घर ते घरगेली ५५ दिवस आम्ही महाराष्ट्राबाहेर आहोत. येत्या २ दिवसांत आम्ही मुंबईमध्ये परततोय. आपल्या कुटुंबापासून लांब राहून काम करणं हे फार कठीण होतं. नेटवर्कच्या समस्येमुळे माझं माझ्या मुलाबरोबर काही प्रमाणातच बोलणं व्हायचं. त्यामुळे माझं मन सतत घरी लागलेलं असायचं. मुंबईमध्ये चित्रीकरण झाल्यानंतर घरी जाऊन कुटुंबासोबत वेळ घालवणं हे दुसऱ्या दिवशी सेटवर जाण्यासाठी उत्साह देतं. महाराष्ट्राबाहेर काम करणं वेगळं अनुभव देणारं असलं तरी मुंबई ती मुंबई आणि घर ते घर. - () सवयीच्या गोष्टींची आठवणराज्याबाहेर चित्रीकरण करताना महाराष्ट्र आणि मुंबई दोन्हीची आठवण येणं साहजिक आहे. तिथला सेट खास चित्रीकरणासाठी असलेला सेट नसल्यामुळे बऱ्याच अडचणी यायच्या. मुंबईत असं कधी व्हायचं नाही. मुंबईतल्या आमच्या सेटवरची मेकअप रूम, घर, स्वयंपाकघर या सगळ्याची खूप आठवण यायची. शूटिंग करून घरी जाणं आणि सकाळी पुन्हा वेळेवर सेटवर पोहचण्यासाठीची कसरत या सवयीच्या गोष्टी सतत हव्याहव्याशा वाटत होत्या. आता पुन्हा त्या अनुभवता येणार आहेत. - नंदिता पाटकर (सहकुटुंब सहपरिवार) प्रवासाची मजा मुंबईमध्ये करावा लागणारा प्रवास, संपूर्ण सेटचा परिसर हे आठवणीत राहील असंच आहे. राज्याबाहेर चित्रीकरण करताना आपलं काम झाल्यानंतर घराऐवजी हॉटेल रूममध्ये जायचो. पण आता मुंबईत परतल्यावर चित्रीकरण संपवून घरी जाण्याच्या प्रवासाची मजा लुटता येणार आहे. या सगळ्यात सरकारच्या नियम आणि अटींचं आम्ही काटेकोरपणे पालन करणार आहोत. सरकारनं चित्रीकरणाची परवानगी दिल्याबद्दल त्यांचे आभार. - समीर चौघुले (महाराष्ट्राची हास्यजत्रा) उत्साहात सुरुवातमुंबईत चित्रीकरणाचा अनुभव वेगळाच असतो. आपलं चित्रीकरण संपलं की गप्पा मारत घरी पोहोचून कुटुंबियांसह वेळ घालवायला मिळायचा. घरी एकत्र जेवायला बसणं, कुटुंबियांसह गप्पा मारणं हे सगळं राज्याबाहेर चित्रीकरण करताना आठवत होतं. आता परवानगी मिळाली असल्यामुळे पुन्हा हे सगळे अनुभव येणार हे मनात येताच उत्साह आला आहे. मुंबईच ट्राफिक, पाऊस हे सगळंच आता अनुभवायला मिळणार आहे. - अनिता दाते (चला हवा येऊ द्या) आनंद द्विगुणितआमच्या मुख्य आणि खऱ्या सेटवर शूटिंग अनुभवायला मिळणार हे कळताच आनंद झाला आहे. कित्येक दिवसांपासून कुटुंब आणि सगळ्यांपासूनच दूर असल्यामुळे घराची ओढ लागली होती. व्हिडीओ कॉल, फोन या सगळ्या माध्यमातून घरच्यांशी संपर्कात असलो तरी ती भेट होणं गरजेचं असतं. शूटिंग ते हॉटेल आणि हॉटेल ते शूटिंग इतकाच प्रवास करून कंटाळून गेलो होतो. पुन्हा आपल्या मायभूमीवर काम करण्याचा उत्साह आता द्विगुणित झाला आहे. - समृद्धी केळकर (फुलाला सुगंध मातीचा) मालिकेचं कुटुंबराज्याबाहेर चित्रीकरण करताना घराची सतत चिंता लागून राहायची. पण त्याच वेळी मालिकेच्या मोठ्या कुटुंबासोबत वेळ घालवता आला. या कुटुंबाबरोबर चित्रीकरण करताना मजा आली. पण घराची ओढ असतेच. रोज रात्री घरी जाऊन कुटुंबासह वेळ घालवणं हे खरंच आता जास्त गरजेचं वाटू लागलं आहे. आता पुन्हा मुंबई अनुभवायला मिळणार हे समजताच उत्साह निर्माण झालाय. - हरिश दुधाडे (तू सौभाग्यवती हो) संकलन : सुरज कांबळे
from Marathi Bollywood News, Marathi Cinema News https://ift.tt/3xsobex
