मुंबई : '' हा कार्यक्रम आणि वाद हे समीकरण चांगलेच दृढ झाले आहे. गेल्या काही दिवसांपासून हा कार्यक्रम विविध कारणांमुळे चर्चेत आला आहे. काही दिवसांपूर्वी कार्यक्रमात ख्यातनाम गायक किशोर कुमार यांच्यावर विशेष भाग प्रसारित झाला होता. कार्यक्रम प्रसारित झाल्यानंतर किशोर कुमार यांचा मुलगा अमित कुमार यांनी या कार्यक्रमासंदर्भात एक खळबळजनक खुलासा केला होता. त्यांनी सांगितले की, ' या कार्यक्रमात मला जे सांगण्यात आले तेच मी केले. मला कार्यक्रमात सहभागी होऊन सर्वांचे कौतुक करा असे सांगितले होते. मला सांगितले गेले की या कार्यक्रमातील स्पर्धक जे काही गातील त्याचे कौतुक करा आणि त्यांना प्रोत्साहन द्या. कारण हा कार्यक्रम किशोदांना आदरांजली वाहण्यासाठी केला जात आहे.' त्यानंतर या कार्यक्रमाचा सुत्रधार याने अमित कुमार यांची मस्करी केली होती. परंतु ही गोष्ट इतक्यावरच संपली नाही तर त्यानंतर इंडियन आयडल कार्यक्रमाच्या पहिल्या सिझनचा विजेता अभिजीत सावंतनेदेखील कार्यक्रमात होणारा ड्रामा आणि सहभागी स्पर्धकांबाबत त्याचे मत व्यक्त केले होते. त्यामुळे गेल्या काही दिवसांपासून या कार्यक्रमाची सातत्याने चर्चा होत आहेत. इतकेच नाही तर सोशल मीडियावरही सातत्याने कार्यक्रमावर टीका केली जात आहे. अमित कुमार यांच्याशिवाय गायक कुमार सानू, रुप कुमार राठोड, अनुराधा पौडवाल हे देखील पाहुणे म्हणून सहभागी झाले होते. त्यावेळी कुमार सानू यांनी एका स्पर्धकाचे गाणे सादर झाल्यानंतर त्याचे कौतुक केले. त्यानंतर आदित्यने कुमार सानू यांना एक प्रश्न विचारला. या प्रश्नामुळे सोशल मीडियावर आदित्यला युझर्सने ट्रोल केले. काय विचारले होते आदित्यने कार्यक्रमाचा सूत्रसंचालक आदित्यने कुमार सानू यांच्यासहीत या कार्यक्रमात पाहुणे म्हणून आलेल्या रुपकुमार राठोड आणि अनुराधा पौडवाल यांना विचारले की, 'तुम्ही स्पर्धकांचे जे कौतुक करत आहात, ते मनापासून करत आहात की आमच्या टीमने तुम्हाला हे कौतुक करायला सांगितले म्हणून तुम्ही करत आहात?' असा प्रश्न विचारून त्याने अमित कुमार यांची अप्रत्यक्षपणे खिल्ली उडवली आहे. त्यामुळे त्याला सोशल मीडियावर युझर्सने खूपच ट्रोल करायला सुरुवात केली आहे. त्याचा हा प्रश्न अतिशय बेजबाबदारपणाचा आणि उद्धट असल्याचे मत अनेक युझर्सने व्यक्त केले आहे. दरम्यान, आदित्यला ट्रोल करण्याबरोबरच या कार्यक्रमातील स्पर्धक शनमुखप्रिया ही देखील वादात अडकली आहे. तिला या कार्यक्रमातून बाहेर काढून टाकण्याची मागणी प्रेक्षक करत आहेत. शनमुखप्रियाने आशिष कुलकर्णीसोबत गाणे सादर केले. परंतु हे गाणे प्रेक्षकांना अजिबात आवडले नाही. गाणं गाणे म्हणजे किंचाळणे नाही, असे मत अनेक प्रेक्षकांनी व्यक्त केले आहे. एका प्रेक्षकाने ट्वीट करत लिहिले की, 'कार्यक्रमातून नचिकेत आणि सिरीशा यांच्यासारखे स्पर्धक बाहेर जातात त्याबद्दल काय बोलायचे. परंतु शनमुखप्रिया आणि किंचाळणारी कंपनी अजूनही या कार्यक्रमात कसे आहेत? ' इंडियन आयडल १२ या कार्यक्रमात किशोर कुमार यांच्यावर विशेष भाग प्रसारित झाला तेव्हापासून सातत्याने वादात अडकला आहे. जेव्हा अमित कुमार यांनी या कार्यक्रमाच्या निर्मात्यांच्या संदर्भातील सत्य उघड केले. तेव्हा अमितकुमार म्हणाले, 'या भागासंदर्भातील माझी नाराजी मी व्यक्त केली. परंतु किशोर कुमार यांच्यासारखे कुणीच गाऊ शकत नाही. त्यांचे व्यक्तिमत्त्व उत्तुंग होते. आजच्या युवापिढीला त्यांच्याबद्दल काहीच माहिती नाही. त्यांना फक्त 'रुप तेरा मस्ताना' आणि आराधनाबद्दलच माहिती आहे.' अमित कुमार यांनी आपले मत व्यक्त केल्यानंतर आदित्य नारायण म्हणाला, 'अमितजी अनेकदा आमच्या कार्यक्रमात पाहुणे म्हणून आले आहेत. त्यावेळी त्यांनी आमच्या कार्यक्रमाचे, स्पर्धकांचे आणि टीमचे भरभरून कौतुक केले आहे. इतकेच नाही तर या भागातही त्यांनी किशोरकुमार यांचे काही व्यक्तिगत किस्से, आठवणी आम्हाला सांगितल्या. जर त्यांना हा कार्यक्रम आवडला नव्हता तर त्यांनी चित्रीकरणावेळीच तसेच सांगायला हवे होते. त्यांनी सूचना केल्या असत्या तर त्या आम्हाला ते नक्कीच आवडले असते आणि त्यांच्या सुचनांनुसार आम्ही काही बदलही त्यात घडवून आणले असते.'
from Marathi Bollywood News, Marathi Cinema News https://ift.tt/3hTf5D5
