मुंबई : शेअर बाजारात झालेल्या घोटाळ्याचा प्रमुख सूत्रधार याच्या आयुष्यावर आधारीत असलेला ‘बिग बुल’ या बिग बजेट सिनेमाचा टीझर आज प्रसिद्ध झाला. येत्या ८ एप्रिलला डिस्ने प्लस हॉटस्टारवर प्रेक्षकांना हा सिनेमा पाहायला मिळणार आहे. या सिनेमात अभिनेता प्रमुख भूमिकेत आहे. या सिनेमाच्या टीझरमध्ये साधारण १९८७ चा काळ दाखवला आहे. एक चष्मा घातलेली व्यक्ती चालत जाताना दिसते. त्या पार्श्वभूमीवर अजय देवगणच्या आवाजात या सिनेमातील प्रमुख पात्रांची ओळख करून देतो. या चित्रपटाचा ट्रेलर १९ मार्चला प्रेक्षकांना पाहता येईल. या चित्रपटाचं दिग्दर्शन कुकी गुलाटी यांचं आहे.तर अजय देवगणने या चित्रपटाची निर्मिती केली आहे. यात अभिषेक बच्चनसोबत , निकिता दत्त, सुमित व्यास, राम कपूर, सोहम शाह हे कलाकार महत्त्वाच्या भूमिकेत दिसणार आहेत. हा सिनेमा गेल्यावर्षीच प्रदर्शित होणार होता परंतु कोरोनामुळे त्याचे प्रदर्शन लांबणीवर पडले. अखेर निर्मात्यांनी हा सिनेमा ओटीटी प्लॅटफॉर्मवर प्रदर्शित करण्याचा निर्णय घेतला. दरम्यान, हा सिनेमा हर्षद मेहता याच्या आयुष्यावर आधारित असला तरी यातल्या एका प्रसंगामध्ये अभिषेकने साकारलेले पात्र हेमंत शाह या नावाने सही करताना दिसते. त्यामुळे पात्रांची नावे बदलली असली तरी हा सिनेमा वास्तवात घडलेल्या घटनेवर आधारीत आहे, हे नक्की. याच विषयावर गेल्या वर्षी ‘स्कॅम १९९२- द हर्षद मेहता स्टोरी’ ही वेबसीरीज आली होती. हंसल मेहता यांचं दिग्दर्शन असलेल्या वेबसीरीजमध्ये प्रतिक गांधी या कलाकाराने प्रमुख भूमिका साकारली होती. या वेबसिरीजचे समीक्षकांनी भरभरून कौतुक केले होते.
from Marathi Bollywood News, Marathi Cinema News https://ift.tt/3lmlc2n
