मुंबई- 'बालिका वधू' मधून लोकप्रियता मिळवणारा छोट्या पडद्यावरील अभिनेता याचं गुरुवार दि. २ सप्टेंबर रोजी हृदयविकाराच्या झटक्याने निधन झालं. सिद्धार्थच्या मृत्यूने अनेकांना मोठा धक्का बसला. सिद्धार्थच्या चाहत्यांना अजूनही या गोष्टीवर विश्वास ठेवणं कठीण जात आहे. आज ३ सप्टेंबर रोजी सिद्धार्थच्या पार्थिव देहावर अंत्यसंस्कार करण्यात येणार आहेत. त्यापूर्वी सिद्धार्थचा देह अंतिम दर्शनासाठी अंधेरी येथील लोखंडवालामधील सेलिब्रेशन क्लब येथे ठेवण्यात येणार आहे. गुरुवारी सिद्धार्थच्या मृत्यूनंतर त्याचा मृतदेह पोलिसांकडून शवविच्छेदन प्रक्रियेसाठी पाठवण्यात आला होता. आज ११ वाजण्याच्या आसपास सिद्धार्थचा मृतदेह त्याच्या कुटुंबियांच्या स्वाधीन केला जाणार आहे. कूपर इस्पितळातून सिद्धार्थचा मृतदेह लोखंडवाला येथे अंतिम दर्शनासाठी नेण्यात येणार आहे. त्यानंतर सिद्धार्थच्या पार्थिवावर ब्रह्मकुमारी समाजाच्या प्रथांनुसार अंतिम संस्कार करण्यात येणार आहेत. सिद्धार्थचे आई- वडील ब्रह्मकुमारी समाजासोबत जोडलेले असल्याने त्या परंपरेनुसार सिद्धार्थवर अंत्यसंस्कार करण्यात येणार आहेत. सिद्धार्थचा मृतदेह अंतिम दर्शनासाठी नेण्यापूर्वीच त्याच्या घरी अनेक कलाकारांनी हजेरी लावली आहे. सिद्धार्थला शेवटचं पाहता यावं यासाठी बिग बॉसमधील त्याचे अनेक मित्र कलाकार यापूर्वीच सिद्धार्थच्या घरी पोहोचले आहेत. त्यात राहुल वैद्य, दिशा परमार, अली गोनी, शहनाज गिल हीचा भाऊ, गौहर खान या कलाकारांचा समावेश आहे. सिद्धार्थला बुधवारी रात्रीपासून अस्वस्थ वाटत असल्याने इस्पितळात दाखल करण्यात आलं. परंतु, इस्पितळात डॉक्टरांनी सिद्धार्थला मृत घोषित केलं. मृत्यूच्या वेळेस शहनाज गिलदेखील सिद्धार्थच्या सोबत होती अशी माहिती सूत्रांकडून मिळत आहे.
from Marathi Bollywood News, Marathi Cinema News https://ift.tt/3gYHfeu
