बॉक्स ऑफिसवर धो-धो कमाई करणारे चित्रपट नेहमी आठवणींत राहतात. पण, हॉलिवूडचे असे काही चित्रपट आहेत, जे बॉक्स ऑफिसवर चांगली कामगिरी करू शकले नाही. तेच चित्रपट टीव्हीवर आले तेव्हा मात्र ब्लॉकबस्टर ठरले. टीव्ही आणि ओटीटीवर ते सातत्यानं पाहिले जात आहेत. अशाच काही चित्रपटांविषयी... स्कॉट पिलग्रीम व्हर्सेस वर्ल्डग्राफिक नोवेलवर आधारित सर्वोत्तम चित्रपटांमध्ये 'स्कॉट पिलग्रीम व्हर्सेस वर्ल्ड' या चित्रपटाचा नेहमीच उल्लेख होत असतो. उत्तम कथानक आणि कलाकारांची उत्तम कामगिरी या चित्रपटात असली, तरी हा चित्रपट बॉक्स ऑफिसवर हवी तशी कामगिरी करू शकला नाही. चित्रपटाचे उपग्रह प्रसारण हक्क विकताना निर्मात्यांना अक्षरशः नाकी नऊ आले होते. फॅन्टसी, कॉमेडी आणि अॅक्शन या तीनही गोष्टींनी परिपर्णू असा हा चित्रपट टीव्हीवर आल्यानंतर मात्र प्रेक्षकांना आवडला. सॅटेलाईट अॅवॉर्डसमध्ये सर्वोत्कृष्ट म्युझिकल कॉमेडी चित्रपटाचा पुरस्कार 'स्कॉट पिलग्रीम व्हर्सेस वर्ल्ड'ला मिळाला. मॅन फ्रॉम अंकल अॅक्शन स्पाय कॉमेडी असलेला 'मॅन फ्रॉम अंकल' हा चित्रपट २०१५ मधील सर्वोत्तम चित्रपटांपैकी एक होता. हेन्री कॅविल, आर्मी हॅमर, एलिसिया विकेंडर आणि हुघ ग्रँट या मोठ्या कलाकारांनी साकारलेला 'मॅन फ्रॉम अंकल' हा स्पाय कॉमेडीचा एक उत्तम नमुना असून, अनेक सिनेप्रेमी हा चित्रपट बघावाच असे सांगतात. बॉक्स ऑफिसवर काहीशी चांगली कामगिरी करणारा हा चित्रपट ओटीटी प्लॅटफॉर्मवर मात्र आघाडीवर दिसतो. या चित्रपटानं बॉक्स ऑफिसवर, निर्मिती खर्च वगळून ६० कोटींची कमाई केली होती. ऑलमोस्ट फेमस२००० साली आलेला केट हडसनचा 'ऑलमोस्ट फेमस' हा चित्रपट उत्तम गीत, कलाकार आणि कथा या गोष्टींनी परिपूर्ण होता. तरीसुद्धा हा चित्रपट बॉक्स ऑफिसवर निर्मिती खर्चसुद्धा कमावू शकला नाही. कॉमेडी ड्रामा असलेला हा चित्रपट बॉक्स ऑफिसवर चालला नसला, तरी २००० सालचा सर्वोत्कृष्ट लेखनाच्या ऑस्कर आणि सर्वोत्कृष्ट चित्रपटाच्या गोल्डन ग्लोब पुरस्काराबरोबरच वर्षभरातील १७ मानाच्या पुरस्कार सोहळ्यात पुरस्कार मिळवत होता. सध्या ओटीटीवर हा चित्रपट अनेक 'वॉच लिस्ट'मध्ये दिसतो. मॅटिल्डा'मॅटिल्डा' हा नव्वदच्या दशकाचा, त्याच नावाच्या रॉल्ड डहलच्या कादंबरीवर आधारित विनोदी चित्रपट होता. हा चित्रपट संपूर्णपणे कादंबरीला फॉलो करणारा आणि तंतोतंत कादंबरीला साजेसा असा होता. मनोरंजक आणि मोहक कथा असलेला हा चित्रपट बॉक्स ऑफिसवर सपशेल आपटला. तरीही टीव्हीवर मात्र सातत्यानं प्रेक्षकांना खिळवून ठेवण्यात हा सिनेमा यशस्वी ठरला आहे. सकारात्मकता दर्शवणारा हा चित्रपटाची निर्मिती ३६ दशलक्ष डॉलर्समध्ये झाली होती. तर बॉक्स ऑफिस कमाई फक्त ३३ दशलक्ष डॉलर्स एवढीच होती. फाईट क्लबब्रॅड पिटसारखा अभिनेता, डेव्हिड फिनचरच दिग्दर्शन असूनसुद्धा बॉक्स ऑफिसवर 'फाईट क्लब' हा चित्रपट यशस्वी ठरला नाही. सध्याच्या काळात जर प्रदर्शित झाला, सहज रेकॉर्डब्रेक कमाई करेल असा 'फाईट क्लब'२१ वर्षांपूर्वी मात्र प्रेक्षकांच्या पसंतीस उतरला नाही. सध्याच्या