मुंबई- बॉलिवूड अभिनेता कार्तिक आर्यनने खूप कमी वेळात चित्रपटसृष्टीमध्ये आपलं स्थान निर्माण केलं. बड्या प्रोडक्शन हाउसच्या ऑफर त्याला येऊ लागल्या. परंतु, नुकत्याच घडलेल्या काही घटनांमुळे कार्तिकच्या व्यावसायिक आयुष्याबद्दल सोशल मीडियावर प्रचंड चर्चा रंगल्या. प्रसिद्ध निर्माता आणि दिग्दर्शक करण जोहरने कार्तिकला धर्मा प्रोडक्शनमधून बाहेरचा रस्ता दाखवत तो प्रोफेशनल वागत नसल्याचं सांगितलं. यासोबतच त्याला 'दोस्ताना २' सिनेमातून काढून टाकण्यात आलं. परंतु, करणने नाकारलं असलं तरी एका मराठी दिग्दर्शकाने कार्तिकला त्याच्या चित्रपटात संधी देण्याचं ठरवलं आहे. मराठी चित्रपटसृष्टीतील नावाजलेले दिग्दर्शक यांच्या आगामी सिनेमात कार्तिकला काम करण्याची संधी मिळणार आहे. समीर यांच्या 'आनंदी गोपाळ' चित्रपटाला राष्ट्रीय पुरस्काराने सन्मानित करण्यात आलं. निरनिराळे गंभीर विषय पडद्यावर सहजपणे मांडण्यात समीर यांचा हातखंडा आहे. समीर अनेक दिवस एका लव्हस्टोरीवर काम करत होते आणि या चित्रपटासाठी योग्य चेहऱ्याच्या शोधात होता. अखेर त्यांचा शोध संपला. सूत्रांनी दिलेल्या माहितीनुसार, समीर यांच्या चित्रपटात कार्तिक मुख्य अभिनेता म्हणून झळकणार आहे. चित्रपटासाठी अभिनेत्रीचा शोध सुरू असून चित्रीकरणाला पुढील वर्षी सुरुवात होणार आहे. समीर विध्वंस यांचा हा पहिला हिंदी चित्रपट असणार आहे. चित्रपटाबद्दल विचारणा करण्यात आल्यावर समीर आणि कार्तिक यांनी कोणतीही माहिती देण्यास नकार दिला. समीर सध्या दोन मराठी चित्रपटांचं दिग्दर्शन करत आहेच. एक म्हणजे 'क्रांतीसूर्य' आणि दुसरा 'क्रांतीज्योती.' हे दोन्ही चित्रपट महात्मा ज्योतीराव फुले आणि सावित्रीबाई फुले यांच्या आयुष्यावर आधारित असणार आहेत.' आता समीर आणि कार्तिकची जोडी पडद्यावर काय कमाल करते हे पाहणं औत्सुक्याचं ठरणार आहे.
from Marathi Bollywood News, Marathi Cinema News https://ift.tt/3ybCNQK
