मुंबई: अमेरिकन टॉक शो होस्ट आणि टीव्ही प्रोड्यूसर केवळ अमेरिकेतच नाही तर संपूर्ण जगभरात प्रसिद्ध आहे. तिनं आतापर्यंत घेतलेल्या अनेक मुलाखती गाजल्या आहेत. तिनं १९८६ साली स्वतःचा 'द ओप्रा विन्फ्रे शो' हा टॉक शो सुरू केला आणि हा शो लोकप्रिय ठरला. पण बालपणी ओप्रा विन्फ्रेवर बलात्कार झाला होता. हे ऐकल्यावर सर्वांनाच धक्का बसेल. पण हे कटू सत्य ओप्रानं स्वतःच सर्वांशी शेअर केलं आहे. ६७ वर्षीय ओप्रा विन्फ्रेनं तिच्या शो 'द मी यू कान्ट सी'च्या लेटेस्ट एपिसोडमध्ये अनेक धक्कादायक खुलासे केले आहेत. ज्यात तिनं सांगितलं की, तिच्याच चुलत भावानं तिच्यावर बलात्कार केला होता. अगदीच अल्प वयात म्हणजे वय वर्ष ९ ते १२ पर्यंत जवळपास चार वर्ष तिच्या भावानं तिच्यावर अत्याचार केले. डोळ्यात अश्रू आणून ओप्रा म्हणाली, त्या वयात बलात्कार म्हणजे काय असतं हे देखील मला माहीत नव्हतं. मला हा शब्द माहीतही नव्हता किंवा सेक्स काय असतं याचा जराही अंदाज नव्हता. मुलं कशी होतात हे माहीत नव्हतं किंवा त्यावेळी माझ्यासोबत जे होत होतं ते काय होतं हे सुद्धा माहीत नव्हतं. ओप्रा विन्फ्रेनं यावेळी आणखी एक धक्कादायक खुलासा केला तो म्हणजे तिच्या आईच्या बॉयफ्रेंडनं सुद्धा तिचं लैंगिक शोषण केलं होतं. ती म्हणाली, 'मी त्यावेळी स्वीकारलं होतं की, पुरुषांच्या या जगात कोणतीही मुलगी अजिबात सुरक्षित नाहीये.' ओप्रा विन्फ्रेनं शो 'द मी यू कान्ट सी' प्रिन्स हॅरीसोबत मिळून सुरू केला आहे. या शोमध्ये हे दोघंही लोकांचं मानसिक आरोग्य, नैराश्य, एकटेपणा, दुःख या विषयांवर चर्चा करणार आहेत. या शोची सुरुवात ओप्रानं स्वतःच्याच आयुष्यापासून केली आहे. ओप्रा विन्फ्रेनं आपल्या बालपणी एवढ्या सर्व गोष्टी सहन करूनही आपल्या जीवनाची नवी सुरुवात केली होती. तिनं वयाच्या १७ व्या वर्षीच एक ब्यूटी पीजेंट जिंकलं होतं. त्यानंतर तिनं लोकल चॅनेलमध्ये अँकरिंग सुरू केलं आणि नंतर स्वतःची प्रॉडक्शन कंपनी सुरू केली. १९८६ साली ओप्रा विन्फ्रेनं पहिल्यांदा नॅशनल टेलिव्हिजनवर 'द ओप्रा विन्फ्रे शो' होस्ट केला.
from Marathi Bollywood News, Marathi Cinema News https://ift.tt/3oLkQ7u
