मुंबई: बॉलिवूड अभिनेता रणबीर कपूरची बहीण आणि दिवंगत अभिनेता ऋषी कपूर यांची मुलगी बॉलिवूडपासून दूर आहे. स्टार किड असूनही अभिनयाचं करिअर न निवडता रिद्धिमा ज्वेलरी डिझायनर झाली. बॉलिवूडमधील घराणेशाही आणि त्यावरून स्टार किड्सवर सतत होणारी टीका यावर आता रिद्धिमानं आपली प्रतिक्रिया दिली आहे. 'ऋषी कपूर आणि नितू कपूर यांची मुलं असल्यानं आम्ही नेहमीच सर्वांचं लक्ष आमच्याकडे वेधलं गेलं. पण मला मिळालेलं यश हे त्यामुळे नक्कीच नाही' असं रिद्धिमाचं म्हणणं आहे. एका वेबसाइटला दिलेल्या मुलाखतीत रिद्धिमान सांगितलं, 'व्यक्तीचं कामच त्याला त्याची ओळख मिळवून देतं. लोक नेहमीच माझ्यावर मला बालपणापासून मिळालेल्या सुविधांवरून आरोप करताना मी पाहिलेत. मी काय काम करते हे त्यांच्यासाठी महत्त्वाचं नाहीये.' रिद्धिमा कपूर सहानीनं बॉलिवूडकडे न वळता ज्वेलरी डिझाइनमध्ये आपलं शिक्षण पूर्ण केलं आणि तेच तिनं करिअर म्हणून निवडलं. रिद्धिमा म्हणते, 'सुविधा काय असतात? आम्ही या नावासोबत जन्माला आलो, मोठे झालो आणि आता आम्हाला त्याची सवय झाली आहे. नक्की आमच्या कुटुंबाच्या नावामुळे आम्ही बालपणापासून चर्चेत राहिलो. पण जेव्हा तुम्ही तुमचा वेगळा ब्रँड सुरू करता तेव्हा काही काळानंतर तो ब्रँड स्वतःची वेगळी ओळख निर्माण करतो. त्यावेळी फॅमिलीच्या नावाची गरज राहत नाही.' रिद्धिमा पुढे म्हणाली, 'जर मी अभिनेत्री झाले असते तर लोक म्हणाले असते, हे तर होणारच होतं कारण हिची फॅमिलीच बॉलिवूडमध्ये काम करत आली आहे. रणबीर, करिना, करिश्मा स्टार किड्स आहे. पण आज त्यांचं काम बोलतं. त्यांना जे यश मिळालं आहे ते त्यांच्या स्वतःच्या कौशल्यामुळे मिळालं आहे. ते सुपरस्टार आहेत कारण ते जे करत आहेत ते उत्तम आहे. स्टार किड्स आहेत तर त्यांनी काही करू नये का? त्यांचीही काही स्वप्न असतात.' रिद्धिमा कपूरचं लग्न उद्योगपती भरत साहनीशी झालं आहे. रिद्धिमा स्टार किड्स असूनही तिनं बॉलिवूडमध्ये पदार्पण केलं नाही. या ऐवजी तिनं वेगळं करिअर निवडत ज्वेलरी डिझाइनला प्राधान्य दिलं.
from Marathi Bollywood News, Marathi Cinema News https://ift.tt/3wiGtye
