मुंबई टाइम्स टीम: काही पात्र दीर्घकाळ मनात रेंगाळत असतात. काही प्रसंगी चित्रपटातल्या पात्राची आठवणही येते. असंच काहीसं सीरिजच्या पात्रांबाबतही होतंय. एखाद्या प्रसंगी सीरिजमधल्या त्या पात्राने असा निर्णय घेतला होता, असं आठवल्याशिवाय राहत नाही. अशाच काही लक्षात राहिलेल्या पात्रांविषयी... जितू भैय्या 'कोटा फॅक्टरी' सीरिजमध्ये शिक्षकासह मार्गदर्शकाची भूमिका निभावणारा जितू भैय्या प्रेक्षकांना भावला. प्रत्येकाच्या आयुष्यात विविध टप्प्यावर जितू भैय्यासारखी व्यक्ती भेटत असते आणि पुढचा मार्ग सुकर करत असते. प्रेक्षकांनी जितू भैय्याचं पात्र रिलेट केलं. हे पात्र अभिनेता जितेंद्र कुमारने साकारलं आहे. जितू भैय्याने सांगितलेले जीवनमंत्र आजही प्रेरणादायी कोट स्वरुपात व्हायरल होत आहेत. गुरुजी 'सेक्रेड गेम्स'मधील प्रत्येक पात्र कमाल झालं होतं, असं प्रेक्षक आवर्जून सांगतात. गायतोंडेसह अनेक पात्र भाव खाऊन गेली. त्यातील एक पात्र कायमचं लक्षात राहतं, ते म्हणजे गुरुजी. स्वत:च्या स्वार्थासाठी इतरांना संकटात ढकलणारे गुरुजी प्रेक्षकांचं लक्ष वेधून घेतात. या खलनायिकी पात्रामुळे कधी-कधी प्रेक्षकांची चिडचिड होते ते तर कधी-कधी आश्चर्याचा धक्का बसतो. हे पात्र अभिनेता पंकज त्रिपाठीने साकारलं आहे. निखिल आजच्या स्पर्धात्मक जगात स्टार्टअप सुरु करुन ते टिकवणं आव्हानात्मक आहे. हे सगळं करताना पत्नी आणि आई-बाबांचं मन सांभाळून नात्याची वीण घट्ट बांधणं सगळ्यांनाचा जमतं असं नाही. हे सगळे गुणे 'वॉट द फोक्स'मधील निखिलमध्ये आहेत. सगळ्यांच्या कलाकलाने घेणारा निखिल प्रेक्षकांना भावला. हे पात्र युट्यूबर आणि अभिनेता वीर राजवंत सिंहने खुबीनं साकारलं आहे. तारा 'मेड इन हेव्हन'मधील तारा हे पात्र प्रेक्षकांच्या लक्षात राहतं. एकीकडे ताराचा आत्मविश्वास प्रेरणदायी ठरतो तर दुसरीकडे तिला वाटणारी असुरक्षितता विचार करायला भाग पाडते. मनाचं ऐकावं की हृदयाला भावतं ते खरं समजावं, यातला गोंधळ तारा या पात्राने उत्तमरित्या पडद्यावर दाखवला आहे. एकाच सीरिजमध्ये एका पात्राच्या विविध छटा बघायला मिळल्या. या पात्रामुळे अभिनेत्री सोभिता धुलिपालावर कौतुकाचा वर्षाव झाला. कैनाझ भारत-पाकिस्तानमधील तणावपूर्ण संबंधाच्या पार्श्वभूमीवर 'काफिर' या सीरिजचं कथानक घडतं. यातील दिया मिर्झाने साकारलेलं कैनाझ हे पात्र भाव खाऊन जातं. ती ज्या प्रकारे संकटांचा सामना करते ते बघण्यासारखं आहे. अशा स्वरुपाची अनेक पात्रं आली तरी हे पात्र प्रेक्षकांच्या मनात कायम राहिलं. राधा नको त्या वयात भीषण घटनांना सामोरी गेलेली राधा मोठेपणी पोलिस होते. आपल्यासारखं बालपण कोणाच्या वाट्याला येऊ नये म्हणून अनेक मुलींची सुटका करते. हे पात्र आदर्शवत आहे. राधाचं डेअरिंगबाज पात्र लक्षात राहण्यासारखं आहे. राधाचं पात्र अभिनेत्री स्वरा भास्करनं साकारलं आहे. तिचं व्यक्तिमत्त्व तरुणांना आपलंसं वाटतं.
from Marathi Bollywood News, Marathi Cinema News https://ift.tt/37DAny1
