मुंबई : अभिनेत्री तिच्या अभिनय कौशल्यासाठी मनोरंजन सृष्टीमध्ये ओळखली जाते. हेमांगीचा अभिनय जितका नैसर्गिक आणि सहज असतो तितकेच तिचे विचार थेट, स्पष्ट आणि बेधडक असतात. हेमांगी सोशल मीडियावरही चांगलीच सक्रीय असते. चालू घडामोडींबाबत ती तिचे मत नेमकेपणाने व्यक्त करते तर कधी त्यावर मार्मिक टिप्पणी करते. तिचे विचार बेधडक असल्याने अनेकदा तिला ट्रोलही केले जाते. अर्थात हेमांगीचा बेधडक स्वभाव पाहता अशा ट्रोल करणाऱ्यांना खडे बोल सुनावायलाही ती कमी करत नाही. अलिकडेच हेमांगीने तिच्या इन्स्टाग्रामवरून पोळ्या लाटतानाचा एक व्हिडीओ शेअर केला होता. त्यावरून तिला अनेकांनी ट्रोल केले होते. इतकेच नाही तर काहींनी तर तिला व्यक्तिगत मेसेज पाठवून तिला काही गोष्टी सुनावल्या होत्या. या सर्वांना सडेतोड उत्तर देणारी एक पोस्ट हेमांगीने फेसबुकवर पोस्ट केली आहे. तिची ही पोस्ट खूपच व्हायरल झाली आहे. या पोस्टमध्ये हेमांगीने व्यक्त केलेल्या मतांशी अनेकांनी सहमती दर्शवत तिला पाठिंबा दिला आहे. हेमांगीने नेमके काय लिहिले हेमांगीने तिच्या फेसबुकवर अत्यंत परखड आणि थेट विषयाला हात घालणारी एक मोठी पोस्ट लिहिली आहे. हेमांगी तिच्या पोस्टमध्ये म्हणते, 'बाईने तिचे बुब्ज (स्तन), त्याला असलेली पुरुषांसारखीच स्तनाग्रे आणि त्यांना धरून ठेवायला, झाकायला किंवा मला आवडत नाही पण लोक काय म्हणतील म्हणून लाजेखातर का होईना ब्रा वापरायची की नाही हा सर्वस्वी त्या बाईचा निर्णय असू शकतो. मग ती घरी असो किंवा सोशल मीडियावर किंवा कुठेही. हा त्यावरून जज करण्याचा, त्याबद्दल घाणेरडया चर्चा आणि गॉसिप करण्याचीसुद्धा ज्याची त्याची निवड असू शकतेच.' 'यानिमित्ताने सांगावसं वाटतं की ब्रा, ब्रेसीयरचा (अंतर्वस्त्रा) चार लोकांसमोर किंवा सोशल मीडियावर येताना वापरण्याचा, न वापरण्याचा, अश्लीलतेचा, त्या स्त्रीच्या संस्कारांचा, बुद्धिमत्तेचा आणि तिच्या इमेजचा जो काही संबंध जोडला जातो त्यासाठी स्त्रियांना त्यांच्याच शारीरिक स्वातंत्र्यासाठी अजून किती झगडायचे आहे हे त्यातून लक्षात येतं. गंमत म्हणजे या चर्चा करणाऱ्यांमध्ये पुरुषांपेक्षा स्त्रियाच जास्त अग्रेसर असतात. पुरुष निदान त्याची मजा घेऊन गप्प बसतात पण स्त्रिया स्वतः त्यातून जात असताना ही खालच्या स्तराला जाऊन चर्चा करून कुठलं पदक मिळवतात कुणास ठाऊक.' असे निरीक्षण हेमांगीने तिच्या पोस्टमध्ये मांडले आहे. हेमांगीने पुढे लिहिले आहे, 'टीशर्ट मधून पुरुषांची दिसणारी स्तनाग्रे किंवा कपड्यांमधून दिसणारा त्याचा कुठलाही अवयव किती सहज पद्धतीने आपण पाहतो किंवा त्याकडे पाहून दुर्लक्ष करतो.. तो एक सवयीचा भाग म्हणूनच ना. मग हेच स्त्रीच्या बाबतीत का घडू नये? पण मग आता सवय करून घ्यायला हवी. ज्यांना ब्रा आवडीने घालाविशी वाटते, ज्या कम्फर्टेबल आहेत त्यांनी ती जरूर घालावी, मिरवावी कसंही. तो नक्कीच त्यांचा निर्णय आहे. पण ज्यांना नाहीच आवडत त्यांच्याकडे वेगळ्या नजरेने का बघितले जावे किंवा हे का लादले जावे?', असा थेट सवालच हेमांगीने सर्वांना विचारला आहे. लोग क्या कहेंगे हेमांगीने या पोस्टमध्ये पुढे नमूद केले की, 'किती तरी मुली ब्रा घालून ही निप्पल्स दिसतात म्हणून काय काय उपद्व्याप करतात. दोन-दोन ब्रा घालतात, निप्पल्स भोवती टिश्यू पेपर लावतात, निप्पल पॅड वापरतात, चिकट पट्टी लावतात... बाप रे....