मुंबई: मराठी अभिनेता लवकरच 'पिकासो' या चित्रपटातून प्रेक्षकांच्या भेटीला येत आहे. या चित्रपटाचा ट्रेलर नुकताच रिलीज झाला. ज्याची सोशल मीडियावर बरीच चर्चा होताना दिसत आहे. पण यासोबतच प्रसाद ओकची एक इन्स्टाग्राम पोस्ट सोशल मीडियावर खूप व्हायरल होताना दिसत आहेत. या पोस्टच्या कॅप्शनमध्ये प्रसादनं 'तोंडावर गोड बोलून अपरोक्ष निंदा करणारे बरेचजण आहेत' असं म्हटल्यानं त्याच्या या पोस्टची सोशल मीडियावर चर्चा होताना दिसत आहे. प्रसाद ओक सोशल मीडियावर खूप सक्रिय आहे. अनेकदा तो त्याच्या आगामी चित्रपटाचे अपडेट किंवा कोणत्याही नव्या उपक्रामाविषयीची माहिती सोशल मीडियाच्या माध्यमातून चाहत्यांपर्यंत पोहोचवताना दिसतो. मात्र आता त्यानं शेअर केलेला एक फोटो आणि त्यासोबतची पोस्ट सोशल मीडियावर चर्चेत आहे. प्रसाद ओकनं शेअर केलेल्या इन्स्टाग्राम पोस्टमध्ये त्यानं लाल रंगाचं टीशर्ट घातलं आहे. पण त्या टी-शर्टवर असलेलं वाक्य आणि त्यासोबत प्रसादनं या फोटोला दिलेलं कॅप्शन सर्वांचं लक्ष वेधून घेत आहे. या टी-शर्टवर 'देवाक काळजी' असं लिहिलं आहे. प्रसादनं या फोटोच्या कॅप्शनमध्ये लिहिलं, 'तोंडावर गोड बोलून पाठ फिरताक्षणीच अत्यंत कडू बोलणारे किंवा अपरोक्ष निंदा करणारे, अनेक मित्र, मैत्रिणी, नट, नट्या, दिग्दर्शक सध्या आसपास आहेत... माझा आत्मविश्वास ढळावा म्हणून हे सगळे अविरत कार्यरत आहेत... पण तरी माझ्या चेहऱ्यावरचं हसू असंच कायम अबाधित आहे आणि राहणारच... कारण माझी कामावरची निष्ठा, तुम्हा रसिकांचा सदैव असलेला पाठींबा आणि प्रेम आणि सगळ्यात महत्त्वाचं म्हणजे देवाक काळजी...! या तिन्ही गोष्टी शाबूत आहेत तोपर्यंत घाबरायचं कशाला?तुझ्या हाती आहे डाव सारा, इसर गजाल कालची रे, देवाक काळजी रे, माझ्या देवाक काळजी रे' आता प्रसादनं या टी-शर्टवरील मेसेजला साजेसं असं कॅप्शन दिलं आहे की कोणाला उद्देशून हे लिहिलं आहे माहीत नाही. या पोस्टमध्ये त्यानं असा कोणाच्याही नावाचा उल्लेख केलेला नाही. पण त्याच्या चाहत्यांनी मात्र त्यावर प्रतिक्रिया देत, 'तू बेस्ट आहेस आणि तुला आमचं प्रेम नेहमीच मिळत राहणार. अशा लोकांकडे दुर्लक्ष करून तू तुझं काम चालू ठेव.' असं म्हटलं आहे. प्रसादच्या वर्कफ्रंट बद्दल बोलायचं तर त्याचा 'पिकासो' हा चित्रपट लवकरच प्रेक्षकांच्या भेटीला येत आहे. हा चित्रपट ओटीटी प्लॅटफॉर्म अमेझॉन प्राइमवर १९ मार्चला रिलीज होणार आहे.
from Marathi Bollywood News, Marathi Cinema News https://ift.tt/30KC8Gj
