आहे. करोनाच्या प्रादुर्भावाने जवळपास २० दिवस सिंगिंग स्टारचं चित्रीकरण बंद होतं आणि आता पुन्हा दणक्यात शोच्या चित्रीकरणाला सुरुवात झाली आहे.अजय-अतुलच्या आगमनाने याचं चित्रीकरण सुरू होत आहे. 'सिंगिंग स्टार' हा कार्यक्रम प्रेक्षकांच्या विशेष पसंतीस उतरला असून येत्या १८ तारखेला कार्यक्रमात अजय-अतुल विशेष भाग असणार आहे. या विशेष भागात स्पर्धक अजय-अतुल यांच्या गाण्यांचे सादरीकरण करणार आहेत. इतक्या मोठ्या दिग्गजांसमोर सादरीकरण करण्याबद्दल स्पर्धकांनामध्येही उत्साह आणि भीती असं मिश्रित वातावरण आहे. स्पर्धक आणि त्यांचे गुरू यांनी मिळून अजय-अतुलसाठी खास गाणी बसवली आहेत. खूप दिवसांनी अजय-अतुल ही जोडी कार्यक्रमात प्रेक्षकांना पाहायला मिळणार आहे. हा विशेष भाग तीन तासांचा असणार असून यात अजय-अतुल सोनी मराठी वाहिनीचं अभिमान गीत देखील गाणार आहेत. गुरु ठाकूरने हे गाणं बसवलं असून अजय-अतुलने हे गाणं तालबद्ध केलं आहे. या शोच्या माध्यमातून पहिल्यांदाच हे गाणं प्रेक्षकांच्या भेटीला येणार आहे. विशेष म्हणजे अजय-अतुलच्या आवाजात लाईव्ह परफॉर्मन्स पाहणं ही सगळ्यांसाठीच पर्वणी असणार आहे. त्यामुळे येत्या १८ सप्टेंबरला रात्री ९ ते १२ वाजता 'सिंगिंग स्टार' हा शो पाहायला विसरू नका.
from Marathi Bollywood News, Marathi Cinema News https://ift.tt/2H2dM4u
