कॅलिफोर्निया- आठवड्याभरापासून कॅलिफोर्नियातील पीरू तलावापाशी मुलासोबत पोहायला गेलेली हॉलिवूड अभिनेत्री बेपत्ता होती. आता तिचा मृतदेह मिळाला आहे. तलावाच्या मध्यभागी बोटीत तिचा चार वर्षांचा मुलगा एकटा सापडला होता. त्याचदिवसापासून नायाचा शोध घेण्यात येत होता. जवळपास सहा दिवसांनंतर तिचा मृतदेह सापडला आहे. अनेक हॉलिवूड सिनेमांमध्ये काम केलेली नाया तिच्या 'Glee' या म्युझिक व्हिडिओमुळे प्रसिद्ध झाली होती. ८ जुलै रोजी ती मुलगा जोसेसोबत पोहायला गेली होती. तिने तीन तासांसाठी एक बोटही भाड्याने घेतली होती. पण तीन तास उलटूनही ती परत न आल्याने बोटीच्या मालकाने पोलिसांना कळवले. घटनास्थळी पोहोचल्यावर पोलिसांना फक्त नायाचा चार वर्षांचा मुलगा बोटीत सापडला. मुलाने दिलेल्या माहितीनुसार, नायाने पोहण्यासाठी बोटीतून पाण्यात उडी मारली. पण परत ती वर आली नाही. यानंतर हेलिकॉप्टर, ड्रोन अशा अनेक माध्यमांनी नायाचा शोध घेण्यात आला. पोलीस अधिकाऱ्यांनी दिलेल्या माहितीनुसार, रिवेराच्या मुलाने लाइफ गार्ड घातलं होतं, पण तिने लाइफ गार्ड घातलं नव्हतं. सोमवारी सकाळी तलावात त्यांना एक मृतदेह सापडला. तो मृतदेह रिवेराचा असल्याची ओळखही पटली. तिचा मृतदेह मिळण्याच्या आधीपासूनच लोकांनी हे मान्य केलं होतं की तिचं निधन झालं. २०१४ मध्ये रिवेरा ने Ryan Dorsey शी लग्न केलं आणि २०१८ मध्ये ते वेगळे झाले. कॅलिफोर्नियाच्या सॅन्टा क्लॅरिटामध्ये राहणारी नाया रिवेराने वयाच्या चौथ्या वर्षापासून अभिनयाला सुरुवात केली होती. किशोरवयीन असताना तिला जेवणाशी संबंधीत समस्या सुरू झाल्या आणि तिने वयाच्या १८ व्या वर्षी ब्रेस्ट इप्लान्ट केलं होतं.
from Marathi Bollywood News, Marathi Cinema News https://ift.tt/3fq92lm
