मुंबई- गणेश चतुर्थीच्या दिवशी अनेक बॉलिवूड सेलिब्रिटींनी आपल्या घरी गणेशाचे वाजत गाजत स्वागत केले होते. दिड दिवसांच्या सेवेनंतर अनेक सेलिब्रिटींनी बाप्पाला निरोपही दिला. अभिनेत्री शिल्पा शेट्टीने तिच्या कुटुंबासह बाप्पाला भक्ती भावाने निरोप दिला. सध्या विसर्जनाचे अनेक व्हिडिओ आणि फोटो सोशल मीडियावर व्हायरल होत आहेत. सोशल मीडियावर समोर आलेल्या गणेश विसर्जनाच्या व्हिडिओ आणि फोटोंमध्ये तिचा मुलगा वियान आणि मुलगी समिशासोबत दिसत आहे. तिघांनीही एकाच रंगाचा आणि डिझाईनचा ड्रेस घातला आहे. शिल्पा शेट्टीसोबत तिची आई सुनंदा शेट्टीही होती. शिल्पाने तिच्या घरीच गणेश मूर्तीचे विसर्जन केले. या दरम्यान, तिच्यासोबत अनेक लोकही उपस्थित होते. शिल्पाची मुलगी समिषाने गणेश विसर्जनादरम्यान सर्वांचे लक्ष वेधून घेतले. चिमूकली समीशा लोकांना पाहून त्यांना फ्लाइंग किस देत होती. शिल्पाने यापूर्वी तिच्या घरी गणेश पूजेचा व्हिडिओ शेअर केला होता. या व्हिडिओमध्ये ती आपल्या मुलांसह गणपतीची आरती करताना दिसत आहे. शिल्पाने या व्हिडिओवर लिहिले की, 'दरवर्षीप्रमाणे या वर्षीही आमचा गन्नू राजा आमच्यासोबत आहे, त्यामुळे प्रत्येक संकटाचा पराभव निश्चित आहे. बाप्पाची कृपा तुम्हा सर्वांवर राहो आणि तुमच्या आयुष्यातील अडथळे दूर होवो. गणपती बाप्पा मोरया.' शिल्पाच्या कामाबद्दल बोलायचं झालं तर १३ वर्षांनंतर तिने सिनेमांमध्ये पुनरागमन केलं. 'हंगामा २' या सिनेमात तिने जवळपास १३ वर्षांनंतर काम केलं होतं. या सिनेमात तिच्यासोबत परेश रावल, मीझान जाफरी आणि प्रणिता सुभाष होते. आता शिल्पा शेट्टी अभिमन्यू दासानी आणि शर्ली सेतियासोबत 'निकम्मा' सिनेमात दिसणार आहे.
from Marathi Bollywood News, Marathi Cinema News https://ift.tt/3A6IUGt