मुंबई: बॉलिवूड अभिनेत्री शिल्पा शेट्टीचा पती याला काही दिवसांपूर्वीच पॉर्न फिल्म तयार करून त्या अॅपवर प्रसारित केल्याप्रकरणी अटक करण्यात आली आहे. दरम्यान राज कुंद्राच्या अटकेनंतर त्याचे त्याच्या एक्स पीए उमेश कामतसोबतचे व्हॉट्सअॅप चॅट समोर आले. ज्यात अनेक धक्कादायक खुलासे झाले. पण या सर्व गोष्टींमुळे मराठी अभिनेता उमेश कामतला मात्र बराच मनस्ताप सहन करावा लागला. ज्यानंतर त्यानं सोशल मीडियावर एक पोस्ट शेअर करत राग व्यक्त केला आहे. शिल्पा शेट्टीचा पती राज कुंद्राला १९ जुलै दिवशी रात्री ९ वाजता बराच काळ चाललेल्या चौकशीनंतर अटक करण्यात आली होती. त्यानंतर न्यायालयानं २३ जुलै पर्यंत त्याची रवानगी पोलीस कोठडीत केली आहे. याच दरम्यान राज कुंद्रा आणि त्याचा पीए याचे व्हॉट्सअॅपवरील चॅट्स समोर आले. त्याबद्दलचे वृत्त प्रसारित करत असताना काही वाहिन्यांनी राज कुंद्राच्या पीएचा फोटो म्हणून अभिनेता उमेश कामतचा फोटो वापरला होता. ज्यामुळे अभिनेता भडकला असून त्यानं याबाबत सोशल मीडियावर पोस्ट करत कायदेशीर कारवाईचा इशारा दिला आहे. अभिनेता उमेश कामतनं आपल्या सोशल मीडिया पोस्टमध्ये लिहिलं, 'आज राज कुंद्रा प्रकरणात चालवण्यात आलेल्या बातमीमध्ये, या प्रकरणातील एक आरोपी 'उमेश कामत' याचा फोटो म्हणून माझा फोटो लावला जातो आहे. कुठलीही शहानिशा न करता वृत्तवाहिन्यांनी या प्रकरणात माझा फोटो लावून माझी बदनामी केली आहे.या प्रकारामुळे होणाऱ्या माझ्या वैयक्तिक, व्यावसायिक आणि सामाजिक हानीसाठी या वृत्तमाध्यमांना जबाबदार धरले जाईल. या प्रकरणी संबंधित मी योग्य ती कायदेशीर कारवाई निश्चितच करेन.' दरम्यान राज कुंद्राच्या अटकेनंतर त्याच्या बाबत अनेक धक्कादायक खुलासे होताना दिसत आहे. राज कुंद्राच्या विरोधात याबाबत फेब्रुवारी महिन्यातच तक्रार दाखल करण्यात आली होती. ज्यानंतर मुंबई पोलिसांनी या प्रकरणी तपासाला सुरुवात केली आणि त्यानंतर राज कुंद्राला अटक केली आहे. या प्रकरणात आतापर्यंत एकूण १२ जणांना अटक करण्यात आली आहे. पण आरोपी उमेश कामतच्या जागी अभिनेता उमेश कामतचा फोटो वापरल्यानं संतापलेल्या अभिनेत्यानं वृत्त वाहिन्यांना चांगलंच सुनावलं आहे. तसेच याप्रकरणी कायदेशीर कारवाई करण्याचा इशाराही दिला आहे.
from Marathi Bollywood News, Marathi Cinema News https://ift.tt/2UBTNAz
