मुंबई: सुशांतसिंह राजपूतनं जून २०२० मध्ये राहत्या घरी गळफास घेत आत्महत्या केली. या घटनेला आता जवळपास ९ महिने पूर्ण झाले आहेत. पण आजही त्याचं अंकिता लोखंडेसोबतचं नातं चर्चेत आहे. सुशांतच्या निधनानंतर अंकिता त्याच्या कुटुंबासोबत खंबीरपणे उभी राहिली. पण अनेकदा तिच्यावर सुशांतसोबतच्या ब्रेकअपवरून टीका सुद्धा झाली. अंकिताने नेहमीच या विषयावर बोलणं टाळलं. पण नुकत्याच दिलेल्या एका मुलाखतीत अंकितानं सुशांतसिंह राजपूतसोबतच्या ब्रेकअपवर आपली प्रतिक्रिया दिली आहे. नुकत्याच एका वेबसाइटला दिलेल्या मुलाखतीत अंकितानं स्पष्ट केलं की, सुशांतनेच तिच्यासोबत ब्रेकअप केलं होतं. अंकिता म्हणाली, 'आजपर्यंत मी गप्प राहिले कारण मला माझ्या रिलेशनशिपमधील भांडणं सर्वांसमोर आणायची नव्हती. पण आता मला लोक येऊन बोलतात की, तू सुशांतला सोडलं. अशा लोकांना मी विचारू इच्छिते की, तुम्ही माझ्याबद्दल असं कसं बोलू शकता? कोणला माझ्यासोबत काय झालं हे माहित आहे का? मी कोणावर आरोप करत नाही. मला वाटतं त्याला त्याच्या निवडीबाबत पूर्ण खात्री होती. त्याला त्याच्या करिअरसोबत पुढे जायचं होतं. त्यानं त्याचं करिअर निवडलं आणि मला सोडून निघून गेला पण त्यानंतर दोन वर्ष मी बरंच काही सहन केलं.' अंकिता पुढे म्हाणाली, 'आयुष्यात पुढे निघून जाणं माझ्यासाठी अजिबात सोपं नव्हतं. माझं कुटुंब नेहमीच माझ्यासोबत राहिलं. माझं आयुष्य संपलं होतं. मला समजत नव्हतं की, मला काय करायचं आहे. मी पूर्णपणे खचले होते. यासाठी मी कोणाला जबाबदार धरणार नाही. मी सुशांतला सुद्धा सांगितलं होतं, चल तुझं आयुष्य आहे. तुला जायचं आहे तर जा. पण त्याला हे सांगताना मी मनातून खचले होते.' या मुलाखतीत अंकिताने अनेक खुलासे केले आहेत. ती म्हणाली, 'सुशांतसोबत लग्न करण्यासाठी मी अनेक बिग बजेच चित्रपट सोडले. मी त्याच्यासोबत लग्न करून संसार थाटण्याचा विचार करत होते. त्यासाठी मी 'हॅप्पी न्यू ईयर', 'राम लीला', 'सुल्तान', 'बाजीराव मस्तानी' आणि 'बदलापूर' सारखे चित्रपट सोडले. माझ्या डोक्यात माझ्या करिअरचा विचार आला नाही. मला फक्त सुशांतला चांगलं काम मिळावं आणि मी त्याच्या प्रत्येक निर्णयात त्याच्यासोबत खंबीरपणे उभी राहू असंच वाटायचं. आजही मला या गोष्टीचा अजिबात पश्चाताप होत नाही. त्यावेळी माझ्यासाठी महत्त्वाची गोष्ट काहीतरी वेगळी होती. पण आता मी लोकांना सांगेन की, नेहमीच प्रोफेशन आणि पर्सनल लाइफवर एक समान लक्ष केंद्रित करा.' सोशल मीडियावर ट्रोल करणाऱ्या ट्रोलर्सबद्दल अंकिता सांगते, 'आज जे लोक मला उलट बोलत आहेत ते लोक त्यावेळी कुठे होते जेव्हा आमचं ब्रेकअप झालं होतं. त्यावेळी ते पुढे का आले नाही. आज हे लोक माझ्या आणि विकीच्या रिलेशनशिपला वाईट बोलतात. सुशांत आणि मी अचानक मेड फॉर इचअदर झालो. तेव्हा हे सर्व लोक कुठे होते. या सर्व गोष्टींमुळे मला खूप जास्त त्रास होतो. कारण आज सुशांत या जगात नाही आणि माझ्या मनात त्याच्या विरोधात काहीच नाही आहे.' आणि दोघंही ६ वर्षं एकमेकांसोबत रिलेशनशिपमध्ये होते. पण २०१६ मध्ये या दोघांचं ब्रेकअप झालं. अंकिताच्या वर्कफ्रंटबद्दल बोलायचं तर तिनं २०१९ मध्ये रिलीज झालेल्या 'मणिकर्णिका' या चित्रपटातून बॉलिवूड करिअरची सुरुवात केली होती. या चित्रपटातील तिच्या अभिनयाचं खूप कौतुक सुद्धा झालं होतं. त्यानंतर अंकिता 'बागी ३' मध्ये टाइगर श्रॉफ, श्रद्धा कपूर आणि रितेश देशमुख यांच्यासोबत महत्त्वपूर्ण भूमिकेत दिसली होती.
from Marathi Bollywood News, Marathi Cinema News https://ift.tt/3ccioC3
