मुंबई: सुपरस्टार अभिनेता महेश बाबूचे चाहते जगभरात आहेत. फक्त त्याच्या चित्रपटांसाठी नाही तर गरीबांना मदत करण्यासाठी ओळखला जातो. एवढंच नाही तर महेश बाबू हृदयाच्या आजारांनी पीडित असलेल्या लहान मुलांच्या शस्त्रक्रियेसाठी सुद्धा मदत करतो. काही दिवसांपूर्वीच त्यानं एका गरीब मुलाच्या हार्ट सर्जरीसाठी मदत करून त्याला नवजीवन दिलं आहे. महेश बाबूची पत्नी आणि अभिनेत्री नम्रता शिरोडकरनं तिच्या इन्स्टाग्रामवर एक पोस्ट शेअर केली आहे. ज्यात तिनं अंकित भार्गव नावाच्या एका गरीब मुलाचा उल्लेख केला आहे. या पोस्टसोबत तिनं या मुलाच्या आई-वडीलांचा फोटो शेअर केला आहे. या पोस्टमध्ये नम्रतानं लिहिलं, 'आणखी एक चांगली बातमी व्हीएसडी आणि पीडीए पीडित अंकित भार्गवला सर्जरीनंतर घरी सोडण्यात आलं. आता तो पूर्णतः ठिक आहे. मी या मुलाच्या चांगल्या आरोग्यासाठी प्रार्थना करते. आंध्रा हॉस्पिटल आणि टीमचे खूप खूप आभार.' २०१९ आंध्रा हॉस्पिटल्स आणि हीलिंग लिटिल हार्ट्स नावाच्या संस्थेसोबत मिळून महेश बाबूनं कामाला सुरुवात केली होती. त्यानंतर त्यानं या दोन्ही संस्थांच्या मदतीनं १००० पेक्षा जास्त मुलांच्या शस्त्रक्रियेसाठी मदत केली आहे. महेश बाबूच्या या कामासाठी चाहते त्याचं कौतुक करताना दिसत आहेत. महेश बाबू फक्त गरीब मुलांच्या शस्त्रक्रियेसाठीच मदत करत नाही तर या व्यतिरिक्त २०१६ मध्ये त्यानं आंध्र प्रदेश मधील बरीपालम आणि तेलंगाना मधील सिद्धापुरम ही दोन गावं सुद्धा दत्तक घेतली आहेत. महेश बाबूनं ही गावं दत्तक घेतल्यानंतर मागसलेल्या या गावांचा झपाट्यानं विकास झालेला पाहायला मिळाला आहे.
from Marathi Bollywood News, Marathi Cinema News https://ift.tt/3bA4IRg
