सुरज कांबळे 'माझा होशील ना'मधला पिंट्या मामा असेल, 'अग्गंबाई सासूबाई'तली मॅडी असेल किंवा 'सुंदरा मनामध्ये भरली'तला सज्जनराव असेल...या सगळ्या व्यक्तिरेखा मालिकेतल्या मुख्य व्यक्तिरेखा नाहीत. पण, तरीही त्यांचा चाहतावर्ग मोठा आहे. त्यांना छोट्या पडद्यावर पाहणं, त्यांचे संवाद प्रेक्षकांना आवडतात. मालिकांमध्ये जितकं महत्वाचं स्थान मुख्य भूमिकांना आहे, तेवढंच या सहाय्यक भूमिकांनासुद्धा असल्याचं दिसून येतं. त्यांच्याशिवाय मालिकांचं पान हलत नाही हे नक्की. या कलाकार मंडळींची शैली, मालिकेत ते उडवून देत असलेली धमाल पाहून त्यांचासुद्धा एक वेगळा फॅन बेस सुरू झाला आहे. 'माझ्या नवऱ्याची बायको'मध्ये राधिकाचा मित्र म्हणून आलेला सौमित्र, म्हणजेच अभिनेता अद्वैत दादरकर काही काळापुरता असेल असं सुरुवातीला वाटलं होतं. पण, सौमित्रची भूमिका लोकांना इतकी आवडली की तो मालिकेचा एक महत्त्वाचा भाग झाला. या भूमिकेला अनेकांनी पसंती दर्शवली आणि त्याच्या लोकप्रियतेत भर पडली. लेखक-दिग्दर्शक म्हणून कार्यरत असलेल्या अद्वैत दादरकरनं यापूर्वीही भूमिका केल्या आहेत. पण, मालिकेतल्या या भूमिकेच्या निमित्तानं हजरजबाबी, विनोदी आणि कायम हसतमुख असलेला 'सौमित्र' अद्वैत दादरकरमुळे प्रेक्षकांच्या चांगलाच लक्षात राहिला आहे. एक वेगळी गोष्ट सांगणारी मालिका म्हणजे 'सुंदरा मनामध्ये भरली' या मालिकेतला 'सज्जन राव' हे पात्रच वेगळं आहे. खूप कमी वेळात या व्यक्तिरेखेनं प्रेक्षकांच्या मनामध्ये आपली जागा तयार केली आहे. लतिकाच्या प्रेमात पडलेलं हे पात्र अगदी लहान मुलांसारखं आहे. साधा, पण प्रेमात वेडा झालेला सज्जनराव संदेश उपशाम यांनी उत्तम साकारला आहे. संदेश उपशाम यांचा सज्जनराव अचानक मालिकेत दिसेनासा झाल्यावर तो परत येईल का तो कुठे गेला आहे असे प्रश्न प्रेक्षकांनी सोशल मीडियावर विचारले होते. आता पुन्हा एकदा सज्जनराव 'सुंदरा...'मध्ये दिसतोय. आता तर लतिकाचा बॉस म्हणून सज्जनराव मालिकेत पाहायला मिळतोय. सज्जनराव या पात्राच्या वागण्यात आणि बोलण्यात एक साधेपणा आणि भोळेपणा जाणवतो. हे पात्र आपलं प्रेम मिळवण्यासाठी काहीही करताना दिसणार आहे. मामा आणि भाचा यांच्यातले नातेसंबंध आणि त्या भाच्याची प्रेम कहाणी असा गाभा असलेली मालिका 'माझा होशील ना' या मालिकेतील प्रत्येक मामा वैशिष्ट्यपूर्ण आहे. विद्याधर जोशी, विनय येडेकर, सुनील तावडे आणि निखिल रत्नपारखी या कलाकारांनी या मामांच्या भूमिका उत्तम साकारल्या आहेत. त्यातला एक मामा सर्वात जास्त खोडकर आणि मस्ती करणारा आहे आणि तो मामा म्हणजे 'पिंट्या मामा'. हे पात्र साकारणारा अभिनेता निखिल रत्नपारखी नेहमीच त्याच्या विनोदाच्या टायमिंग आणि शैलीमुळे प्रेक्षकांचा आवडता ठरला आहे. प्रामाणिक, खोडकर असलेला हा पिंट्या मामा कुणाच्या घरात दिसू शकेल असा आहे. पिंट्या मामा कितीही खोडकर असला, तरी त्याची आदित्यवर असलेली त्याची माया ही नेहमीच दिसून येते. अशाच प्रकारचं एक पात्र म्हणजे 'मॅडी'. 'अग्गंबाई सासूबाई' या मालिकेमधलं हे पात्र मजेशीर आणि विनोदी असल्यामुळे मालिकेतील मॅडी म्हणजेच, अभिनेत्री भक्ती रत्नपारखी प्रेक्षकांना आवडू लागली. मॅडीचा प्रामाणिकपणा आणि तिच्या वागण्यात असलेला भोळेपणा यामुळे तिचं हे पात्र अनेकांना आवडलं. आपली विशिष्ट भाषा, पेहराव यामुळे मॅडी लोकांची आवडती झाली. सध्या हे पात्र कमी दिसत असलं तरी, प्रेक्षक या मॅडीची उत्सुकतेनं वाट बघत असतात. 'पिंट्या मामा हे पात्र माझ्यासाठी खास आहे. कारण मला हवं तसं ते मला साकारता येतं. लोकांचं प्रेम मिळणं हे खरं तर त्या पात्राच्या नशिबात आहे. ते पात्र मी फक्त जिवंत करतो. खोडकर असला, तरी त्याच्यामध्येसुद्धा माया ही आहे. ते पात्र माझ्या जवळचं आहे, आणि मी ते प्रामाणिकपणे करतो. -निखिल रत्नपारखी
from Marathi Bollywood News, Marathi Cinema News https://ift.tt/3laNwmY
