मुंबई: बॉलिवूडचा भाईजान सध्या त्याचा चित्रपट 'राधे: युअर मोस्ट वॉन्टेड भाई'मुळे सोशल मीडियावर जोरदार चर्चेत आहे. या चित्रपटाला ओटीटीवरही प्रेक्षकांचा तुफान प्रतिसाद मिळाला. सलमानच्या या चित्रपटानं ओटीटी वरील सर्व रेकॉर्ड मोडले असून रील लाइफमध्ये आजही त्याचं नाणं खणखणीत वाजत असल्याचं सिद्ध केलं. सलमान खानच्या रिअल लाइफबद्दल बोलायचं तर तिथेही त्याच्या स्टारडम एका वेगळ्याच पातळीवर आहे. विशेष म्हणजे सलमान आपल्या चाहत्यांना कधी निराश करत नाही. त्याच्या चाहत्याचे अनेक किस्से ऐकिवात आहे. पण रिलीज झाल्यानंतर एका पत्रकारानं सोशल मीडियावर शेअर केलेला सलमान खानचा किस्सा वाचून कोणाच्याही डोळ्यात पाणी येईल. पत्रकार कर्मवीर सिंह चिकारा यांनी गुरूवारी त्यांच्या फेसबुक अकाउंटवर एक पोस्ट शेअर केली होती. ज्यात त्यांनी सलमान किती उदार मनाचा व्यक्ती आहे हे सांगितलं आहे. त्यांनी त्यांच्या पोस्टमध्ये सलमानशी संबंधित त्याच्या आयुष्यातला किस्सा सोशल मीडियावर शेअर केला. यासोबतच त्यांनी त्यांच्या दिवंगत पत्नीचे सलमानसोबतचे फोटोही सोशल मीडियावर शेअर केले आहेत. कर्मवीर सिंह चिकारा यांची पत्नी आरती चिकारा यांचं कॅन्सरमुळे निधन झालं आहे. कर्मवीर सिंह चिकारा यांनी आपल्या पोस्टमध्ये त्यांच्या पत्नीला कॅन्सरचं झालेलं निदान, मुंबईमध्ये उपचारासाठी येणं, मुंबईत आल्यानंतर आरतीनं सलमान खानला भेटण्याची व्यक्त केलेली इच्छा ते सलमान खानचे वडील सलीम खान आणि बहीणीशी फोनवर झालेलं आपुलकीचं बोलणं आणि त्यानंतर 'राधे'च्या सेटवर कर्मवीर सिंह चिकारा यांची कॅन्सरग्रस्त पत्नी आरती चिकारा यांची सलमान खाननं घेतलेली भेट. तसेच जवळपास अर्धा तास मारलेल्या गप्पा, आरती यांच्या उपचारांसाठी सलमाननं दिलेलं मदतीचं आश्वासन या सर्व गोष्टींबद्दल विस्तारानं सांगितलं आहे. सध्या सोशल मीडियावर कर्मवीर सिंह चिकारा यांची ही फेसबुक पोस्ट खूप चर्चेत आहे. 'राधे' चित्रपट रिलीज झाल्यानंतर याच चित्रपटाच्या सेटवर सलमाननं आरती आणि कर्मवीर सिंह चिकारा यांच्या भेटीचा किस्सा त्यांनी सोशल मीडियावर शेअर केला. तसेच सलमानचा चित्रपट आवर्जुन पाहण्याचं आवाहनही त्यांनी केलं आहे. ही पोस्ट सोशल मीडियावर व्हायरल झाल्यानंतर सलमान खानला रिअल हिरो म्हणत त्याच्यावर कौतुकाचा वर्षाव होताना दिसत आहे.
from Marathi Bollywood News, Marathi Cinema News https://ift.tt/3tS77fK
