मुंबई- आपली प्रत्येकाची अनेक स्वप्न असतात. ती स्वप्न पूर्ण करण्यासाठी जीवाचा आटापिटा करतो आणि त्यासाठी प्रचंड मेहनत घेतो. पाहिलेली स्वप्न जेव्हा पूर्ण होतात तेव्हा होणारा आनंद काही निराळाच असतो. असंच काहीसं घडलंय मराठी सिनेसृष्टीतील लाडक्या अभिनेत्यासोबत. मराठमोळ्या सिद्धार्थ जाधवने त्याच्या अभिनयाने बॉलिवूडचंही लक्ष त्याच्याकडे वेधून घेतलं. प्रत्येक भूमिका यशस्वीपणे पार पाडण्यासाठी तो प्रचंड मेहनत घेत असतो. त्याने निरनिराळ्या भूमिका साकारून अभिनय कौशल्य प्रेक्षकांना दाखवून दिलं आहे. आताही नुकत्याच पार पडलेल्या मराठी सोहळ्यात सिद्धार्थने सूत्रसंचालकाची जबाबदारी उत्तमरीत्या पार पाडली. प्रेक्षकांकडून त्याचं कौतुक करण्यात आलं. प्रेक्षकांकडून मिळालेल्या या प्रतिसादाबद्दल सिद्धार्थने सोशल मीडियावर पोस्ट टाकत त्यांचे आभार मानले आहेत. सिद्धार्थने त्याच्या इन्स्टाग्राम अकाउंटवर पोस्ट शेअर करत बकेट लिस्टमधलं आणखी एक स्वप्न पूर्ण झाल्याचं म्हटलं. त्याने पुरस्कार सोहळ्यासाठी केलेल्या तयारीचा एक व्हिडीओ चित्रित केला आणि तो चाहत्यांसोबत शेअरही केला. त्यात निवेदनासाठी करण्यात येणाऱ्या हेअर स्टाइलपासून ते कपड्यांपर्यंतच्या सर्व गोष्टींची तयारी त्याने कशी केली ते दाखवली. एवढंच नाही तर त्याने मंचावर उभं राहून कशाप्रकारे त्याची जबाबदारी पार पाडली हेही दाखवलं. सिद्धार्थने त्याचं स्वप्न पूर्ण झाल्याचं सांगत मायबाप रसिक प्रेक्षकांचे आभार मानले आहेत. व्हिडिओला त्याने कॅप्शन देताना लिहिलं की, 'फिल्मफेअरचं सूत्रसंचालन केल्यानंतर तुम्ही सर्वांनी कौतुकाचा वर्षाव केला त्याबद्दल मायबाप रसिक प्रेक्षकांचे मनःपूर्वक आभार. खरंच माझ्यासाठी हा खूप खास दिवस होता. माझ्या भावासारखा अमेय वाघ आणि कलर्स मराठी यांनी माझ्यावर विश्वास ठेवला आणि मला ही भूमिका पार पाडण्यासाठी मोलाचं सहकार्य केलं त्याबद्दल सगळ्यांचे मनःपूर्वक आभार आणि माझ्या बकेट लिस्टमधलं अजून एक स्वप्न पूर्ण झालं याचा खुप आनंद आहे.' ही पोस्ट शेअर करत सिद्धार्थने त्याचा आनंद व्यक्त केला. त्याच्या या पोस्टवर प्रेक्षकांनी त्याला पाठिंबा दर्शवला आहे. आम्ही कायम तुझ्या सोबत राहू, अशा प्रतिक्रिया प्रेक्षकांनी दिल्या आहेत.
from Marathi Bollywood News, Marathi Cinema News https://ift.tt/3eJZofS