मुंबई- बॉलिवूडमधील सुप्रसिद्ध गायक मिका सिंगच्या लग्नाची चर्चा नेहमीच होताना दिसते. प्रत्येक कार्यक्रमात त्याला लग्नाबद्दल प्रश्न विचारण्यात येतात आणि तो अगदी शिताफीने त्या प्रश्नांची उत्तरं देण्याचं टाळतो. यावेळेस मात्र मिकाने प्रश्न विचारणाऱ्यांवर गुगली टाकली आहेत. तो लग्न कधी करणार हे त्यालाच माहीत नसल्याने त्याने प्रश्न विचारणाऱ्यांना मी सलमान खानच्या लग्नानंतर लग्न करणार असल्याचं सांगितलं. त्याच्या या उत्तराने कार्यक्रमात चांगलाच हशा पिकला होता. नुकतीच मिका सिंगने इंडियन प्रो म्युजिक लीगच्या कार्यक्रमाला हजेरी लावली होती. तो पंजाब लायन्स या संघाचा कर्णधार आहे. तसेच कार्यक्रमात कैलाश खेर, साजिद खान, शान, अंकित तिवारी, जावेद अली, असीस कौर, भूमि त्रिवेदी, अक्षिती कक्कड, पायल देव, नेहा भसीन, आणि शिल्पा राव हे कलाकारदेखील कर्णधार पद भूषवत आहेत. या कार्यक्रमात मिकाला त्याच्या लग्नाबाबत प्रश्न विचारण्यात आला. त्यावर त्याचा 'फॉरेव्हर बॅचलर' हा टॅग कायम ठेवत त्याने उत्तर दिलं. 'मी लग्नासाठी मुलीच्या शोधात आहे. मी इथे इंडियन प्रो म्युजिक लीगच्या माध्यमातून मुलगी शोधू शकतो, पण मी ठरवलं आहे की याच्या लग्नानंतरच मी लग्न करणार. तोपर्यंत मी माझ्या बॅचलर जीवनाचा आनंद घेतोय.' पुढे त्याने म्हटलं, 'जसं साजिद खान यांनी सांगितलं आहे की, सलमान नंतर मीच या इण्डस्ट्रीमधला 'फॉरेव्हर बॅचलर' आहे आणि जमेल तोपर्यंत मी हा टॅग कायम ठेवणार आहे.' मिका याचं प्रत्येक गाणं बॉलिवूडमध्ये हिट होत आलं आहे. त्याने त्याच्या करिअरची सुरुवात 'सावन मे लग गई आग' या सुपरहिट गाण्याने केली होती. सुरुवातीला मिका फक्त पंजाबी गाणी गात होता. पण गाणी हिट झाल्यापासून त्याला बॉलिवूडमध्येही गाण्याची संधी मिळाली. त्या संधीचं सोनं करत त्याने संपूर्ण देशभरात लोकप्रियता मिळवली.
from Marathi Bollywood News, Marathi Cinema News https://ift.tt/3ceDqiu
