मुंबई- 'क्रिमिनल जस्टिस'चे माधव मिश्रा म्हणा किंवा 'कागज'चे लाल बिहारी म्हणा किंवा 'मिर्झापूर'चे कालिन भैय्या म्हणा, यांना कोणी ओळखत नाही असा माणूस भेटणं थोडं अशक्यच आहे. सिनेसृष्टीतील ते उत्तम अभिनेता तर आहेतच. पम खासगी आयुष्यातही ते सदैव हसऱ्या चेहऱ्याने वावरत असतात. जेव्हाही तुम्ही त्यांना पाहाल तेव्हा त्यांच्या चेहऱ्यावर स्मित हास्य असेलच.पंकज त्रिपाठी गंभीर चेहऱ्यांनी वावरताना क्वचितच दिसतील. त्यांच्या टायमिंगवर आणि ह्युमरवर प्रत्येकजण फिदा आहे. एका मुलाखतीत त्यांनी यामागे 'हरिशंकर परसाई' असल्याचं सांगितलं होतं. त्यांचं लिखाण वाचून ते सटायर मारायला शिकले. ज्याचा वापर त्यांनी सिनेमातही केला. पण पंकज त्रिपाठी ते कालिन भैया आणि माधव मिश्रा पर्यंतचा त्यांचा प्रवास सोपा कधीच नव्हता. एका मुलाखतीत त्यांनी इथपर्यंत पोहचण्यासाठी आलेल्या अडचणी आणि संघर्षांचा उल्लेख केला. या काळात लोक त्यांना काय म्हणायचे तेही त्यांनी यावेळी सांगितलं. रेडिओ जॉकी सिद्धार्थ कन्ननने पंकज त्रिपाठी यांची मुलाखत घेतली. यादरम्यान त्यांनी अनेक गोष्टी शेअर केल्या. यावेळी त्रिपाठी यांनी सांगितले की, अनेकांनी त्यांचा अपमान केला, पण त्या लोकांना या गोष्टी आठवत नाहीत. ते म्हणाले की, 'ज्यांनी माझ्याशी असं केलं, ते आता कधी भेटले तरी ते मला कधी वाईट बोलले होते हे त्यांना आठवणारही नाही.' यानंतर सिद्धार्थने जेव्हा त्यांना विचारले की अशा लोकांच्या बोलण्याने तुम्हाला काही फरक पडला का, तेव्हा वाईट वाटले होते का? तेव्हा उत्तरात त्रिपाठी म्हणाले की, 'हो नक्कीच. शेवटी मी पण माणूसच आहे. मला वाईट का वाटणार नाही? मला पण राग यायचा. पण मी या सगळ्या गोष्टी विसरण्याचा प्रयत्न करायचो. कारण कसं आहे की, मनात वाईट ठेवल्यानं माझंच नुकसान होणार, म्हणून मी पुढचा विचार करायचो.' बिहारच्या गोपालगंजमधून आलेल्या पंकज त्रिपाठी यांचा सिनेप्रवास सोपा कधीच नव्हता. त्यांनी २००४ मध्ये 'रान' सिनेमातून पदार्पण केलं. त्यानंतर २००६ मध्ये 'ओंकारा' केल्यानंतर त्यांना ओळख मिळू लागली. सध्या ते रणवीर सिंग, दीपिका पादुकोण यांच्यासोबत '८३' सिनेमात पीआर मानच्या भूमिकेत दिसणार आहेत. याशिवाय अक्षय कुमारच्या 'बच्चन पांडे' आणि आमिर खानच्या 'लाल सिंह चड्ढा' या सिनेमातही दिसणार आहेत.
from Marathi Bollywood News, Marathi Cinema News https://ift.tt/30o4VUM
