अD वेबविश्वाची वाढती लोकप्रियता बघता, मोठमोठ्या कलाकारांनी या नव्या माध्यमाकडे मोर्चा वळवला. काही मोठ्या कलाकारांनी कमबॅकही याच माध्यमावर केलं. विशेष म्हणजे चित्रपटांमध्ये फारशी चमक दाखवू न शकलेले कलाकार ओटीटीवर (ओव्हर द टॉप) दमदार कामगिरी करताना दिसत आहेत. आता एक पाऊल पुढे जात काही कलाकार ओटीटीसाठी आशयाची निर्मितीही करू लागले आहेत. वेब सीरिज आणि डिजिटल माध्यमावर प्रदर्शित होणारे चित्रपट अशा दोहोंची निर्मिती करण्यात कलाकार गुंतले आहेत. ओटीटीसाठी आशयाची निर्मिती करणाऱ्या कलाकारांमध्ये अभिनेत्री अनुष्का शर्माचं नाव प्रामुख्यानं घ्यावं लागेल. 'पाताल लोक'ला मिळालेल्या अफलातून यशामुळे अनुष्का उत्तम निर्माती असल्याचं दिसून आलं. अभिनयापेक्षा तिच्यातील निर्मितीकलेचं लोकांनी भरभरुन कौतुक केलं. त्यानंतर तिनं 'बुलबुल' चित्रपटाची निर्मिती केली. तोही लोकांना आवडला. अनुष्कानंतर सीरिजच्या निर्मितीमध्ये शाहरुख खानचं नाव येतं. 'बार्ड ऑफ ब्लड' आणि 'बेताल'सारख्या थरारनाट्य असलेल्या सीरिजची निर्मिती किंग खाननं केली. त्यानंतर 'क्लास ऑफ ८३' या वेबपटाची निर्मिती केली. 'इनसाइड एज', 'मेड इन हेवन' आणि 'मिर्झापूर' या गाजलेल्या सीरिजची निर्मिती अभिनेता फरहान अख्तरनं केली होती. 'माइंड द मल्होत्राज' या सीरिजची निर्मिती अभिनेत्री दिया मिर्झानं केली होती. छोट्या पडद्यावरील प्रसिद्ध अभिनेत्री हिना खाननं एमएक्स प्लेअरवरील 'विशलिस्ट' या चित्रपटाची निर्मिती केली. या वेबपटात ती स्वत: मुख्य भूमिकेतदेखील आहे. मराठीमध्ये अभिनेता सारंग साठ्ये भाडिपासाठी अनेक सीरिजची निर्मिती करत आहे. 'कलाकारांनी निर्मिती क्षेत्राकडे वळणं हे चित्र पूर्वीपासून पाहायला मिळतंय. पण, गेल्या काही वर्षांमध्ये अनेक मोठ्या कलाकारांनी ओटीटीसाठी आशयाची निर्मिती करायला सुरुवात केली आहे. त्यात त्यांना यशही मिळतंय. यामुळे त्यांचा फायदाच होतो. एक तर मनासारख्या आशयाची निर्मिती करण्याची हौस भागवता येते आणि आर्थिक फायदाही होतो. शिवाय, क्रिएटीव्ह आशयाची निर्मिती केल्याचं समाधान मिळतं', असं वेब सीरिजचे अभ्यासक अमोल उद्गीरकर सांगतात. नजीकच्या काळात आणखीन काही मोठे चेहरे वेब सीरिजच्या निर्मितीकडे वळणार आहेत. वेबविश्वाकडे वळले चित्रपट आणि मालिकांची निर्मिती करण्यासाठी प्रसिद्ध असलेले मोठे चेहरे आता वेबविश्वाकडेही वळले आहेत. यामध्ये करण जोहर, अनुराग कश्यप, झोया अख्तर, एकता कपूर, कबीर खान आणि विक्रमादित्य मोटवानी यांच्या नावाचा समावेश आहे. आणखीही अनेक बडे निर्माते लवकरच ओटीटीवर कलाकृती सादर करण्याच्या वाटेवर आहेत.
from Marathi Bollywood News, Marathi Cinema News https://ift.tt/349tAeq
