० सेटवर लहान मुलांना नो एंट्री ० मालिकांच्या कथानकात त्यानुसार बदल संपदा जोशी काही दिवसांपूर्वी मालिकांचं चित्रीकरण सुरू झालं असून, नवीन भाग पाहायला मिळत असल्यानं प्रेक्षक खूश आहेत. पण, ज्येष्ठ कलाकारांबरोबरच बालकलाकारांनाही सेटवर नो एंट्री आहे. चित्रीकरणासाठी सरकारनं घालून दिलेल्या नव्या मार्गदर्शक तत्वांनुसार दहा वर्षांहून कमी वयाच्या बालकलाकारांना चित्रिकरणात सहभागी होता येणार नाही. त्यामुळे लाडक्या बालकलाकारांची मालिकेतली धमाल पाहण्यासाठी प्रेक्षकांना आणखी काही काळ वाट पाहावी लागेल. कोणत्याही मालिकेत मोठ्या लोकप्रिय कलाकारांबरोबरच बालकलाकारही तेवढेच लोकप्रिय असतात. कथानकात त्यांची उपस्थिती महत्त्वाची असते. पण, सध्या या चिमुकल्या कलाकारांना सेटवर येण्यास परवानगी नसल्यानं पुढचे काही दिवस तरी मालिकांमध्ये ते नसतील. ''मधला अथर्व, ''मधला सार्थक, 'ह.म. बने तु.म. बने'मधले पार्थ, रेहा आणि सई यांना मालिकेत पुन्हा पाहण्यासाठी प्रेक्षकांना वाट बघावी लागणार आहे. 'स्वराज्यजननी जिजामाता' मालिकेत आर्यन रवींद्रनाथ लहामगे हा छोट्या शिवबांची भूमिका साकारताना दिसतोय. त्याचं वय दहा वर्षांहून अधिक आहे. आर्यनची आवश्यक ती सगळी काळजी सेटवर घेतली जात असल्याचं मालिकेच्या निर्मात्यांकडून समजतं. 'ऑलमोस्ट सुफळ संपूर्ण'मधली स्वरा देसाईचा मालिकेत ट्रॅक आलेला नसल्यानं ती पुन्हा कधी दिसणार याचा निर्णय मालिकेनं अद्याप घेतलेला नाही. 'प्रेम पॉयझन पंगा'मधला चिनू (चिनू) मालिकेत रक्षाबंधन साजरी करण्यासाठी व्हिडीओ कॉलद्वारे दिसणार आहे. या बालकलाकारांच्या पालकांना विचारलं असता, 'सरकारी नियमांचं पालन आम्ही करत असून, लहान मुलांना करोनाचा धोका अधिक असल्यानं हा निर्णय योग्य आहे', अशी प्रतिक्रिया त्यांनी व्यक्त केली. सरकारच्या नियमांनुसार बालकलाकारांना सेटवर येण्यास बंदी आहे. चॅनलकडून हे नियम पाळण्याचे आदेश आम्हाला आहेत. म्हणून 'माझ्या नवऱ्याची बायको'मधला अथर्व आणखी काही दिवस मालिकेत नसेल. बालकलाकार म्हटलं की आपोआपच जबाबदारी वाढते. लहान मुलांना जपणं महत्त्वाचं आहे. जोवर बालकलाकारांना सेटवर येण्यास परवानगी दिली जात नाही, तोवर मालिकेत ते नसतील. - केदार वैद्य, दिग्दर्शक, (माझ्या नवऱ्याची बायको) लहान मुलांना सेटवर बोलवायचं नाही असा निर्णय आम्ही घेतला आहे, कारण मुलांचं आरोग्य जास्त महत्त्वाचं आहे. लॉकडाउनच्या आधी आम्ही दोन भाग चित्रित केले होते, ज्यात बालकलाकार आहेत. ते कदाचित प्रसारित होऊ शकतील. पण, लॉकडाउननंतर पुन्हा चित्रीकरण सुरू झालंय तेव्हापासून एकाही बालकलाकाराला आम्ही सेटवर बोलावलेलं नाही. सरकारकडून सूचना येईपर्यंत बोलावणारही नाही. - अमोल पाटील, लेखक, (ह.म. बने तु.म. बने) येतेय मोठी रमा 'स्वामिनी' मालिकेत छोट्या रमाची भूमिका बालकलाकार श्रुष्टी पगारे साकारत होती. लॉकडाउननंतर मालिकेच्या चित्रित झालेल्या नव्या भागातून मोठी झालेली रमा प्रेक्षकांच्या भेटीला येणार आहे. याविषयी मालिकेचे दिग्दर्शक वीरेन प्रधान म्हणाले की, 'मालिकेचं कथानक काही वर्ष पुढे गेलं आहे. परिणामी मालिकेच्या आगामी भागात मोठी रमाबाई पाहायला मिळणार आहे. लहान मुलांना सेटवर सांभाळणं खूप जोखमीचं काम असतं. त्यांच्याकडे सतत लक्ष ठेवावं लागतं. सरकारनं दिलेल्या नियमांनुसार लहान मुलांना सेटवर परवानगी नाही. त्यामुळे हा निर्णय घेण्यात आला आहे.'
from Marathi Bollywood News, Marathi Cinema News https://ift.tt/2WC1Nj3
