अधिकृतपणे जाहीर झालं, की सांगेन; सोनाली कुलकर्णी चाहत्यांना देणार धक्का?

‘’ या चित्रपटानं यश मिळवल्यानंतर अभिनेत्री आणखी एका ऐतिहासिक विषयावरच्या चित्रपटात झळकणार आहे. महाराणी ताराबाईसाहेब यांच्यावरील या चित्रपटाची ती तयारी करत आहे. काही दिवसांपूर्वी जम्मू इथं तिनं चित्रपटाचं चित्रीकरण केलं. लवकरच ती सीरीजमध्ये दिसणार आहे आणि निर्माती म्हणून काही गोष्टी ती प्रेक्षकांना सांगण्यासाठी सज्ज होत आहे. ‘लग्नानंतर अभिनेत्यांना करिअर सुरू ठेवणार का, वगैरे प्रश्न विचारले जात नाहीत, मग अभिनेत्रींनाच का, हा दृष्टिकोन बदलण्याची गरज आहे,’ असंही सोनाली म्हणते. मिळाला ट्रॅव्हल पार्टनरसोनाली नुकतीच मालदिव इथं सुट्टीसाठी गेली होती. आता सोलो भ्रमंती थंबणार का, असं विचारताच ती म्हणते, ‘हो, आता मी आणि नवरा दोघं मिळून भटकणार आहोत. सोबतीनं आमचा भ्रमंतीचा छंद आम्ही अनुभवतो आहे. आम्ही डेट करायला सुरुवात केली तेव्हाही दरवर्षी त्याच्या वाढदिवसानिमित्तं एखादा नवा देश पाहायचा असं ठरवलं होतं. त्यामुळे पोर्तुगाल, मॉरिशस, दुबई अशी भ्रमंती झाली. आम्हाला हायकिंग त्यातही ट्रेकिंग आवडतं. नेचर ट्रेल्स आवडतात. भ्रमंतीही उत्स्फूर्त असावी असं मला वाटतं. शॉपिंग ही गोष्ट बाजूला ठेवत भटकंती करता येतेय हे मला छान वाटतं. कुणाल अभ्यास करून भटकंती करण्याला प्राधान्य देतो. मला आता आयुष्यभरासाठी ट्रॅव्हलिंग पार्टनर मिळाला आहे.’ विश्वास आणि विनंतीही... गेल्या दोन वर्षांत मनोरंजनसृष्टीचं अतोनात नुकसान झालं. पडद्यामागच्या कलाकारांचे हाल झाले. ही परिस्थिती सुधारण्यासाठी एकत्र प्रयत्न गरजेचे आहेत, असं सोनाली सांगते. ती म्हणाली, ‘प्रेक्षकांनीही आता विचार करण्याची गरज आहे. कलाकार आणि प्रेक्षक एकत्र आले, तर इंडस्ट्री तगेल. अवघड काळातही चित्रपटसृष्टी प्रेक्षकांसोबत उभी राहिली. समाजासाठीच्या कृतज्ञतेतून मदतीचे हात जोडले गेले. आता प्रेक्षकांची आणि स्थिरावलेल्या सगळ्यांची ही जबाबदारी आहे. मनोरंजनसृष्टीत काम करणारी प्रत्येक व्यक्ती जगली, टिकली पाहिजे. सीरीज, चित्रपट आणि नाटक याशी जडलेली प्रत्येक व्यक्ती टिकण्यासाठी आता प्रेक्षकांचा पुढाकार गरजेचा आहे. काळजी घेत आणि सुरक्षेचे नियम पाळून पुन्हा सगळं सुरू व्हायची वाट आमच्यासह प्रेक्षकही पाहत आहेत. गोष्टी परत पहिल्यासारख्या होण्यासाठी तुमची मोठी मदत लागणार आहे. प्रेक्षक इंडस्ट्रीच्या पाठीशी ठाम उभे राहतील असा विश्वास आणि विनंतीही मी करते.’ प्रवास १४ वर्षांचासोनालीच्या करिअरला १४ वर्षं पूर्ण होत आहेत. अभिनेत्री म्हणून उत्तमोत्तम भूमिका साकारताना आलेल्या अनुभवाबाबत ती म्हणते, ‘या प्रवासात माझ्यात फार काही फरक पडला नाही. अभिनेत्री म्हणून मी अधिकाधिक प्रगल्भ होत गेले. प्रत्येक जण परिस्थिती, अनुभव, यशापयश आणि चुका यातून शिकत जातो. करिअरला १४ वर्षं पूर्ण झाली. या काळात मी खूप काही शिकले. या सगळ्याकडे एक व्यक्ती म्हणून पाहिलं, तर बदल मोठा आणि सकारात्मक आहे. करिअरची सुरुवात झाली, तेव्हा १६ वर्षांची होते. ‘हा खेळ संचिताचा’ ही मालिका मी केली. लहान वयात इथं प्रवेश केल्यानं मनोरंजनसृष्टीविषयी फारशी माहिती नव्हती. ती शून्यातून सुरुवात होती. हा प्रवास टीनएजर ते परिपक्व स्त्री असा घडला. अभिनयाचं प्रशिक्षण नाही, कुणी गॉडफादर नाही, नाटक केलं नाही. चुकांमधूनही शिकता आलं. कुटुंबाच्या पाठिंब्यानं टिकून राहिले. स्वतःवर लक्ष देत राहणं मला महत्त्वाचं वाटतं, सगळीकडे दिसण्याचा अट्टहास म्हणूनच नाही.’ निर्माती अप्सरा...चाहत्यांची लाडकी अप्सरा लवकरच निर्माती होणार असं कळतंय. त्याबद्दल सोनाली म्हणाली, ‘लॉकडाउनमध्ये बरंच काही वाचत होते. मित्र आणि लाइन प्रोड्यूसर अमोल भगतनं एक पुस्तक वाचायला दिलं. हृषिकेश गुप्ते यांचं ‘हाकामारी’ नावाचं हे पुस्तक आहे. निर्मितीत पदार्पण करायचं मनात होतं. योग्यवेळी आणि अनुभवसमृद्ध झाल्यावर काही करू, असं मनात होतं. मी रेडिओ टेलिव्हीजन फिल्म प्रॉडक्शन बॅचलर्स कोर्स-स्पेशलायझेशन कोर्स केला होता. हे पुस्तक वाचल्यावर आवडलं. ही गोष्ट इतरांना सांगावी, असं मनातून वाटतं. अभिनेत्री म्हणून यात दिसेन, की नाही माहीत नाही. गोष्टीच्या निर्मितीचा भाग व्हायला आवडेल या विचारातून ती कशी सांगायची याची जुळवाजुळव सुरू झाली. स्वतः गुप्ते स्क्रीन प्ले आणि संवाद लिहीत आहेत. आता हे सगळं प्राथमिक अवस्थेत आहे. सगळं पक्कं झालं, की या भूमिकांमध्ये कोण दिसतंय, हे समीर विद्वांस ठरवेल.’ मराठी कलाकारही... अनेक मराठी कलाकार बॉलिवूडमध्ये चमकत आहेत. सोनालीनंही ‘ग्रँड मस्ती’ हा चित्रपट केला. प्रादेशिकतेच्या चौकटीतून बाहेर पडत मराठी कलाकारही ग्लोबल प्रोजेक्टमध्ये दिसू लागले आहेत. त्याबद्दल विचारताच सोनाली म्हणाली, ‘मी अशा एका कलाकृतीत काम करत आहे. आता त्याचे तपशील सांगू शकत नाही. ओटीटीवर काम सुरू आहे. गेली काही वर्षं मी हे माध्यम टाळत होते, कारण माझी स्वतःची काही तत्त्वं आहेत. मी स्वतःसाठी बंधनं ठरवून घेतलेली आहेत. मला जे पटतंय आणि तत्त्वं न टाळता जे करता येईल, तेच करायचं होतं. यंदा ते घडून आलं. त्याविषयी नक्कीच बोलायचं आहे. अधिकृतपणे ते जाहीर झालं, की सांगीन. ओटीटी प्रोजेक्ट आहे, एवढंच सध्या सांगू शकते.’ लग्नानंतर काम करत राहणार का, असं इंडस्ट्रीतूनही लोक विचारतात. मला हे हास्यास्पद वाटतं. प्रत्येक व्यक्तीच्या करिअरचा प्रवास, परिस्थिती, गरज वेगळी असते. एकच निकष ठामपणे प्रत्येकाला लावता येत नाही. ही मानसिकताच विचित्र आहे. - सोनाली कुलकर्णी मूर्तीकारांना पाठिंबा देऊयात... सोनाली गणेशोत्सव साजरा करताना दरवर्षी पर्यावरणपूरक उत्सवाचा संदेश देते. घरी भावानं साकारलेल्या गणपतीची रंगरंगोटी करते. ती म्हणते, ‘यंदाही भाऊ मूर्ती घडवेल आणि मी रंगरंगोटी करणार आहे. अनेकांनी आतापासूनच विचारणा केली आहे. नैसर्गिक गोष्टींतून साकारलेली गणेशमूर्ती माझ्याकडे आली आहे. अनेक संस्था आहेत. घरातूनच व्यवसाय करणारी मंडळी आहेत. त्यांना आणि मूर्तीकारांना यंदा पाठिंबा देऊयात. आधी करोना आणि आताच्या महापूरानं खूप नुकसान झालं आहे. त्यांना सावरूयात.

from Marathi Bollywood News, Marathi Cinema News https://ift.tt/3sM4qxD