मुंबई टाइम्स टीम मनोरंजनसृष्टीत बहुतांश सर्व टीव्ही मालिकांच्या आणि काही चित्रपटांच्या चित्रीकरणाला गेल्या दीड महिन्यापासून सुरुवात झाली आहे. योग्य नियम पाळून आता काम होत आहे. पण, करोनाच्या पार्श्वभूमीवर रोमँटिक, जवळीक असणारे सीन करायचे कसे? हा एक मोठा प्रश्न निर्मात्यांसमोर उभा आहे. मात्र, 'करोनाला घाबरुन रोमँटिक सीन टाळता येणार नाही', असं मत अभिनेत्री सुरभी चंदनानं व्यक्त केलं आहे. शिवाय शूटिंग करताना आम्ही सॅनिटायझरचा योग्य वापर करतोय, असा अनुभव तिनं सांगितला.अभिनेत्री सुरभीनं एकता कपूरच्या 'नागिन' या मालिकेतून छोट्या पडद्यावर पुनरागमन केलं आहे. या मालिकेच्या निमित्तानं एका मुलाखतीत प्रेमप्रसंग साकारताना येणारा अनुभव तिनं सांगितला. ती म्हणाली, 'करोनाला घाबरुन मालिकेतील रोमँटिक सीन चित्रित करणं थांबवता येणार नाही. उलट आपण योग्य काळजी घेऊन अधिक चांगल्या प्रकारे कसं काम करू याचा विचार करायला पाहिजे. आम्ही प्रत्येक सीन शूट करताना सेटवर योग्य ती काळजी घेतोय. सॅनिटायझरचा वापर करतोय. स्वच्छता राखतोय. दररोज आमचा सेट, खुर्च्या, खोल्या अगदी सर्व काही सॅनिटाईज केलं जातं. आमचं तापमान दररोज तपासलं जातं त्यानंतरच शूटिंगला सुरुवात होते.' दरम्यान, काही महिन्यांच्या प्रदीर्घ ब्रेकनंतर प्रेक्षकांच्या आवडत्या मालिका पुन्हा एकदा सुरू झाल्या आहेत. बहुतांश मालिकांचे नवेकोरे भाग पाहायला मिळताहेत. साडेतीन महिन्यांच्या ब्रेकनंतर आता मालिकेत बदल झाल्याचं प्रेक्षकांना जाणवणार आहे; किंबहुना तो फरक आतापर्यंत जाणवलाही असेल. मालिकांमध्ये काही जुने चेहरे जाऊन त्या जागी आता नव्या चेहऱ्यांची एंट्री झाली आहे. काहींनी करोनाच्या धोक्यामुळे तर काहींनी वैयक्तिक कारणास्तव मालिका सोडलीय.
from Marathi Bollywood News, Marathi Cinema News https://ift.tt/2FQ5Cvd
