मुंबई : 'सारेगमप लिटिल चॅम्प' या कार्यक्रमातून घराघरात आर्या आंबेकरची एक गुणी गायिका म्हणून ओळख झाली आहे. त्यानंतर संगीताबरोबरच आर्याने 'ती कुठे काय करते!' या सिनेमातून अभिनयाच्या क्षेत्रातही पदार्पण केल्याने तिची लोकप्रियता अधिकच वाढली. गोड गळा आणि तितकेच सोज्वळ सौंदर्यामुळे आर्याने अनेकांना भुरळ घातली आहे. अनेकांची क्रश झाली आहे...ज्या कार्यक्रमातून आर्याला गायिका म्हणून ओळख मिळाली त्याच कार्यक्रमामध्ये आर्या आता परीक्षक म्हणून जबाबदारी सांभाळत आहे. तिथे देखील आपल्या सांगितीक ज्ञानाचा फायदा नवीन पिढीतील चिमुरड्यांना करून देत आहे. गेल्या अनेक महिन्यांपासून सोशल मीडियावर सातत्याने आर्या आंबेकर एका प्रसिद्ध संगीतकार आणि गायकाला डेट करत असल्याची बातमी चर्चेत आली. त्यामुळे हे नेमके काय आहे, असे म्हणत सगळ्यांना मोठा आश्चर्याचा धक्का बसला होता. याबाबत सातत्याने उलटसुलट चर्चा होत होत्या. सुरुवातीला आर्याने या चर्चांकडे कानाडोळा केला परंतु पुन्हा ही चर्चा सतत होऊ लागल्याने अखेर आर्याने याबाबत मौन सोडत खुलासा करणारी पोस्ट सोशल मीडियावर शेअर केली आहे. काय लिहिले आहे आर्याने आर्याने या पोस्टमध्ये या चर्चेबरोबरच अन्य काही गोष्टींचाही खुलासा केला आहे. आर्याने या पोस्ट शेअर करताना लिहिले आहे की, ' प्रारंभी मी यासगळ्याकडे दुर्लक्ष करायचे ठरवले होतं. मात्र माझ्या प्रश्नोत्तरांच्या सेशनमध्ये याबाबतच काही प्रश्न विचारण्यात आले होते. शिवाय काही ओळखीच्या व्यक्तींनीदेखील या गोष्टींची चर्चा करत असल्याचे समजले. त्यामुळे यासगळ्या गोष्टींचा खुलासा करण्याचे ठरवले आहे. आर्याने तिच्या खुलाशामध्ये असे म्हटले आहे की, 'गेल्या १२ वर्षांपासून कोणतीही टॅलेंट एजन्सी मला मॅनेज करत नाही. इन्स्टाग्राम आणि फेसबुक पेजवरील माझे सर्व फॉलोअर्स ऑर्गेनिक आहेत. तसेच यूटयुबवरील सबस्क्रायबर आणि व्हूजदेखील ऑर्गेनिक आहेत. फॉलोअर्स, सबस्क्रायबर आणि व्ह्यूज् विकत घेण्याची संकल्पना मला अजिबात मान्य नाही. उलट त्याच्या मी विरोधात आहे. या गोष्टी माझ्या नैतिकतेमध्ये बसत नाहीत.' तसेच आर्याने पुढे असेही सांगितले आहे की, 'प्रमोशन किंवा कार्यक्रमांसाठी ती थेट संवाद साधत असून ती स्वत: सर्व मेल किंवा मेसेजेसला उत्तर देते.' आर्याने तिच्या पोस्टमध्ये सोशल मीडियावर तिला मिळणाऱ्या प्रेमाबद्दल चाहत्यांचे मनापासून आभार मानले आहेत. आर्याने या पोस्टमध्ये पुढे म्हटले आहे की, 'एका प्रसिद्ध गायक आणि संगीतकाराला मी डेट करत असल्याची चर्चा सोशल मीडियावर होत आहे. ही अफवा मी अनेक दिवसांपासून सातत्याने ऐकत आहे.परंतु मी पुन्हा एकदा सर्वांना स्पष्टपणे सांगू इच्छिते की ते माझे मार्गदर्शक आहेत. काहीही अफवा असल्या तरी मी कायम त्यांचा आदर केला आहे आणि कायम करत राहीन...' असे आर्याने तिच्या पोस्टमध्ये नमूद केले आहे.
from Marathi Bollywood News, Marathi Cinema News https://ift.tt/3kgQt8i
