मुंबई: सदाबहार अभिनयातून रंगभूमीचा अवकाश आणि चित्रपटाचा पडदा व्यापणारे; तसेच आपल्या लडिवाळ चेहऱ्याने रसिकांच्या मनावर अधिराज्य गाजवणारे प्रख्यात अभिनेते श्रीकांत मोघे (वय ९१) यांचे वृद्धापकाळाने शनिवारी निधन झाले. त्यांच्या निधनानंतर त्यांची सून आणि अभिनेत्री प्रिया मराठे हिनं अंत्यंत भावुक अशी पोस्ट शेअर केली आहे. प्रियानं शेअर केली ही पोस्ट वाचून अनेकांनी डोळ्यात पाणी आल्याच्या प्रतिक्रिया दिल्या आहेत. हसतमुख चेहऱ्याने प्रत्येकाचे स्वागत करणारे आणि प्रत्येकाशी जिव्हाळ्याने संवाद साधणारे मोघे काही वर्षांपासून आजारी होते. व्याधींमुळे त्यांना ‘व्हिलचेअर’मधून फिरावे लागत होते. अशाही परिस्थितीत नाउमेद न होता ते सभा सोहळ्यांना आवर्जून हजेरी लावत असत. शनिवारी त्यांनी कर्वेनगर येथील निवासस्थानी अखेरचा श्वास घेतला. त्यांच्या मागे पत्नी, मुलगा आणि सून असा परिवार आहे. दिवंगत कवी सुधीर मोघे यांचे ते बंधू होत. अभिनेते शंतनू मोघे त्यांचे चिरंजीव, तर अभिनेत्री प्रिया मराठे या त्यांची सून आहे . प्रियानं तिच्या पोस्टमधून दोघांचं नातं अधोरेखित केलं आहे. सासू -सुनेचं नातं कधी जाणवलंच नाही. बाप लेकीच्या नात्याहून जवळचं असं दोघांचं नातं असल्याचं तिनं तिच्या पोस्टमध्ये म्हटलं आहे. काय लिहिलंय प्रियानं तिच्या पोस्टमध्ये? माझा बाबा! इतकं प्रेम , माझा नवरा सोडल्यास, क्वचितच कोणी माझ्यावर केल असेल.. "सासरे " फक्त म्हणायला, होता तो मला बाबा पेक्षाही जवळचा. 'माझं पीयूडं;,'माझं लाडकं' अशी हाक मारत दोन्ही हात पसरून, मला मिठीत घ्यायचा. प्रयोग संपवून आले असले की 'आज किती बुकिंग होतं, प्रयोग कसा झाला, पुढचा कुठे आहे ' असे सगळे प्रश्न विचारायचा. असं नातं ही मी पहिल्यांदाच पाहिलंबाबा आणि मुलाचं हे असं नातं ही मी पहिल्यांदाच पाहिलं. शंतनु बाबाचे गालगुच्चे घ्यायचा, त्याला प्रेमानी अक्षरशः चुर्गळून टाकायचा आणि ते बाबाला अत्यंत सुख देऊन जायचं. उत्साहच कायम पहिलागेली काही वर्ष तो व्हील चेअर वर होता पण तरी त्याच्या चेहेऱ्यावर मी कधीच, एका क्षणासाठी सुद्धा, उदासीनता नाही पाहिली, उलट आम्हाला लाजवेल इतका उत्साहच कायम पहिला. गेले काही महिने श्रीकांत मोघे आजारी होते. मोघे यांचा जन्म किर्लोस्करवाडी येथे झाला. पुणे व मुंबईत महाविद्यालयीन शिक्षण घेत असताना भालबा केळकर यांच्या ‘बिचारा डायरेक्टर’ या नाटकाचे दिग्दर्शन केले. तसेच लग्नाची बेडी, अंमलदार अशा नाटकांचेही प्रयोग केले. त्यांनी ६०हून अधिक नाटके आणि ५०हून अधिक चित्रपटांमध्ये भूमिका केल्या आहेत. ‘अजून यौवनात मी’, ‘अशी पाखरे येती’, ‘अश्रूंची झाली फुले’, ‘गारंबीचा बापू’, ‘तुझे आहे तुजपाशी’, ‘लेकुरे उदंड जाहली’, ‘वाऱ्यावरची वरात’, ‘सुंदर मी होणार’ या नाटकांमधील त्यांच्या भूमिका गाजल्या; तसेच ‘आम्ही जातो आमुच्या गावा’, ‘सिंहासन’, ‘गंमत-जंमत’, ‘दोन्ही घरचा पाहुणा’, ‘सूत्रधार’, ‘उंबरठा’, ‘दैव जाणिले कुणी’, ‘मधुचंद्र’ अशा अनेक चित्रपटांमधील त्यांच्या भूमिका रसिकांच्या स्मरणात आहेत. त्याबरोबरच ‘अवंतिका’, ‘उंच माझा झोका’, ‘अजून चांदरात आहे’ अशा दूरचित्रवाणी मालिकांमधून त्यांनी भूमिका केल्या. ‘स्वामी’ मालिकेतील त्यांनी साकारलेल्या राघोबादादांच्या भूमिकेला रसिकांची विशेष दाद मिळाली. सांगलीमध्ये २०१२ मध्ये झालेल्या अखिल भारतीय मराठी नाट्य संमेलनाचे अध्यक्षपद त्यांनी भूषविले होते. मोघे यांनी आपल्या कारकीर्दीवर ‘नटरंगी रंगलो,’ हे आत्मचरित्र लिहिले आहे.
from Marathi Bollywood News, Marathi Cinema News https://ift.tt/3eswGQL
