मुंबई टाइम्स टीम यांना करोनाची लागण झाल्याचं कळल्यानंतर तर अनेक बॉलिवूडकरांना आणखी टेन्शन आलंय. शूटिंग, डबिंग आणखीन काही दिवसांनंतर सुरू करण्यात याव्या असा सूर उमटू लागला आहे. अनेकांनी त्यांचं चित्रिकरण पुढे ढकलण्यास सांगितलं आहे. अभिनेत्री रवीना टंडननं एका जाहिरातीचं चित्रिकरण अलीकडेच घरातून केलं. आधी ती या जाहिरातीचं चित्रीकरण स्टुडिओमध्ये करणार होती. परंतु करोनाचा वाढता प्रादुर्भाव पाहता तिनं घरूनच चित्रीकरण पूर्ण करण्यास पसंती दिली. चित्रीकरणादरम्यान मेकअप आणि केशरचनासुद्धा तिनं स्वतःच केली होती. काही मोजक्याच क्रू मेंबर्सना सोबत घेऊन तिनं हे चित्रिकरण घरात राहून पूर्ण केलं. अभिनेत्री श्रुती बापना 'ब्रीद २'च्या डबिंगसाठी दोन दिवस घरातून बाहेर पडली होती. 'घरातून बाहेर पडणं हे आपल्या सुरक्षिततेच्या दृष्टीने धोक्याचं होतं. त्यामुळे मला खूप तणाव जाणवत होता. डबिंगदरम्यानसुद्धा मी स्वतःला, माइकला वेळोवेळी सॅनिटाइज करत होते. करोनावर लस येईपर्यंत तरी, पुढचे एक-दोन महिने बाहेर न पडण्याचं मी ठरवलंय', असं ती सांगते. डबिंगसाठी घराबाहेर पडलेल्या हिना खानलासुद्धा घरातून बाहेर पडताना असंच टेन्शन आलं होतं. 'आपण करोनापासून स्वत:चा शक्य तितका बचाव केला पाहिजे. आपल्याला करोनाची लागण झाली नाही, तरीही आपण या रोगाचे वाहक असू शकतो आणि आपल्यामुळे इतर लोकांनासुद्धा या रोगाचा सामना करावा लागू शकतो. चित्रिकरणाच्या सेटवर कितीही खबरदारी घेतली तरीही या आजाराचा प्रसार रोखणं आपल्या हातात नाही. त्यामुळे सुरक्षिततेच्या दृष्टीने मी सध्या तरी घराबाहेर न पडणंच पसंत करीन', असं जॉय सेनगुप्ता सांगतात. 'आता आपल्याला या आजाराचा स्वीकार करून त्यासोबतच जगावं लागणार आहे. त्यामुळे रोगप्रतिकारशक्ती वाढवण्याच्या दृष्टीनं जास्तीत जास्त प्रयत्न करून आणि सुरक्षिततेची काटेकोरपणे काळजी घेऊन काही जणांना घराबाहेर पडावं लागू शकतं', असं दिब्येंदू भट्टाचार्य सांगतात. अभिषेक बच्चनला करोनाची लागण झाल्याचं स्पष्ट झाल्यानंतर त्याचा आगामी चित्रपट 'द बिग बुल'चं सहा दिवसांचं चित्रीकरणही पुढे ढकलण्यात आलंय. अभिषेक कधी घरी परततोय आणि तो शूटिंग करण्यासाठी कधी तयारी दर्शवतोय यावर अनेक गोष्टी अवलंबून आहेत. आम्ही चित्रपटाला होणारं नुकसान सहन करू शकतो. परंतु, नुकसान टाळण्यासाठी कलाकार, तंत्रज्ञ किंवा आमच्या टीममधील कोणत्याही व्यक्तीचा जीव आम्ही अजिबात धोक्यात घालणार नाही. सर्व सुरक्षिततेचे उपाय पाळूनही अभिषेक बच्चनला करोनाचं निदान होणं ही अतिशय धक्कादायक घटना होती. प्रत्येकाचा जीव महत्त्वाचा असल्यामुळे आम्ही विचारविनिमय करूनच चित्रीकरण पुढे ढकलण्याचा निर्णय घेतलाय. -आनंद पंडित (सहनिर्माता) - संकलन - केतकी मोडक
from Marathi Bollywood News, Marathi Cinema News https://ift.tt/30XPP4r
