इट (भाग १ आणि २) जगप्रसिद्ध भय कथाकार आणि लेखक स्टिफन किंग यांच्या 'इट' या भय कादंबरीवर आधारित हा चित्रपट पहिल्या मिनिटापासून तुमच्या हृदयाचा ठोका चुकवू शकतो. डेरी, मेंन या छोट्याशा शहरांभोवती 'इट'चं कथानक फिरत आहे. १९८८ ची ही गोष्ट असून, दर २७ वर्षांनी उदयास येणाऱ्या 'पेनिवाईस द डान्सिंग क्लाऊन' या भुताच्या दहशतीखाली असलेल्या सात मित्रांची ही कथा आहे. स्टिफन किंग यांच्या लेखणीनं समृद्ध असलेला हा चित्रपट पार्श्वसंगीत, संकलन, सिनेमॅटोग्राफी याचं एक उत्तम उदाहरण आहे. चित्रपटाची विशेष गोष्ट म्हणजे, चित्रपट तयार करताना तो अगदी स्टिफन यांच्या कांदबरीनुसारच तयार झाला आहे. या चित्रपटाचे दोन्ही भाग हे बॉक्स ऑफिसवर चांगलेच चालले. दोन्ही चित्रपटांनी प्रेक्षकांना घाबरवून सोडलं होतं. अ क्वाईट प्लेस हॉरर चित्रपट म्हटलं की फक्त आपल्याला भूत आणि प्रेत आठवत असतील, तर हा समज 'अ क्वाईट प्लेस' खोडून काढतो. जॉन क्रॅसिन्स्की दिग्दर्शित आणि अभिनित हा चित्रपट सायन्स फिक्शन हॉररपट आहे. ब्रायन वूड्स, स्कॉट बेक आणि क्रॅसिन्स्की यांनी लिहिलेलं हे कथानक वडील (क्रॅसिन्स्की) आणि आईच्या (एमिली ब्लंट) भोवती फिरत आहे. अगदी सूक्ष्म आवाजसुद्धा ऐकणाऱ्या जीवघेण्या एलियनपासून, जन्माला येणाऱ्या बाळाला वाचवण्याची द अबोट कुटुंबाची ही कथा आहे. या चित्रपटात एकही संवाद नसून, चित्रपटातील पात्रं एकमेकांशी अमेरिकन सांकेतिक भाषेनं संवाद साधताना दिसतात. या चित्रपटाला ९१ व्या ऑस्कर सोहळ्यात सर्वोत्कृष्ट ध्वनी संपादन हा पुरस्कार मिळाला. तर अनेक मानांकित पुरस्कार सोहळ्यांत विविध विभागांत या चित्रपटाला नामांकनं मिळाली होती. अस पदार्पणातच अनेज रेकॉर्ड तोडलेल्या जॉर्डन पिले या दिग्दर्शकाचा 'अस' हा चित्रपट व्यक्तिमत्त्वांच्या संघर्षात मानवाचं रूपांतर एका राक्षसामध्ये कसं होईल हे दाखवून देतो. चित्रपटात असलेल्या ४ जणांच्या कुटुंबाला त्यांच्यासारखेच दिसणारे, पण अतिहिंसक लोक कसे पछाडतात याची ही कथा आहे. स्वतःला चांगलं म्हणवून घेणाऱ्या लोकांचा निर्दयी चेहरा हा चित्रपट दाखवतो. चित्रपटातील अनेक दृश्यं अंगावर येतात. भूत २००३ मध्ये आलेल्या 'भूत' या चित्रपटानं प्रेक्षकांची झोप उडवली. राम गोपाल वर्मा याचं दिग्दर्शन असलेला हा हॉररपट तेव्हा गाजला होता. अजय देवगण आणि उर्मिला मातोंडकर यांच्या अभिनयानं 'भूत' या चित्रपटाला एका वेगळ्याच उंचीवर नेऊन ठेवलं होतं. एका पछाडलेल्या घरात नवीन दाम्पत्य आल्यानंतर काय काय घडत जातं, ते का घडतं याची कहाणी 'भूत' आपल्यासमोर मांडतो. वर्मा यांचा हा दुसराच हॉररपट असला तरी संगीत, दिग्दर्शन, दृश्य आणि अभिनय ही भट्टी उत्तम जमून आली होती. चित्रपटातील उर्मिलाच्या कामगिरीनं अनेकांची वाहवा मिळवली. त्याचबरोबर उर्मिलानं अनेक पुरस्कारसुद्धा पटकावले. साचेबद्ध हिंदी चित्रपटाच्या चौकटीतून बाहेर पडणारा हा पहिला हिंदी चित्रपट होता, ज्यात एकही गाणं नव्हतं. या चित्रपटाचे तामिळ आणि तेलुगूमध्येही रिमेक तयार झाले. डरना