मुंबई- विरोधी पक्षनेते देवेंद्र फडणवीस यांच्या पत्नी या पुन्हा एकदा नवीन गाण्यासह प्रेक्षकांच्या भेटीला येणार आहेत. अमृता यांना गाण्याची आवड असून त्यांनी आतापर्यंत अनेक गाणी गायली आहेत. त्यांच्या गाण्यांना प्रेक्षकांचा चांगला प्रतिसाद लाभला. नेत्याची पत्नी एवढीच स्वतःची ओळख सीमित न ठेवता त्यांनी स्वतःच्या कर्तृत्वावर काहीतरी करून दाखवायचं ठरवलं. त्या अॅक्सिस बँकेत अधिकारी असून त्यांना मॉडेलिंगची देखील आवड आहे. त्यांनी व्हॅलेन्टाइन डे च्या निमित्तानेदेखील एक गाणं प्रदर्शित केलं होतं. ते गाणं देखील प्रेक्षकांच्या पसंतीस उतरलं होतं. आता महिला दिनाचं औचित्य साधून अमृता यांनी एक नवं गाणं गायलं आहे. अमृता यांनी फेसबुक आणि इन्स्टाग्रामवर पोस्ट करत त्यांच्या आगामी गाण्याची घोषणा केली. त्यांच्या या पोस्टनंतर चाहत्यांची उत्सुकता वाढली आहे. त्यांनी आपल्या पोस्टमध्ये लिहिलं, 'जेव्हा ती संघर्षपथावर निघाली तेव्हा तिला – कुणी म्हणाले वेडी कुठली, कुणी म्हणाले खुळी….. तिने मात्र जगाला दाखवून दिले की तिच्या प्रगतीचा प्रवाह रोखणे शक्य नाही! ’स्त्री शक्ती’ ला गौरवान्वित करणारे माझे नवीन गीत ८ मार्च रोजी, जागतिक महिला दिनी!' अशी पोस्ट करत त्यांनी चाहत्यांना त्यांच्या गाण्याबद्दल माहिती दिली आहे. यापूर्वीही आठ मार्च रोजी त्यांचं नवं गाणं येणार असल्याची माहिती अमृता यांनी दिली होती. ट्रोलर्सना आव्हान देत तयार रहा, असं त्या म्हणाल्या होत्या. माझं आणखी एक गाणं येतंय, मी ट्रोलर्सना गाण्यातून उत्तर देईन, असं मिसेस फडणवीस म्हणाल्या होत्या. त्यांनी व्हॅलेन्टाइन डे साठीही एक गाणं गायलं होतं. ते गाणं त्यांनी इंग्रजीतून गायलं होतं. 'अंधार' या चित्रपटासाठीही त्यांनी एक गाणं गायलं आहे. ‘रोज रोज पाठीमागे सावली असेल ही अनोळखी, दूर दूर आसमंती आर्तता घुमेल ही कोणाची’ असे गाण्याचे बोल असून अमृता यांनी ट्विटरवर गाण्याची लिंक सशेअर केली होती. तसेच त्यांनी भाऊबीजेनिमित्त गायलेल्या गाण्यावर दहा लाखाहून अधिक व्ह्यूज मिळाले होते.
from Marathi Bollywood News, Marathi Cinema News https://ift.tt/3eelbfp
