या पुस्तकांमधून कलाकारांना मिळाली प्रेरणा, तुम्ही वाचलीत का?

मराठी मनोरंजनसृष्टीतील अनेक कलाकारांचं वाचन दांडगं आहे. अनेक कलाकारा त्यांच्या चाहत्यांना आणि परिजनांना वाचनाची गोडी लावण्याचा सल्ला देतात. एवढंच नाही तर घरी आलेल्या पाहुण्यांनाही ते एखाद- दुसरं पुस्तक भेटही देतात. यातून अनेकांमध्ये वाचनाची आवड निर्माण व्हावी हा त्यांचा प्रामाणिक हेतू असतो. पण या सगळ्यात त्यांचं आवडतं पुस्तक कोणतं आहे? पुस्तकांकडून प्रेरणा घेत आपलं जगणं कसं समृद्ध झालं हे त्यापैकी काही वाचनप्रिय कलाकारांनी सांगितलं आहे, आजच्या 'वाचन प्रेरणा दिना'निमित्त. त्यांच्याकडून तुम्हालाही वाचनाची प्रेरणा नक्कीच मिळू शकेल आणि कोणास ठाऊक यातलीच काही पुस्तकं तुमच्या भविष्याचा पाया रचायला आणि तो घट्ट करायला मदतही करतील.शब्दांकन - गौरी आंबेडकर, रुईया कॉलेज

शिवरायांचा परिचय- सुबोध भावे

आठवीत असताना डॉ. बाबासाहेब पुरंदरे यांचं 'राजा शिवछत्रपती' हे पुस्तक माझ्या हाती आलं. त्या पुस्तकामुळे मला पहिल्यांदा छत्रपती शिवाजी महाराज अतिशय जवळून जाणून घेता आले. शाळेतल्या पाठ्यपुस्तकांमधून शिवाजी महाराजांची ओळख झाली होती. पण 'राजा शिवछत्रपती' या पुस्तकानं महाराजांचं समग्र दर्शन घडवलं. शिवरायांची जडणघडण कशी झाली हे वाचताना अंगावर रोमांचं उभं राहायचं. या पुस्तकानं छत्रपतींबद्दल आणखी जाणून घेण्याची उत्सुकता निर्माण केली. शिवाजी महाराजांचा जीवनपट जसजसा उलगडत गेलो, तस तशी माझ्या जगण्यालाही एक नवी दिशा मिळाली

साठवणीची आठवण - चिन्मय मांडलेकर ​

मी खूप पुस्तकं वाचत असतो. आयुष्याच्या प्रत्येक टप्प्यावर वेगवेगळ्या पुस्तकांनी मला प्रेरणा दिली आहे. आवडतं असं एक पुस्तक निवडणं खूप कठीण आहे. पण तरीही 'पु. ल. - एक साठवण' या पुस्तकाविषयी मला विशेष जिव्हाळा आहे. हे पुलंचं मी वाचलेलं पहिलं पुस्तक. माझ्या वडिलांकडे हे पुस्तक होतं. अजूनही ती जुनी प्रत मी जपून ठेवली आहे. या पुस्तकात समग्र पुलं वाचायला मिळतात. त्यांची व्यक्तिचित्रणं, विनोदी लेखन याबरोबरच शांतीनिकेतन, महात्मा गांधी यांच्याविषयीचं गंभीर लेखनही या पुस्तकात आहे. पु. ल. देशपांडे यांचं आयुष्य माझ्यासाठी खूप प्रेरणादायी आहे. प्रत्येक गोष्टीकडे ते अगदी दिलखुलासपणे पाहतात आणि आपल्यालाही एक वेगळा दृष्टिकोन देऊन जातात.

घडीचे प्रवासी -शिल्पा नवलकर​

सुप्रसिद्ध लेखक जयवंत दळवी यांचं 'सारे प्रवासी घडीचे' हे माझं आवडतं पुस्तक आहे. हे पुस्तक मी खूप लहान असताना पहिल्यांदा वाचलं होतं. आपलं जसं काहीतरी म्हणणं असतं, तसंच दुसऱ्याचंही म्हणणं असतं, हे या पुस्तकानं मला शिकवलंय. प्रत्येक माणूस वेगळा असतो. त्याचं वाटणं निराळं असतं आणि तितकंच वैशिष्ट्यपूर्णही असतं. कुणीच पूर्णपणे बरोबर नसतं आणि कोणीच पूर्णपणे चुकतही नाही. प्रत्येकजण आपल्यापरीनं प्रवास करत असतो. व्यक्ती तितक्या प्रकृती हे 'सारे प्रवासी' वाचल्यावर मला अगदी बालपणी पटलं. यामुळे आजुबाजूच्या पस्थितीला, माणसांना अधिक चांगल्या प्रकारे समजून घेता आलं.

