मुंबई : छोट्या पडद्यावरील लोकप्रिय अभिनेता सिद्धार्थ शुक्लाचा हृदयविकाराने मृत्यू झाल्यामुळे संपूर्ण मनोरंजन विश्व हादरून गेले आहे. अतिशय कमी कालावधीत सिद्धार्थने त्याचे स्वतःचे असे स्थान निर्माण केले आहे. परंतु त्याचे असे अचानक जाण्यामुळे सर्वांनाच मोठा धक्का बसला आहे. सिद्धार्थने बुधवारचा दिवस त्याच्या कुटुंबियांसोबत आणि मित्रांसोबत घालवला होता. त्यावेळी कुणालाही भविष्यात काय होणार आहे, याचा जराही अंदाज नव्हता. सिद्धार्थ जेव्हा बुधवारी रात्री जेव्हा घरी परत आला तेव्हा त्याने काही औषधे घेतली आणि तो झोपून गेला. मात्र गुरुवारची सकाळ तो पाहू शकला नाही. या घटनेनंतर पोलिसांनी सिद्धार्थच्या आईचा जबाब नोंदवला. सुत्रांनी दिलेल्या माहितीनुसार त्याच्या आईने सांगितले की, पहाटे ३ ते ३. ३० च्या सुमारास सिद्धार्थला जाग आहे. त्यावेळी त्याला अस्वस्थ वाटू लागले होते. त्याच्या छातीतही दुखत होते. त्याने आईला सांगितले आणि तिच्याकडे पाणी मागितले. आईने पाणी दिल्यानंतर तो झोपण्यासाठी गेला. सकाळी तो नेहमीच्यावेळी न उठल्याने त्याच्या आईने त्याला उठवण्याचा प्रयत्न केला. त्या सातत्याने सिद्धार्थला हाक मारत होत्या. परंतु त्याने काहीच प्रतिसाद दिला नाही. मग त्यांनी मुलीला फोन करून बोलावून घेतले. सिद्धार्थच्या बहिणीने डॉक्टरांना फोन करून घरी बोलावले. डॉक्टरांनी सिद्धार्थची तपासणी केली असता त्याचा मृत्यू झाल्याचे सांगितले. त्यानंतर त्याला तातडीने कूपर रुग्णालयात नेण्यात आले. सिद्धार्थच्या मृत्यमुळे त्याची आई आणि संपूर्ण कुटुंबाला मोठा धक्का बसला आहे. रडून रडून या सगळ्यांची अवस्था अतिशय वाईट झाली आहे. सिद्धार्थच्या वडिलांच्या मृत्यूनंतर तिन्ही मुलांचे संगोपन त्याच्या आईनेच केले होते. सिद्धार्थच्या चाहत्यांनाही त्याच्या अचानक मृत्यूमुळे खूप मोठा धक्का बसला आहे. सिद्धार्थच्या घरच्यांना भेटण्यासाठी अनेक कलाकार येत आहेत. तसेच त्याच्या बिल्डिंगच्या बाहेर सिद्धार्थचे चाहते मोठ्या संख्येने जमा झाले आहेत. सिद्धार्थने छोट्या पडद्यावरून आपल्या अभिनयाला सुरुवात केली होती. त्यानंतर त्याने बॉलिवूडमध्ये पदार्पण केले होते. सिद्धार्थ एक मॉडेलसुद्धा होता. त्याला बिग बॉस १३ मध्ये प्रचंड लोकप्रियता मिळाली होती. या पर्वाचा तो विजेतादेखील ठरला होता. याच शोमध्ये त्याची शेहनाज गिलसोबत जवळीक निर्माण झाली होती. हे दोघेही प्रेमात आकंठ बुडाले होते. ही जोडी सिडनाज म्हणून सोशल मीडियावर फेमस झाली होती.
from Marathi Bollywood News, Marathi Cinema News https://ift.tt/3kOIq1s