ऑनलाइन आणि ओटीटीच्या काळात हा चित्रपट सर्वाधिक बघितला जाणारा आणि डाउनलोड केला जाणारा चित्रपट आहे. डेव्हिड फिनचरच्या सर्वोत्तम दिग्दर्शनाखाली तयार झालेला हा चित्रपट जगातील सर्वोत्तम चित्रपटांपैकी एक असून ब्रॅड पिटच्या या चित्रपटातील कामगिरीविषयी आताही चर्चा रंगते. इट्स अ वंडरफुल लाइफपुरुषांच्या मानसिक स्वास्थावर भाष्य करणारा 'इट्स अ वंडरफुल लाईफ' हा पहिला चित्रपट आहे. ब्रिटिशर्स फेव्हरेट ख्रिसमस मूव्ही म्हणून आजही हा चित्रपट ओळखला जातो. कुटुंबातलं प्रेम आणि आशा यावर आधारित कथा असलेला हा चित्रपट १९४६ रोजी प्रदर्शित केला गेला होता. कुटुंब आणि मानसिक स्वास्थ्य यावर आधारित कथानकाबरोबरच जेम्स स्टुवर्ड आणि डोना रीड यांचा चित्रपटातील परफॉर्मन्स कमालीचा होता. तब्बल ७४ वर्षानंतरसुद्धा हा चित्रपट ओटीटी प्लॅटफॉर्मवर आवडीनं पाहिला जातो. स्टारडस्टक्स-मॅन फर्स्ट क्लास, किंग्समॅन सिरीज किक एस यासारख्या दर्जेदार अॅक्शन चित्रपटाचा दिग्दर्शक मॅथ्यू व्हॉगनं दिग्दर्शित केलेला 'स्टारडस्ट' हा चित्रपट २००७ साली प्रदर्शित झाला होता. अॅक्शन, फॅन्टसी आणि विनोदानं परिपूर्ण असलेला हा चित्रपट बॉक्स ऑफिसवर मात्र फक्त निर्मिती खर्चाएवढीच कमाई करू शकला. नील गेलमन यांच्या १९९९ च्या कादंबरीवर आधारित स्टारडस्ट चित्रपटात क्लेंयर डेयर, चार्ली कॉक्स, रॉबर्ट डी निरो हे आघाडीचे कलाकार चमकले होते. ब्लेड रनर आणि ब्लेड रनर २०४९ब्लेड रनरचा सिक्वेल जरी ३० वर्षांच्या प्रदीर्घ काळानंतर आला असला, तरी तो प्रेक्षकांना फारसा आवडला नाही. सायन्स फिक्शनसाठी नावाजले गेलेले दिग्दर्शक म्हणजे रिडली स्कॉट यांनीच या चित्रपटाचं दिग्दर्शन केलं होतं. उत्तम कथानकाबरोबरच एक वेगळं विश्व रिडली यांनी उभारलं होतं. पहिल्या आणि दुसऱ्या चित्रपटाचा फॅन बेस मोठा असला, तरी बॉक्स ऑफिसवर मात्र तो काही दिसला नाही. लॉकडाउनच्या काळात मात्र हे चित्रपट वारंवार पाहिले गेले आहेत. दि शॉशांक रिडम्पशनहॉलिवूड क्लासिक्सपैकी एक असलेला 'दि शॉशांक रिडम्पशन' या चित्रपटानं प्रदर्शनाच्या वेळी मात्र फक्त ३ दशलक्ष डॉलर्स एवढाच नफा बॉक्स ऑफिसवर कमावला होता. चित्रपटातील कमालीचे प्लॉटस, ट्विस्ट्स पाहून प्रेक्षक आजही अचंबित होतो. हा चित्रपट जीवन बदलू शकणाऱ्या कलाकृतींपैकी एक समजला जातो. ओटीटी प्लॅटफॉर्मवर सर्वाधिक पाहिल्या जाणाऱ्या चित्रपटांमध्ये या चित्रपटाचा समावेश होतो. विली वोंका अँड चॉकलेट फॅक्टरी१९७१ मध्ये गिन वाल्डरनं साकारलेला विली वोंका हा फारसा आठवणींत नसला, तरी उत्तम कॉमेडी चित्रपटातील एक म्हणून आजही हा चित्रपट नावाजला जातो. २००५ ला आलेल्या 'चार्ली अँड चॉकलेट फॅक्टरी' हा चित्रपट याच चित्रपटाचा रिमेक होता. चार्लीला जेवढं यश मिळालं, तेवढं यश 'विली वोंका अँड चॉकलेट फॅक्टरी'ला मिळालं नाही. होम इंटरटेन्मेंट सेल आणि टीव्हीवरील सतत दाखवला गेल्याने या चित्रपटाची प्रसिद्धी वाढली आहे. संकलन - सुरज कांबळे
from Marathi Bollywood News, Marathi Cinema News https://ift.tt/2ShI9Gy