मना है राम गोपाल वर्माचा 'डरना मना है' हा चित्रपट १८ कलाकारांच्या भूमिका असलेला भयपट आहे. ६ कथानकांनी मिळून तयार झालेला हा चित्रपट असून, याच दिग्दर्शन प्रवाल रमण यांनी केलं आहे. गाडी बंद पडल्यामुळे एका जंगलात थांबावं लागलेल्या ७ तरुणांची ही गोष्ट आहे. हे सातही जण शेकोटीभोवती बसलेले असताना त्यांनी ऐकलेल्या भुताच्या गोष्टी एक-एक करून सांगू लागतात. त्यावर आधारित हा चित्रपट आहे. नाना पाटेकर, सैफ अली खान या कलाकारांच्या उत्तम अभिनयानं नटलेला हा चित्रपट २००३ मध्ये चांगलाच लोकप्रिय ठरला होता. २००६ला या चित्रपटाचा दुसरा भाग 'डरना जरुरी है' सुद्धा प्रदर्शित झाला होता. हॉररपटांमध्ये 'वास्तू शास्त्र' या चित्रपटाचं नाव प्रामुख्यानं घेतलं जातं. राम गोपाल वर्मा यांनी या चित्रपटाची निर्मिती केली असून, सौरभ नारंगनं दिग्दर्शन केलं आहे. 'वास्तू शास्त्र' हा चित्रपट 'द शायनिंग' या स्टिफन किंग यांच्या कादंबरीवरून प्रेरित असून हा चित्रपटातून पहिल्यांदा बॉलिवूडमध्ये झोंबी दिसले. एका कुटुंबाची गोष्ट हा चित्रपट मांडतो. एका नवीन घरात राहायला आलेल्या आई, मुलगा आणि वडील यांच्यामधली ही गोष्ट आहे. आई-वडील सतत काम करत असताना मुलगा एकाकी पडून घरात काल्पनिक मित्र बनवून खेळू लागतो. ते काल्पनिक मित्र त्या घरात राहणारी भूतं ठरतात आणि पुढे अशा काही गोष्टी होऊ लागतात ज्याची कल्पनाही करता येत नाही. सुश्मिता सेन, प्रिया राय चौधरी आणि दाक्षिणात्य चित्रपटात गाजलेला जे. डी. चक्रवर्ती यांच्या या चित्रपटात प्रमुख भूमिका असून, ज्येष्ठ अभिनेते सयाजी शिंदे हेदेखील यात चमकले आहेत. लपाछपी नवऱ्यामुळे शहर सोडावं लागणाऱ्या आणि आई होणार असलेल्या मुलींची कथा म्हणजे 'लपाछपी'. मराठीतील या भयपटानं प्रेक्षकांना चांगलंच घाबरवलं होतं. विशाल फुरियानं या चित्रपटाचं दिग्दर्शन केलं आहे. रानामध्ये कोणाच्या तरी घरी राहत असताना, आपल्याभोवती असलेली भूतं आपल्या होणाऱ्या बाळाचा खून करतील अशा भीतीच्या सावटाखाली असलेली नेहा, या भुताचं रहस्य कसं उलगडते हे पाहताना मन सुन्न होतं. पूजा सावंतच्या या चित्रपटातील अभिनयाची अनेकांनी तारीफ केली. शेखर ताम्हाणे यांच्या नाटकावर आधारित हा चित्रपट प्रेक्षकांना थक्क करणारा आहे. ८ वर्ष सुखानं नांदत असलेल्या कुसुम आणि शरद या जोडप्याची ही कथा आहे. कुसुमच्या वागण्यात अचानक बदल होऊन ती स्वतःला सविता संबोधू लागते. तिचं हे विचित्र वागणं पाहून शरद घाबरून जातो. तो त्याचा मित्र अशोकला मदतीला बोलावतो. चित्रपटाची कथा नाटकाप्रमाणेच प्रेक्षकांना गुंतवणारी आहे. चित्रपटातील शरद म्हणजे सुबोध भावे आणि कुसुम म्हणजे तृप्ती तोडरमल याचा अभिनय उत्तम जमून आला आहे. कुसुमला सविता का पछाडते आणि तिचा हेतू काय असतो याचा उलगडा पुढे होत जातो. चित्रपटाचं दिग्दर्शन स्वप्ना वाघमारे जोशी यांनी केलं असून, या चित्रपटाचा निर्माता जॉन अब्राहम आहे. संकलन - सुरज कांबळे
from Marathi Bollywood News, Marathi Cinema News https://ift.tt/3jGOnuI