कशासाठी एवढं आणि का? किती तरी मुलींना ब्रा वापरल्याने अस्वस्थ वाटत राहते, त्यांची इच्छा नसताना ही 'लोग क्या कहेंगे' या साठी घट्ट ब्रा वापरून स्वतःवर अन्याय करत राहतात. कामावरून, बाहेरून आल्यावर ज्या पद्धतीने मुली ब्रा काढून मोकळा श्वास घेतात ते जर त्याच 'लोग क्या कहेंगे' लोकांना दाखवले ना तर मुलींची दयाच येईल हो.' असे म्हणत एका गंभीर मुद्द्याकडे या पोस्टमधून तिने लोकांचे लक्ष वेधले. गरज मानसिक बदलाची हेमांगीने तिच्या या पोस्टमध्ये आणखी एक महत्त्वाचा विचार मांडला ती म्हणते, ' स्वतःच्या घरात असतानाही घरच्यांसमोर दिवसभर ती ब्रा घालून राहायचं आणि मग रात्री झोपेच्या वेळी 'काढण्याची मुभा' दिल्यासारखी काढून ठेवायची. त्यावेळी ही अंगावर ओढणी नाहीतर स्टोल असतोच. कशासाठी.. बाहेरच्या लोकांचे सोडून देऊ पण घरातले स्वतःचे वडील, भाऊ यांच्यासमोर पण तिने ब्रा घालून राहायचे का.. त्याच बापाने मुलीला लहानपणी पूर्ण नग्न अवस्थेत पाहिलेले असतं ना.. मोठ्या किंवा लहान भावाने पाहिलेले असते ना मग मुली मोठ्या झाल्यावर, त्यांचे अवयव वाढल्यावर, त्यांचे अवयव असे मनाविरुद्ध बांधून, झाकून, लपवून ठेवायची काय गरज? ते वाढलेले अवयव जर घरातल्या पुरुषांच्या मनावर परिणाम करत असतील तर तो प्रॉब्लेम त्या पुरुषांचा आहे. आमच्या घरात आम्ही घरात असताना ना कधी माझ्या मोठ्या बहिणीने ब्रा घातली ना मी घालत. माझ्या घरात माझे बाबा, मोठा भाऊ, गावाला गेले तर सर्व चुलते, चुलत भाऊ थोडक्यात घरातल्या सर्व पुरुषांसमोर आम्ही ब्रा न घालता वावरतो. आम्हाला असे पाहून ना त्यांचे कधी विचार बदलले ना नजर. ना माझ्या आईमार्फत आम्हाला हे सांगण्यात आले कारण आमच्याशी असलेले नाते 'त्यांच्या' डोक्यात पक्के आहे. आता आमची लग्न झाल्यावर ही काही बदलले नाही. बाहेर जाताना, लोकांसमोर किंवा जेव्हा कधी वाटेल तेव्हाच ब्रा वापरली, वापरतो. याचा माझ्या संस्कारांशी किंवा उगीचच पाश्चिमात्य संस्कृती आत्मसात करण्याचं फॅड वगैरे म्हणून अशा कुठल्याच गोष्टींशी काही संबंध नाही. अरे किती ती बंधनं किती ते 'लोक काय म्हणतील' चे ओझे व्हायचे? असा प्रश्न उपस्थित करत हेमांगी म्हणते, 'जगू द्या रे मुलींना, मोकळा श्वास घेऊ द्या.' या पोस्टच्या शेवटी हेमांगीने समस्त महिलांना आवाहन केले आहे, ती म्हणते, ' खरेतर हे सर्वात आधी स्त्रियांनीच आपल्या मनावर बिंबवून घ्यायला हवे. स्वच्छेने ब्रा शिवाय वावरणे, दिसणारे निप्पल्स बघण्याची सवय करून घ्यायला हवी आणि तेवढीच ती द्यायला ही हवी.' अत्यंत महत्त्वाच्या विषयावर हेमांगीने तिचे मत मांडत तिला ट्रोल करणाऱ्यांना अतिशय सडेतोड उत्तर दिले आहे. अर्थात अशा पद्धतीने उत्तर देण्याची हेमांगीची ही पहिली वेळ नाही. दरम्यान, हेमांगीच्या पोस्टवर अनेकांनी तिच्या मतांशी सहमती दर्शवत तिला पाठिंबा दिला आहे. यामध्ये तिच्या चाहत्यांसोबतच अनेक कलाकार मंडळींनी देखील त्यांची मते व्यक्त केली आहेत.
from Marathi Bollywood News, Marathi Cinema News https://ift.tt/3i6JRXw