मराठीबरोबरच हिंदी मालिकांमध्ये आपला ठसा उमटवणारी अभिनेत्री हिला आता सोज्वळ भूमिका सोडून बिनधास्त, हिंमतबाज भूमिका साकारण्याची इच्छा आहे. ० लॉकडाउननंतर चित्रीकरण पुन्हा सुरू झालंय. तुझा अनुभव कसा आहे? - इतक्या दिवसांनंतर चित्रीकरण पुन्हा सुरू झालं आहे. त्यामुळे नक्कीच छान वाटतंय. शूटिंग कधी सुरू होणार याचे वेध लागले होते. बाहेरची परिस्थिती बघून पुन्हा काम करण्यासाठी, बाहेर वावरण्यासाठी खूप धाडस गोळा केलंय. लॉकडाउन खरं तर अजूनही आहे आणि मी स्वतःची काळजीदेखील घेते आहे. जसं लॉकडाउनमध्ये स्वतःला जपलं, तसंच आताही जपते आहे. ० लॉकडाउनमध्ये स्वतःला कसा वेळ दिलास? - मला खरंच खूप मोकळा वेळ मिळाला. गेलं दीड वर्ष मालिका चालू असल्याने सतत काम सुरू होतं. लॉकडाउनमुळे घरच्यांबरोबर खूप वेळ मिळाला. आमचं एकत्र कुटुंब आहे. त्यामुळे सगळ्यांबरोबर वेळ घालवता आला. लॉकडाउनच्या आधी नुकतंच मी नवीन घरात शिफ्ट झाले होते. त्यामुळे नवीन घर सेट करण्याचा पुरेपूर आनंद घेतला आहे. ० मराठीत पुन्हा कधी दिसणार? - एका वेळेस मला एकच काम करायला आवडतं. माझ्या कामाच्या सुरुवातीपासून मी हेच करत आले आहे. मला कोणत्याही प्रकारची घाई आवडत नाही. सध्या हिंदीमध्ये काम सुरू आहे. ते संपलं की नक्की मराठीमध्ये काम करण्याचा विचार करेन. ० कॉलेजमध्ये असताना थिएटर केलं होतंस का? भविष्यात नाटकात काम करण्याचा काही विचार आहे? - मी वझे-केळकर कॉलेजची विद्यार्थिनी. कॉलेजमध्ये असताना थिएटर वगैरे काही केलं नव्हतं. अर्थात, कॉलेजच्या सगळ्या सांस्कृतिक स्पर्धांमध्ये भाग घ्यायचे. पण, थिएटरशी थेट असा संबंध कधी आला नाही. मला नाटकं बघायला फार आवडतात. नाटकात काम करण्याचा विचारदेखील करेनच. ० कॉलेजची एखादी लक्षात राहिलेली आठवण? - आम्ही कॉलेजमध्ये होतो तेव्हापासून कॉलेजमध्ये 'डायमेन्शन्स' नावाचा फेस्टिव्हल सुरू झाला होता. त्यामुळे त्यासाठी केली जाणारी सगळी तयारी, धावपळ नेहमी लक्षात राहील. मला या फेस्टिव्हलमुळे खूप शिकायला मिळालं. पडद्यामागे काम करणं नक्की कसं असतं, नेमकं काय काम चालतं हे समजलं. कॉलेजच्या शिक्षकांबरोबरही खूप आठवणी आहेत. ० वेब सीरिज हे एक प्रसिद्धीचं माध्यम झालंय असं तुला वाटतं का? तू स्वतः वेब सीरिजमध्ये कधी दिसणार? - कोणत्याही माध्यमातून काम केलं तरी प्रसिद्धी मिळतेच. मी तर म्हणेन की मालिका केल्यानं खरं तर जास्त प्रसिद्धी मिळते. पण वेब सीरिज हा इतका चांगला पर्याय आहे, की ज्या गोष्टी टीव्ही किंवा चित्रपटात घेऊ शकत नाही त्या गोष्टींना तिथे संधी मिळू शकते. आपल्याकडे खूप गुणी कलाकार आहेत आणि त्यांना वेब सीरिजमुळे संधी मिळते आहे. त्यामुळे हे नक्कीच खूप चांगलं माध्यम आहे. मला भविष्यात संधी मिळाली तर मी नक्कीच करेन वेब सीरिज. ० हिंदीमध्ये काम करतानाचा अनुभव कसा आहे? काही अडचणींना सामोरं जावं लागतं का? - नाही. हिंदीत काम करताना कुठल्याही प्रकारच्या अडचणींना सामोरं जावं लागत नाही. मुळात हिंदीमध्ये बजेट जास्त असल्यामुळे नवनवीन पद्धतींचा वापर हिंदीत मराठीपेक्षा जास्त होतो. त्यामुळे काम करताना मजा येते. भाषा कोणतीही असो, काम करताना अडचण येतच नाही. ० भविष्यात कोणती भूमिका करण्याची इच्छा आहे? - मला पोलिसांची भूमिका साकारायला नक्कीच आवडेल. मी आजवर ज्या भूमिका साकारल्या आहेत त्या चांगली मुलगी, सून वगैरे अशा प्रकारच्या सोज्वळ भूमिका आहेत. ज्यात हिंमत, धैर्य दाखवण्याची संधी आहे अशा प्रकारची भूमिका करायला आवडेल. ० तुझ्या चाहत्यांना काय सांगशील? - आम्ही आता कामासाठी बाहेर पडतोय तेव्हा समजतंय की परिस्थिती किती गंभीर आहे. तुम्ही घाई करू नका. अत्यावश्यक सेवेतील कर्मचारी आपल्यासाठी खूप मेहनत घेत आहेत. त्यांच्या मेहनतीवर आपल्याला पाणी फिरवायचं नाहीय. लवकरंच सगळं काही नीट होईल, अशी प्रार्थना करू या.
from Marathi Bollywood News, Marathi Cinema News https://ift.tt/2C9BMk1
