मुंबई- करोनाच्या संकटातून आता कुठे बॉलिवूड सावरू लागल्याची चिन्ह असताना पुन्हा एकदा धक्कादायक बातमी प्रेक्षकांसमोर आली आहे. बॉलिवूडमधील चित्रपट आता उत्तम कमाई करतील अशी आशा बाळगणाऱ्या निर्मात्यांच्या अपेक्षांवर पाणी फिरण्याची चिन्ह दिसत आहेत. देशात करोना पुन्हा वेगाने पसरू लागल्याने लॉकडाउन लागण्याची शक्यता वर्तवली जातेय. त्यात अनेक राज्यात लॉकडाउनदेखील लावण्यात आला आहे. महाराष्ट्रात देखील लॉकडाउन लागण्याची चर्चा असताना राणा दग्गुबातीच्या '' च्या प्रदर्शनाची तारीख लांबणीवर टाकल्याची माहिती समोर येतेय. राणा दग्गुबातीच्या 'हाथी मेरे साथी' हा चित्रपट येत्या २६ मार्चला चित्रपटगृहात प्रदर्शित होणार होता. या चित्रपटात राणासह, श्रिया पिळगावकर, पुलकित सम्राट, पल्लवी जोशी यांसारखे कलाकार मुख्य भूमिकांमध्ये होते. सद्य करोनाची स्थिती पाहता चित्रपटाच्या निर्मात्यांनी चित्रपटाच्या प्रदर्शनाची तारीख पुढे ढकलण्याचा निर्णय घेतला. चित्रपटाचे निर्माते इरोज इंटरनॅशनल यांनी त्यांच्या सोशल मीडिया अकाउंटद्वारे ही घोषणा केली आहे. त्यांनी म्हटलं, 'प्रिय प्रेक्षक, ही बातमी सांगताना आम्हाला दुःख होत आहे परंतु, सध्याची कोविड-१९ ची स्थिती पाहता 'हाथी मेरे साथी' च्या टीमने चित्रपटाला प्रदर्शित न करण्याचा निर्णय घेतला आहे. चित्रपट कधी प्रदर्शित करण्यात येईल याबद्दल कळवण्यात येईल. परंतु, दाक्षिणात्य चित्रपटगृहांमध्ये 'अरण्या' आणि 'कादान' चित्रपट ठरलेल्या तारखेला म्हणजे २६ मार्चला प्रदर्शित करण्यात येईल.' 'अरण्या' आणि 'कादान' हे चित्रपटाचे तेलगू आणि तामिळ भाषेतील चित्रपट आहेत. प्रेक्षकांना 'हाथी मेरे साथी' चा ट्रेलर प्रचंड पसंत पडला होता. प्रेक्षकांनी चित्रपटातील कलाकारांचं कौतुकही केलं होतं. या चित्रपटाचं प्रदर्शन लांबणीवर गेल्यावर प्रेक्षकांमध्ये सलमान खानच्या 'राधे' चित्रपटबाबतीत उत्सुकता आहे. हा चित्रपट ठरलेल्या तारखेला प्रदर्शित होणार की या चित्रपटाचं प्रदर्शन देखील लांबणीवर जाणार हे येणारी वेळच सांगेल.
from Marathi Bollywood News, Marathi Cinema News https://ift.tt/3cYFIT7
