मुंबई: एखाद्या व्यक्तीच्या शरीरावरून किंवा दिसण्यावरून उडवल्या जाणाऱ्या खिल्लीचा त्याच्यावर किती वाईट परिणाम होत असेल याची कल्पनाच केलेली बरी. बॉलिवूडमधील अनेक अभिनेत्रींनी आतापर्यंत त्यांना आलेल्या बॉडी शेमिंगच्या अनुभवांबद्दल सांगितलं आहे. ज्यात आता अभिनेत्री अनन्या पांडेची सुद्धा भर पडली आहे. बॉलिवूडमध्ये पदार्पण करण्याआधी अनन्याला सुद्धा बॉडी शेमिंगचा सामना करावा लागला होता. स्लिम असल्यानं माझी खिल्ली उडवली जात असे असा खुलासा अनन्यानं नुकत्याच एका मुलाखतीत केला आहे. अभिनेता चंकी पांडे यांची मुलगी अनन्यान २०१९ मध्ये 'स्टुडन्ट ऑफ द इयर २'मधून बॉलिवूड पदार्पण केलं होतं. पण त्याआधी सोशल मीडियावर मात्र ती अनेकदा चर्चेत असायची. अनन्यानं नुकत्याच दिलेल्या मुलाखतीत बॉलिवूड पदार्पणाच्या पूर्वीच्या काळाचा उल्लेख केला आहे. जेव्हा ती बॉडी शेमिंगची शिकार झाली होती. 'बॉलिवूड बबल'ला दिलेल्या मुलाखतीत अनन्यानं सांगितलं, 'मला ती तारीख नीट आठवत नाही. त्यावेळी मी माझ्या आई-बाबांसोबत एक फोटो शेअर केला होता. त्यावेळी मी अभिनेत्री नव्हते. मी माझ्या आई-बाबांसोबत व्हेकेशन्सला जात असे. मी तेव्हा खूप बारीक सुद्धा होते. जेव्हा मी व्हेकेशनचे फोटो सोशल मीडियावर शेअर करायचे तेव्हा लोक माझी खिल्ली उडवत असत. 'तू मुलांसारखी दिसतेस'. किंवा 'तू फ्लॅटस्क्रिन आहेस' अशा कमेंट लोक माझ्या फोटोंवर करत असत.' अनन्या पुढे सांगते, 'या सर्व गोष्टींनी मला दुःख व्हायचं. कारण मी त्यावेळी मोठी होत होतं. नव्या गोष्टी शिकत होते. स्वतःवर प्रेम करायला शिकण्याची ती वेळ होती. त्याच वेळी लोकांनी माझा आत्मविश्वास तोडण्याचा प्रयत्न केला होता. जेव्हा तुम्ही मोठे होत असता आणि त्याच वेळी तुमच्यावर केल्या जाणाऱ्या या अशा कमेंट तुम्हाला मागे खेचत राहतात. तुम्ही स्वतःवर विश्वास ठेवतानाही विचार करता. माझ्यासोबतही हे सर्व झालं.' अनन्यानं २०१९ मध्ये इंटरनेटवर होणाऱ्या ट्रोलिंगच्या विरोधात 'सो पॉझिटिव्ह' या अभियानाची सुरुवात केली होती. हिंदुस्तान टाइम्सला दिलेल्या मुलाखतीत यावर बोलताना अनन्या सांगते, 'सोशल मीडियावर लोकांसोबत माझ्या वागण्यातही वेळेनुसार बदल झाले. आता जेव्हा मी माझ्या पेजवर किंवा फोटोवर काही निगेटिव्ह कमेंट पाहते. तेव्हा त्याच्याखाली काही पॉझिटिव्ह कमेंटही मला दिसतात. ज्यामुळे माझ्यावर त्या नकारात्मक कमेंटचा फारसा फरक पडत नाही.' अनन्याच्या वर्कफ्रंटबद्दल बोलायचं तर ती शेवटची 'पत्नी पत्नी और वो'मध्ये भूमि पेडणेकर आणि कार्तिक आर्यन यांच्यासोबत दिसली होती. सध्या ती विजय देवरकोंडा सोबत तिच्या आगामी चित्रपटाचं शूटिंग करत आहे. याशिवाय ती शकुन बात्राच्या चित्रपटात दीपिका पदुकोण आणि सिद्धांत चतुर्वेदीसोबतही दिसणार आहे.
from Marathi Bollywood News, Marathi Cinema News https://ift.tt/2OmyGiB
