मुंबई- देशात करोनामुळे गंभीर परिस्थिती निर्माण झाली आहे. अनेकांना आपल्या प्राणांना मुकावं लागत आहे. कुठे औषधांची कमतरता आहे तर कुठे ऑक्सिजनची कमी आहे. अशात करोनाग्रस्तांसाठी आपल्या परीने काहीतरी खारीचा वाटा उचलावा यासाठी मराठमोळी अभिनेत्री प्रार्थना बेहरेने एक अनोखा उपक्रम सुरू केला आहे. आपल्या अभिनयाने आणि सौंदर्याने प्रेक्षकांची मनं जिंकणारी प्रार्थना आता गरजूंच्या मदतीसाठी पुढे सरसावली आहे. तिच्या अनोख्या उपक्रमात प्रार्थनाने प्रेक्षकांची मदत मागितली आहे. प्रार्थना एक उत्तम अभिनेत्री तर आहेच त्यासोबतच ती उत्तम चित्रदेखील रेखाटते. लॉकडाउनमधे प्रार्थनाने अनेक एकाहून एक उत्कृष्ट चित्र रेखाटली आहेत. आता ही चित्र प्रार्थना विकणार आहे आणि आलेल्या पैशातून ती करोनाग्रस्तांची मदत करणार आहे. आपल्या या उपक्रमाबद्दल पोस्ट करत प्रार्थनाने लिहिलं, 'नमस्कार, करोनाच्या सध्याच्या अवताराने जगात धुमाकूळ घातलाय. हा काळ आपल्या सर्वांसाठी खूप कठीण आहे. कोरोनामुळे अनेकांना शारीरिक व आर्थिक समस्यांना सामोरं जावं लागतंय आणि त्यांच्या संपूर्ण कुटुंबाला खूप हाल सोसावे लागतायत. अश्यावेळी मी त्यांच्यासाठी काय करू शकते हा विचार नेहमी माझा मनात यायचा. लॉकडाउनच्या काळात मी पेंटिंग करायला सुरवात केली आणि त्याच वेळी मला माझ्या मैत्रिणीकडून ह्या पेंटिंग्स विकून, त्या रकमेतून गरजू लोकांना मदत करण्याची कल्पना सुचली.' चाहत्यांना आवाहन करत प्रार्थनाने लिहिलं, 'स्वतःची कला विकायला कोणालाच आवडत नाही पण मी हे पेंटिंग पैसे कमावण्यासाठी विकत नसून ह्या मधून मिळणारी सर्व रक्कम समाज कार्यासाठी वापरायचे ठरवले आहे. माझ्याकडून एक मदत म्हणून मी हा उपक्रम राबवत आहे आणि तो यशस्वी करण्यासाठी तुम्हा सर्वांची मदत हवी आहे. हे पेंटिंग विकायला आहेत म्हणून घेऊ नका, तर ते पैसे तुम्ही समाज कार्यासाठी दान करत आहात अशी भावना ठेवा आणि त्या बद्दल माझ्याकडून हे पेंटिंग रिटर्न गिफ्ट आहेत असे समजा. जे लोकं पेंटिंग विकत घेतील त्या सर्वांना लॉकडाउन संपल्यावर कुरिअरनी ते घरपोच पाठवले जातील व मी स्वतः त्यांना संपर्क करेन. ह्या उपक्रमा मधून मिळणारा आनंद, समाधान आणि तुमचे आशीर्वाद महत्वाचे आहेत. तर तुम्ही सुद्धा माझ्या बरोबर ह्या उपक्रमात सामील व्हावे हीच प्रार्थाना.'
from Marathi Bollywood News, Marathi Cinema News https://ift.tt/3bJwH0k
