आजच्या तारखेला चाळीसहून अधिक बहुचर्चित सिनेमांच्या २०२२ मधील प्रदर्शनाच्या तारखा निश्चित आहेत. यात प्रभास, आलिया भट, रणवीर सिंग, रणबीर कपूर, अक्षयकुमार, अमिताभ बच्चन यांसारख्या बड्या कलाकारांच्या सिनेमांचा समावेश आहे. पण, हे बॉलिवूडचं ठरलेलं प्रदर्शनाचं कॅलेंडर विस्कटण्याची चिन्हं सध्या दिसताहेत. बी टाऊनमधील एकामागोमाग एक कलाकार करोनाच्या विळख्यात अडकत आहेत. देशातील अनेक राज्यांमध्ये सिनेमागृहांवरील निर्बंधही वाढवले आहेत. त्यामुळे या परिस्थितीत सिनेमांचं प्रदर्शन करणे हे निर्मात्यांना आर्थिकदृष्ट्या परवडणारं नसल्यानं त्यांनी पुन्हा एकदा अर्धविराम घेतला आहे. या सगळ्यात २०२२चं ठरलेलं वेळापत्रक बिघडणार असल्याचं जाणकार आणि सिनेमा व्यावसायिक सांगतात. करोनाच्या संभाव्य तिसऱ्या लाटेपासून वाचण्यासाठी सुरक्षिततेचा पवित्रा म्हणून अनेक राज्यांनी सिनेमागृहांची कार्यप्रणाली निम्म्या क्षमतेवर आणली आहे. दिल्लीनं तर सिनेमागृहं पूर्णपणे बंद केले आहेत. मुंबई किंबहुना महाराष्ट्र राज्यात करोना रुग्णांची संख्या दिवसागणिक वाढतेय. त्यामुळे मुंबईतील निर्बंधदेखील आणखी वाढण्याची शक्यता वर्तवली जातेय. अलीकडेच शाहिद कपूरचा 'जर्सी', राजामौली दिग्दर्शित 'आरआरआर', प्रभासचा 'राधेश्याम' आणि अक्षयकुमारच्या 'पृथ्वीराज' या सिनेमांच्या तारखा पुढे ढकलण्यात आल्या आहेत. आता तारखा बदलाव्या लागणार! सध्याच्या परिस्थितीवर भाष्य करताना सिनेनिर्माते आणि ट्रेंड अॅनालिस्ट गिरीश जौहर सांगतात, 'जानेवारीमध्ये प्रदर्शित होणाऱ्या बहुतांश सर्व सिनेमांचं प्रदर्शन रद्द झालेलं आहे. त्यांच्या नव्या तारखा लवकरच जाहीर होतील. पण, यावेळी संपूर्ण वर्षाचं ठरलेलं सिनेमांचं वेळापत्रक बिघडण्याची शक्यता आहे. तसंच दुसरीकडे काही सिनेमांच्या सुरू असलेल्या चित्रीकरणावरही याचा परिणाम झाला आहे. त्यामुळे या सिनेमांनादेखील त्यांची पूर्वनियोजित प्रदर्शनाची तारीख बदलावी लागू शकते.' मराठी सिनेमा 'वेट अँड वॉच' मध्यंतरीच्या महिन्यांत 'पावनखिंड', 'लकडाऊन', 'झोंबिवली', 'वन फॉर थ्री', 'एक नंबर' आदी सिनेमांच्या तारखा जाहीर झाल्या होत्या. अद्याप या तारखा बदलेल्या नाहीत. मराठी सिनेनिर्माते सध्या परिस्थितीचा आढावा घेत असून त्यांनी 'वेट अँड वॉच' हा पवित्रा घेतला आहे. राज्यात सर्व सुरळीत राहिल्यास यंदाच्या महिन्यात आणि पुढील म्हणजे फेब्रुवारी महिन्यात मराठी सिनेमांचे प्रदर्शन पूर्वनियोजित पद्धतीनं होणार आहे. दिग्दर्शक महेश मांजरेकर यांनी 'नाय वरनभात लोन्चा कोन नाय कोन्चा' हा सिनेमा पुढील आठवड्यात प्रदर्शित करण्याचं निश्चित केलं आहे. चित्रपटगृहात येण्यासाठी प्रेक्षकांना सुरक्षित वाटणं गरजेचं आहे. सध्याच्या परिस्थितीत चित्रपट प्रदर्शित करून तो बघण्यासाठी प्रेक्षक सिनेमागृहात येईलच असं नाही. तसंच समाजाप्रती आपली जबाबदारी ओळखून चित्रपटाच्या प्रदर्शनाची तारीख पुढे ढकलणं गरजेचं आहे. हे निर्मात्यालाही फायद्याचंच ठरणार आहे. 'झोंबिवली' हा चित्रपट येत्या ४ फेब्रुवारीला प्रदर्शित होणार होता; पण आताच्या परिस्थितीचा विचार करून आम्हीसुद्धा प्रदर्शनाची तारीख पुढे ढकलत आहोत. प्रदर्शनाच्या नव्या तारखेविषयी प्रेक्षकांना लवकरच कळवलं जाईल. - आदित्य सरपोतदार, दिग्दर्शक (झोंबिवली)
from Marathi Bollywood News, Marathi Cinema News https://ift.tt/3q4RVxk
