मुंबई: करोनाच्या दुसऱ्या लाटेत भारताचं प्रचंड नुकसान झालं आहे. रुग्णसंख्या दिवसेंदिवस वाढताना दिसत आहे. मृतांच्या आकड्यांमध्ये रोज भर पडतेय आणि दुसरीकडे औषधं, ऑक्सिजन, बेड अशा वैद्यकीय सुविधांचा आभाव लोकांचा जीव जाण्यास कारणीभूत ठरतोय. सरकारच आरोग्य सेवांचं व्यवस्थापन पूर्णपणे अपयशी ठरल्यानंतर एकीकडे त्यांच्यावर सोशल मीडियाच्या माध्यमातून जोरदार टीका होताना दिसत आहे. दुसरीकडे काही लोक आणि केंद्र सरकारला आपला पाठिंबा दर्शवत आहेत. अशात आता या वादात अभिनेते आणि फिल्म अँड टेलिव्हिजन इन्स्टिट्युटचे (एफटीआयआय) माजी अध्यक्ष यांनीही उडी घेतली आहे. त्यांचं एक ट्वीट सध्या सोशल मीडियावर जोरदार व्हायरल होताना दिसत आहे. अभिनेता गजेंद्र चौहान यांनी आपल्या एका ट्वीटमध्ये पंतप्रधान नरेंद्र मोदींचं समर्थन करत त्यांना आपला पाठिंबा दिला आहे. गजेंद्र चौहान यांनी आपल्या ट्वीटमध्ये पंतप्रधान मोदींचा उल्लेख करताना लिहिलं, 'गाय आपल्या मालकावर नाराज असली तरी ती रुसून खाटीकाच्या घरी जात नाही. त्यामुळेच आम्ही मोदींसोबतच आहोत.' आपल्या ट्वीटमधून गजेंद्र चौहान यांनी पंतप्रधान नरेंद्र मोदी आणि केंद्र सरकारला जाहिर पाठिंबा दिला आहे. पण त्यांच्या या ट्वीटनंतर अनेकांनी चौहान यांच्यावर टीका केल्याचं दिसत आहे. गजेंद्र चौहान यांच्या या ट्वीटवर अनेकांनी आपल्या प्रतिक्रिया दिल्या आहेत. गजेंद्र चौहान यांच्या ट्वीटवर प्रतिक्रिया देताना काँग्रेस नेते आचार्य प्रमोद यांनी लिहिलं, 'गाय आपली माता असते. पण तिचा मालक कोण असू शकतो?' तर अभिनेता केआरकेनं यावर प्रतिक्रिया देताना लिहिलं, 'तुम्ही मोदींवर नाराज का आहात? त्यांनी असं आता काय चुकीचं केलं आहे?' असा प्रश्न विचारला आहे. याशिवाय अनेक युझर्सनी सुद्धा गजेंद्र चौहान यांच्या ट्वीटवर प्रतिक्रिया देत टीका केली आहे. जीनत नावाच्या एक युझरनं लिहिलं, 'तुम्ही मोदींसोबत आहात हा तुमचा भ्रम आहे. खरं तर मोदींना त्यांच्या पदावर प्रेम आहे आणि तुम्हाला भविष्याची चिंता आहे. तुम्ही जनतेला गाय म्हणत आहात तर खाटीक कोण आहे, हे आपण स्पष्ट करावं. लोक इथे तडफडत मरत आहेत हे तुम्हाला फार महत्वाचं वाटत नाही का? हे तुमच्या भविष्यासाठी ग्रहण ठरणार लक्षात ठेवा.' तसेच आणखी एका युझरनं लिहिलं, 'तुम्ही सगळे आंधळे भक्त आहात. तुमचे हिंदू सम्राट हिंदूंची रक्षा करू शकले नाहीत. आता सर्व स्मशानात जात आहेत.' दरम्यान गजेंद्र चौहान यांचं हे ट्वीट सोशल मीडियावर बरंच व्हायरल झालं असून २,६०० पेक्षा जास्त वेळा रिट्विट करण्यात आलं आहे. तर १२ हजार पेक्षा जास्त लोकांनी ते लाईक केलं आहे.
from Marathi Bollywood News, Marathi Cinema News https://ift.tt/3tOXxuo
