तुम्ही जिवंत आहात हे सिद्ध करण्यासाठी तुमच्याकडे एखादा सरकारी दस्तऐवज असायला हवा; जो तुम्ही जिवंत असल्याचा दाखला देईल. पण तुम्ही सरकार दरबारी, कागदपत्रांच्या नोंदणीत 'मृत' असाल तर, काय करणार? याच प्रश्नाचं मार्मिक उत्तर लिखित-दिग्दर्शित '' हा सिनेमा आपल्यासमोर मांडतो. एक सर्वसामान्य माणूस आपण स्वतः जिवंत आहोत; हे सिद्ध करण्यासाठी काय काय करतो आणि कोणत्या थराला जातो; हे 'कागज' या सिनेमात दाखवण्यात आलं आहे. आजमगढ (उत्तर प्रदेश) मधील एका गावात काही नातेवाईक जमीन हडपण्यासाठी सरकारी अधिकाऱ्यांना लाच देऊन सरकारी कागदांवर लाल बिहारीला मृत घोषित करतात. स्वतःला जिवंत असल्याचं सिद्ध करण्यासाठी तो सो कॉल्ड व्यवस्थेबरोबर अठरा वर्षांचा लढा देतो. हा संघर्ष करणाऱ्या लाल बिहारीवर हा सिनेमा बेतलेला आहे. सिनेमातील काही भाग वगळल्यास उर्वरित पट तिखट, टोचणारा आणि व्यवस्थेला सणसणीत चपराक देणारा असा आहे. अभिनेते पंकज त्रिपाठी कधी सिनेमाच्या शीर्षक भूमिकेत दिसले नव्हते. पण, सतीश कौशिक सारख्या जाणकार कलाकार दिग्दर्शकानं सिनेमातील मुख्य भूमिकेसाठी पंकज त्रिपाठी ही निवड अचूक केली आहे. पंकज कोणत्याही भूमिकेतील मर्म त्यांच्या अभिनयातून साकारत असतात. यावेळची 'कागज' सिनेमातील भरत लाल ही भूमिका देखील त्याला अपवाद नाही. व्यक्तिरेखेतील बारकावे, ठेहराव, शब्दफेक, देहबोली आदी प्रत्येक घटक गोष्ट सांगू पाहतोय. यूपीमधील एका गावात बँड मास्टर असलेला भरत लाल (पंकज त्रिपाठी) आपली पत्नी रुक्मणी () सह आपला संसार करत असतो. बँड वाजवण्याचा हा छोटेखानी उपजीविकेचा व्यवसाय वाढवण्यासाठी तो बँकेत कर्ज काढण्यासाठी जातो. कर्ज मिळण्यासाठी काहीतरी गहाण ठेवावं लागेल असं बँक सांगते. त्यावर तो आपल्या स्वर्गीय वडिलांची त्याच्या हिस्स्याची जमीन गहाण ठेवता येईल; यासाठी तो नातेवाईकांकडे कागदपत्र मिळवण्यासाठी जातो. पण, भरतच्या नातेवाईकांनी त्याला सरकारी कार्यालयात मृत घोषित केलेलं असतं आणि त्याची जमीन स्वतः बळकावलेली असते. इथूनच लाल बिहारीच्या अस्तित्वाचा संघर्ष सुरु होतो. भरत सरकारी कार्यलयाच्या चकरा मारत असतो. अगदी जिल्हाधिकाऱ्यापासून ते थेट प्रधानमंत्रीपर्यंत सर्वांना पत्र लिहून आपली कहाणी सांगतो. न्यायालयाकडे देखील धाव घेतो. तिथे त्याला साधुराम केवट नावाचा वकील (सतीश कौशिक) भेटतो. तो त्याच्या या संघर्षात साथ देतो. पण, हा संघर्ष काय आहे? हे जाणून घेण्यासाठी तुम्ही सिनेमा पाहायला हवा. सिनेमा मार्मिकदृष्ट्या टोचणारा आणि तिखट आहे. पण; सिनेमात बॉलिवूडचा मसाला टाकण्याचा मोह दिग्दर्शक सतीश कौशिक यांना टाळता आलेला नाही. अतिरंजकपणामुळे काही ठिकाणी सिनेमा रटाळ झाला आहे. पटकथा कथानकांवरील पकड सैल करते. सिनेमाच्या पूर्वार्धात वकील या पात्राच्या आवाजात सूत्रधार म्हणून कथानकाचा सार सांगू लागतो. सूत्रधाराचा हा सिलसिला सिनेमा पाहताना खटकतो. उर्वरित सिनेमाची पटकथा उत्तम फुलवली आहे. सिनेमाच्या तांत्रिक बाबी देखील नीटनेटक्या झाल्या आहेत. अधिक कठोर होऊन सतीश यांनी सिनेमाचं दिग्दर्शन केलं असतं तर दिग्दर्शकीयदृष्ट्या त्यांनी सेंचुरी केली असती. सर्वसमावेशक सिनेमा म्हणून 'कागज' अधिक पारिणामकारक झाला असता; जो यावेळी काहीसा कमी पडलाय. सिनेमा : कागज निर्माते : सलमान खान, निशांत कौशिक, विकास मालू लेखन/दिग्दर्शन : सतीश कौशिक कलाकार , मोनल गज्जर, सतीश कौशिक, अमर उपद्याय संगीत : प्रवेश मलिक, राहुल जैन छायांकन : अर्कोदेब मुखर्जी ओटीटी : झी५ दर्जा : तीन स्टार
from Marathi Bollywood News, Marathi Cinema News https://ift.tt/38qmGnC
