मुंबई- नारकोटिक्स कन्ट्रोल ब्यूरो (एनसीबी) ने बुधवारी बॉलिवूड अभिनेत्री दीपिका पादुकोण, सारा अली खान, श्रद्धा कपूर आणि रकुलप्रीत सिंग यांना ड्रग्ज संदर्भातील चौकशीसाठी बोलावले आहे. एनसीबीने दीपिकाची मॅनेजर करिश्मा प्रकाशलाही चौकशीसाठी समन्स पाठवला आहे. मात्र मंगळवारी करिश्माने ती आजारी असल्याचं कारण देत शुक्रवारी २५ सप्टेंबरपर्यंतची वाढीव वेळ मागवून घेतली. एका हिंदी वृत्तवाहिनीच्या रिपोर्टनुसार, दीपिकाने या ड्रग्ज चॅटमध्ये स्वतःचं नाव समोर येण्यासाठी करिश्मा आणि टॅलेन्ट मॅनेजर जया साहाला जबाबदार ठरवलं आहे. या रिपोर्टमध्ये असंही स्पष्ट केलं आहे की, दीपिका सध्या तिच्या १२ सदस्यांच्या लीगल टीमशी संपर्कात आहे आणि व्हिडिओ कॉलमार्फत ती पुढील कारवाईची चर्चा करत आहे. या चर्चेत तिचा नवरा आणि अभिनेता रणवीर सिंहही आहे. दीपिकाला २५ सप्टेंबरला एनसीबीने चौकशीसाठी हाजिर होण्यास सांगितलं आहे. त्यामुळे आज गुरुवारी दीपिका मुंबईत दाखल होईल असं म्हटलं जात आहे. गेल्या आठवड्यातच दीपिका तिच्या आगामी सिनेमासाठी गोव्यात गेली होती. शकून बत्रा दिग्दर्शित या सिनेमाचं नाव अजून निश्चित झालं नसून सिद्धांत चतुर्वेदी आणि अनन्या पांडे यांच्याही महत्त्वपूर्ण भूमिका या सिनेमात आहेत. दरम्यान, २०१९ मध्ये करण जोहरच्या घरी करण्यात आलेल्या कथित ड्रग्ज पार्टीचा व्हिडिओ एनसीबीने फॉरेन्सिक लॅबकडे पाठवला आहे. एफएसएल आता त्या व्हिडिओची तपासणी करणार आहे. या पार्टीत दीपिका पादुकोण, अर्जुन कपूर, मलायका अरोरा, शाहिद कपूर, वरुण धवन, अयान मुखर्जी, रणबीर कपूरसह अन्य स्टारही उपस्थित होते. हा व्हिडिओ पाहून असं म्हटलं गेलं होतं की, बॉलिवूड सेलिब्रिटी ड्रग्ज पार्टी करत होते आणि सर्वच नशेत होते. मात्र करणने सर्व आरोप फेटाळून लावले आणि म्हटलं की, असं म्हणणाऱ्यांविरोधात तो कायदेशीर कारवाई करू शकतो.
from Marathi Bollywood News, Marathi Cinema News https://ift.tt/36fEfWX
