मुंबई : देशातील सर्वात लोकप्रिय कार्यक्रमांमध्ये 'इंडियन आयडल' कार्यक्रमाचा समावेश आहे. या कार्यक्रमाचा ग्रँड फिनाले रविवारी मोठ्या जल्लोषात संपन्न झाला. इंडियन आयडलच्या १२ व्या पर्वामध्ये पनवदीप राजन ने बाजी मारत विजेतेपद मिळवले. विजेता ठरलेल्या पवनदीपला ट्रॉफीबरोबरच २५ लाख रुपये रोख आणि आलिशान गाडी बक्षिस म्हणून मिळाली आहे. यंदाच्या ‘इंडियन आयडल १२’ च्या अंतिम भागामध्ये , मोहम्मद दानिश, शनमुखप्रिया, , निहाल आणि सायली कांबळे या स्पर्धकांमध्ये विजेतेपदासाठी चांगलीच चुरस होती. इंडियन आयडलच्या १२ व्या पर्वाचा ग्रँड फिनाले तब्बल १२ तास चालला होता. या १२ तासांमध्ये कार्यक्रमात कार्यक्रमाचे परीक्षक सोनू कक्कर, अनु मलिक आणि हिमेश रेशमिया हे तर सहभागी झाले होते. याशिवाय जावेद अली, मनोज मुंतशीर, उदित नारायण आणि कुमार सानू सारखे अनेक दिग्गजही पाहुणे म्हणून उपस्थित होते. या सर्वांनी कार्यक्रमातील स्पर्धकांसोबत धम्माल केली. सर्वच स्पर्धकांनी आणि आधीच्या पर्वातील विजेते देखील सहभागी झाले होते. या सर्वांनी मिळून अतिशय सुंदर गाणी सादर केली. रात्री १२ च्या ठोक्याला इंडियन आयडलच्या १२ व्या पर्वाचा विजेते म्हणून पवनदीप राजनचे नाव घोषित करण्यात आले. त्यानंतर सर्वांनी एकच जल्लोष करत पवनदीपचे अभिनंदन केले. 'इंडियन आयडलच्या मंचावर कलाकारांना जो सन्मान, जी प्रसिद्धी मिळते त्याची तुलना अन्य कोणत्याही कार्यक्रमाशी होऊ शकत नाही. या संपूर्ण प्रवासात आम्ही विविध गाणी गायली आणि परीक्षकांनी आम्हाला योग्य मार्गदर्शन केले. इथे मला खूप काही शिकायला मिळाले. आता मी पार्श्वगायनासाठी पूर्णपणे तयार आहे.' अशा शब्दांत पवनदीपने आपल्या भावना व्यक्त केल्या. अरुणिता कांजिलाल आणि सायली कांबळे या दोघींनी अनुक्रमे दुसरा आणि तिसरा क्रमांक मिळाला. त्यांना प्रत्येकी ५ लाख रुपयांचा धनादेश बक्षिस म्हणून देण्यात आला. मोहम्मद दानिश आणि निहाल तौरो हे चौथ्या आणि पाचव्या क्रमांकावर होते. या दोघांना ३ लाख रुपयांचा धनादेश देण्यात आला. कोण आहे पवनदीप पवनदीप हा उत्तराखंडमधील चंपावत इथला आहे. लहानपणापासूनच त्याला गाण्याची आवड होती. त्याची ही आवड लक्षात घेऊन त्याचे वडील सुरेश राजन आणि काका सतीश राजन यांनी लहानपणापासूनच त्याला संगीत शिकवायला सुरुवात केली. पवनदीपचे आजोबा रती राजन हेसुद्धा प्रसिद्ध लोकगायक होते. पवनदीपची बहीण ज्योतीदीपसुद्धा गायिका आहे. पवनदीपला लहानपणापासूनच तबला वादनाची आवड होती. त्याची ही आवड पाहून वडिलांनी त्याला विविध वाद्य शिकण्यासाठी प्रोत्साहित केले. पवनदीपने वयाच्या अवघ्या दुसऱ्या वर्षी तबला वादनाचा रेकॉर्ड केला होता. पवनदीपने याआधीही गायनाचा एक रिअॅलिटी शो जिंकला होता. २०१५ मध्ये तो 'द वॉईस ऑफ इंडिया'चा विजेता ठरला होता. 'इंडियन आयडॉल १२'च्या सुरुवातीपासूनच पवनदीपला प्रबळ दावेदार मानले गेले होते.
from Marathi Bollywood News, Marathi Cinema News https://ift.tt/2XxnUKL
