कल्पेशराज कुबल, फिल्मसिटी वर्षाचे बाराही महिने गजबजलेली असणारी गोरेगावची सुमारे साडेतीन महिने साफ थंडावली होती. लॉकडाउनच्या सुरुवातीच्या टप्प्यातल्या दिवसांमध्ये जेव्हा फिल्मसिटीमध्ये जाणं झालं, तेव्हा हा सगळा शुकशुकाट प्रत्यक्ष अनुभवला होता. सगळे सेट, स्टुडिओ बंद होते. एरवी चित्रीकरणासाठी जिकडे-तिकडे धावपळ दिसायची; 'लाइट्स.. कॅमेरा.. अॅक्शन'चे आवाज ऐकू यायचे. पण, तेव्हा सारं काही शांत होतं; जणू एखाद्या चित्रपटाचा मध्यंतर झाला आहे. पण, आता हा मध्यंतर संपला आहे. शंभरहून अधिक दिवस लांबलेल्या या मध्यंतरानंतर आता पुन्हा एकदा चित्रपट सुरू झाला आहे. म्हणजे 'फिल्मसिटी'मध्ये पुन्हा एकदा चित्रीकरणाला सुरुवात झाली आहे. एखादी विज्ञानकथा असलेल्या चित्रपटात नायक जसा प्रयोगशाळेत शिरताना जशी पूर्वतयारी करतो, जणू तशीच काहीशी तयारी चित्रनगरीत शिरताना मलाही करावी लागली. फिल्मसिटीमध्ये जाणारे कलाकार, तंत्रज्ञ, कर्मचारी हेदेखील तसेच आत प्रवेश करत असतात. फिल्मसिटीच्या मुख्य प्रवेशद्वारावर महाराष्ट्र सुरक्षा बलाचे जवान तैनात आहेत. फिल्मसिटीमध्ये प्रवेश करण्यापूर्वी मी चेहऱ्यावर घातला आहे ना? ते पाहत टेम्परेचर गननं शरीराच्या तापमानाची नोंद करण्यात आली. सॅनिटायजरनी हात निर्जंतुकीकरण करण्यास सांगण्यात आलं. नाव, संपर्कक्रमांक, कुठनं आला आहात ही संपूर्ण माहिती नोंदवून घेतली गेली. सर्वसामान्य नागरिक, पर्यटक आणि ज्येष्ठ नागरिकांना (६५ हून अधिक वयोगटातील) फिल्मसिटीमध्ये जाण्यास मज्जाव करण्यात आला आहे. केवळ कलाकार आणि चित्रीकरणाशी संबंधित लोकांनाच फिल्मसिटीच्या आवारात प्रवेश दिला जातो. मुख्य प्रवेशद्वारावर सुरक्षाविषयक मार्गदर्शक बाबींची पूर्तता करून मी आत शिरलो. जसजसा पुढे जात होतो; तशा व्हॅनिटी व्हॅन आणि चित्रीकरण युनिटमधली लोकं दिसत होती. महिन्याभरापूर्वी फिल्म्ससिटीचा फेरफटका मारला तेव्हा सारं शांत होतं. पण, आता काही प्रमाणात वर्दळ दिसून येत होती. कामाजी लगबग सुरू होती. ज्याप्रमाणे मुख्य प्रवेशद्वारावर मास्क, , शरीर तापमान तपासलं जातं, तसं फिल्मसिटीच्या कार्यालयात प्रवेश करतानादेखील त्या सगळ्या गोष्टी पुन्हा करण्यात आल्या. फिल्मसिटीच्या परिसरावर सीसीटीव्ही कॅमेऱ्यांच्या माध्यमातून बारीक लक्ष ठेवण्यात येतंय. फिल्मसिटीमध्ये सध्या हिंदी-मराठी अशा सुमारे दहा टीव्ही मालिकांचं चित्रीकरण सुरू आहे. येत्या आठवड्यात आणखी काही मालिकांचं आणि चित्रीकरण सुरू होणार आहे. राज्य सरकारने आखून दिलेल्या मार्गदर्शक तत्त्वांचं पूर्णपणे पालन करून चित्रीकरणाचं काम सुरू आहे. फिल्मसिटीमध्ये मला प्रवेश देण्यात आला तरी मुख्य सेटवर जाण्यास परवानगी नव्हती. मुख्य चित्रीकरणाच्या सेटवर उपस्थिती असलेल्या सर्व कलाकार, तंत्रज्ञ आणि कर्मचाऱ्यांचा बाहेरच्या कोणत्याही व्यक्तीशी संपर्क येऊ नये यासाठी पुरेपूर काळजी घेतली जात आहे, जेणेकरून करोना संसर्गाचा धोका कमी होईल. सोबतच जे कलाकार आणि कर्मचारी बाहेरून सेटवर येत आहेत, त्यांचे कपडे, हात-पाय सॅनिटाइज करण्याची सोय सेटच्या प्रवेशद्वारावर करण्यात आली आहे. बाहेरूनच सेटच्या आत डोकावून पाहिलं असता, मुख्य कलाकार वगळता प्रत्येकाच्या चेहऱ्यावर मास्क घातलेला दिसून येत होता. कलाकारांचाही शॉट पूर्ण झाला, की ते लगेचच चेहऱ्यावर मास्क लावून स्क्रीप्टचं वाचन करत होते. सेटवर मेकअप दादांनी पीपीई किट घातलेले दिसून येत होते. मेकअप करण्यासाठी कलाकाराच्या जवळ जावं लागणार म्हणून ही खबरदारी घेतली जात होती. इतर दिवशी सेटवर किमान पन्नासएक लोकांची गर्दी तरी असते. आता मात्र सेटवर निवडक लोकच दिसून येत होते. मुख्य कलाकार धरुन जेमतेम सुमारे पंचवीस एक लोकच सेटवर दिसून येत होते. सेटवरवर जागोजागी सूचनाफलक नव्यानं लावण्यात आले आहेत, ज्यावर संसर्गापासून कशा प्रकारे स्वत:चा बचाव करता येईल आणि कोणत्या सुरक्षाविषयक नियमांचं पालन करणं आवश्यक आहे; याची माहिती दिलेली आहे. त्याबरोबरच शेजारी एक पेटी ठेवण्यात आली होती, ज्यात वापरले मास्क, हातमोजे आणि इतर वस्तू टाकल्या जायच्या, जेणेकरून सेटवर किंवा फिल्मसिटी परिसरात त्या पसरणार नाहीत. सर्व नियम पाळत आणि खबरदारी घेत सुरू असलेल्या चित्रीकरणामध्ये कलाकारांचा आणि तंत्रज्ञ मंडळींचा उत्साह मात्र दांडगा होता. काहीही करून काम करायचं आहे, हेच सेटवरील प्रत्येकाच्या मनात होतं. सगळ्या अडचणींवर मात करून पुन्हा एकदा 'लाइट्स.. कॅमेरा... अॅक्शन'चा नारा देत फिल्मसिटी आता नव्या दमानं गजबजली होती.
from Marathi Bollywood News, Marathi Cinema News https://ift.tt/3iZ1315