रंजक महाभारत -अश्विनी कासार​

शिवाजी सावंत यांचं 'मृत्यूंजय' मी आतापर्यंत सात वेळा वाचलंय. हे एक अतिशय सुंदर पुस्तक आहे. मानवी मनाचे विविधांगी कंगोरे मला या पुस्तकानं मला दाखवले. महाभारताबद्दल उत्सुकता निर्माण केली. आणखी खोलात शिरून वाचायला भाग पाडलं. कर्ण, कुंती, कृष्ण, वृषाली ही सगळी पात्रं अनुभवता आली. ही सगळी पात्रं एकाच लेखकानं इतक्या उत्तम प्रकारे कशी रंगवली असतील, असा प्रश्नही पडतो. एक अभिनेत्री म्हणून त्या-त्या पात्राची मानसिकता समजून घेण्यासाठी मी पुन:पुन्हा 'मृत्यूंजय' वाचत राहणार आहे. वाचनाचा आनंद घेत राहणार आहे.

​अभ्यासपूर्ण वाचन -स्पृहा जोशी ​

मी सध्या 'वाचणाऱ्याची रोजनिशी' हे सतीश काळसेकर यांचं पुस्तक वाचतेय आणि अक्षरशः भारावून गेले आहे. मला स्वतःला माझ्या वाचनाविषयी भारी कौतुक आणि अभिमान वाटायचा. पण हे पुस्तक वाचून खरं आणि शिस्तीचं ग्रंथवेड काय असतं हे लक्षात आलं. पुस्तकांचा समग्र मागोवा कसा घ्यावा हे समजून घेते आहे. अभ्यासपूर्ण वाचनाची सवय कशी लावून घ्यावी, त्या वाचनाची टिपणं, यादी आणि या सगळ्याच्या पलीकडे जाऊन आपल्या जगण्यामध्ये हे ग्रंथ भांडार कसं रुळेल अशा अनेक गोष्टी या पुस्तकानं मला शिकवल्या आहेत. माझ्या वाचनाला खऱ्या अर्थानं प्रेरणा देणारं हे पुस्तक आहे.

​'व्यक्ती आणि वल्ली'मुळे समृद्ध -भार्गवी चिरमुले ​

अनेक पुस्तकं घरी आणून ठेवली होती. पण वाचायला वेळ मिळाला नव्हता. लॉकडाउनच्या काळात ती निवांतपणे वाचता आली. मला असं वाटतं की, कसं जगायचं हे शिकवण्याबरोबरच चांगल्या पुस्तकानं आपल्याला भाषेची गोडी लावायला हवी. महाराष्ट्राचं दैवत असलेल्या पु. ल. देशपांडे यांच्या पुस्तकांमुळे मला वाचनाची गोडी लागली. 'अपूर्वाई', 'बटाट्याची चाळ', 'असा मी असा मी' या पुस्तकांनी मला आकर्षित करून घेतलं. ही सगळी पुस्तकं मी वारंवार वाचली आहेत. पण, पुलंचं सर्वाधिक आवडलेलं पुस्तक म्हणजे 'व्यक्ती आणि वल्ली'. जगण्याचे अनेक रंग या पुस्तकानं दाखवले. परोपकारी गंपू, चितळे मास्तर, नंदा प्रधान, बबड्या, अंतू बर्वा अशी वेगवेगळ्या ढंगाची माणसं भेटली. वाचताना खुदकन हसू येतं, तसंच डोळ्यांतून टचकन पाणीही येतं. अगदी हलक्याफुलक्या शैलीत ही पात्र खूप कमालीचं जीवन रहस्य सांगतात. त्यात तत्कालीन सामाजिक-आर्थिक परिस्थितीचं प्रतिबिंबही आपल्याला दिसतं. 'व्यक्ती आणि वल्ली' वाचताना दरवेळी काहीतरी नवीन सापडतं. या पुस्तकाने माझं जगणं खऱ्या अर्थाने समृद्ध केलं आहे.

from Marathi Bollywood News, Marathi Cinema News https://ift.tt/3j1wOoI