मुंबई : छोट्या पडद्यावरील सर्वात लोकप्रिय आणि वादग्रस्त असा कार्यक्रम लवकर प्रेक्षकांचे मनोरंजन करण्यासाठी दाखल होत आहे. हा कार्यक्रम म्हणजे बिग बॉस मराठी ३. हा कार्यक्रम येत्या रविवारपासून म्हणजे १९ सप्टेंबर २०२१ पासून कलर्स वाहिनीवरून रोज रात्री साडेनऊ वाजता तर त्याआधी वूट ओटीटीवरून संध्याकाळी सात वाजता प्रसारित होणार आहे. कार्यक्रमाबद्दल आता प्रेक्षकांची उत्सुकता शिगेला पोहोचली आहे. बिग बॉस मराठी ३ कार्यक्रमात कोण कोण कलाकार सहभागी होणार आहेत हे अद्याप गुलदस्त्यातच आहे. दरम्यान या कार्यक्रमात मराठीतील अनेक आघाडीच्या कलाकारांची नावे चर्चेत होती. परंतु त्यांनी या कार्यक्रमात ते सहभागी होणार नसल्याचे सांगितले....कोण आहेत हे कलाकार जाणून घेऊ या त्यांच्याबद्दल... झी मराठी वाहिनीवरील 'काहे दिया परदेस' या मालिकेमुळे अभिनेता ऋषी सक्सेनाला घराघरात ओळख मिळाली. बिग बॉस मराठी ३ कार्यक्रमात ऋषी सहभागी होणार असल्याची चर्चा कार्यक्रम जाहीर झाल्यापासून सुरू झाली. परंतु ऋषीने इन्स्टाग्रामवरून एका चाहत्याने यासंदर्भात विचारलेल्या प्रश्नाला उत्तर देताना बिग बॉस मराठी ३ मध्ये सहभागी होणार नसल्याचे स्पष्टपणे सांगितले. यामुळे कार्यक्रमातील त्याच्या सहभागाला पूर्णविराम मिळाला. केतकी चितळे बिग बॉस मराठी ३ ची घोषणा होण्याआधीपासूनच अभिनेत्री केतकी चितळे कार्यक्रमात स्पर्धक म्हणून सहभागी होणार अशी चर्चा रंगली होती. अर्थात केतकीने ती या कार्यक्रमात सहभागी होणार नसल्याचे ठामपणे सांगितले. या संदर्भात ई टाइम्सला सांगितले की, मी बिग बॉस मराठी ३ कार्यक्रमात सहभागी होणार नाही. दरवर्षी जेव्हा या कार्यक्रमाची घोषणा होते तेव्हा माझ्या नावाची का चर्चा होते हे मला अद्याप समजलेले नाही. मी पुन्हा एकदा सांगते की मी बिग बॉस मराठी ३ मध्ये सहभागी होणार नाही.' गंगा बिग बॉस मराठी ३ कार्यक्रमाची घोषणा झाली तेव्हा ट्रान्सजेंडर गंगा कार्यक्रमात स्पर्धक म्हणून सहभागी होणार असल्याची चर्चा सुरू झाली. याबाबत ई टाइम्सने तिच्याशी संपर्क साधला असता तिने सांगितले की, ' मी बिग बॉस मराठीच्या आगामी पर्वामध्ये सहभागी होणार नाही. मला या कार्यक्रमात सहभागी व्हायला आवडले असते. परंतु सहभागासाठी कार्यक्रमाच्या निर्मात्यांकडून मला संपर्क साधण्यात आलेला नाही. त्यामुळे या कार्यक्रमाच्या या पर्वात तरी मी सहभागी होत नाही...' सुयश टिळक 'शुभमंगव ऑनलाईन' या मालिकेत शंतनू सदावर्ते ही मुख्य भूमिका साकारणा-या सुयश टिळकचेही नाव स्पर्धक म्हणून चर्चेत होते. परंतु या चर्चांवर सुयशने एका पोस्टच्या माध्यमातून उत्तर दिले. त्याने या पोस्टमध्ये लिहिले होते की, 'शुभमंगल ऑनलाईन या मालिकेचा प्रवास लवकरच संपत असून माझा एक नवीन प्रवास सुरू होणार आहे. हा नवीन प्रवास बिग बॉस मराठीच्या घराकडे जाणारा नाही. मी त्यात सहभागी होत असल्याच्या बातम्यांवर विश्वास ठेवू नका...' सुयशच्या या पोस्टमुळे त्याच्या बिग बॉस ३ मधील सहभागावर पूर्णविराम लागला आहे. छोट्या पडद्यावरील सर्वात वादग्रस्त असूनही बिग बॉस कार्यक्रम लोकप्रिय आहे. हिंदी बरोबरच मराठी बिग बॉस कार्यक्रम प्रेक्षक मोठ्या आवडीने बघतात. प्रचंड लोकप्रियता लाभलेल्या या कार्यक्रमात अनेक कलाकारही सहभागी होण्यास उत्सुक असतात. याला मात्र अभिनेत्री अपूर्वा नेमळेकर अपवाद आहे. रात्रीस खेळ चाले या मालिकेच्या तिस-या पर्वामध्ये अपूर्वा नेमळेकर काम करते आहे. ती या मालिकेत शेवंता ही भूमिका साकारत आहे. या मालिकेमुळे अपूर्वा लोकप्रियता मिळाली आहे. सोशल मीडियावर प्रेक्षकांच्या प्रश्नांना उत्तर देताना तिने बिग बॉस मराठीमध्ये सहभागी होण्याविषयी भाष्य केले. अपूर्वा म्हणाली, 'अजिबातच नाही. मी बिग बॉस मराठीमध्ये सहभागी होत नाही. मी कलाकार आहे. मला विविध भूमिका साकारायला जास्त आवडतात...'
from Marathi Bollywood News, Marathi Cinema News https://ift.tt/3EnaUbn
