'सध्या ओटीटी हे माध्यम सर्वाधिक चर्चेत आहे. जे इंडस्ट्रीतले कलाकार नाहीत त्यांच्यासाटी ओटीटी हे उत्तम व्यासपीठ आहे. कारण, तिथं स्टार नाही, तर अभिनेते कास्ट होतात', हे म्हणणं आहे अभिनेत्री हिचं. ० लॉकडाउनचा काळ कुणाला सुखाचा, तर कुणाला कंटाळवाणा वाटला. तू या वेळात काय केलंस? - लॉकडाउनचे सुरुवातीचे दिवस छानच गेले. शांतपणे घरी बसण्याची संधी मिळाली. त्यात भरपूर चित्रपट आणि मालिका पाहिल्या. नंतर मात्र कंटाळा आला. या काळात मी ध्यानधारणा आणि फिटनेस या दोन गोष्टी शिकले. ध्यानधारणेमुळे रागावर नियंत्रण मिळवण्याचं कसब अंगीकारलं. फिटनेस म्हणाल, तर दहा किलो वजन कमी केलं. आपण करिअर, यश, पैसा यासाठी धावत असतो. ते गरजेचं आहे; पण थोडं थांबलंही पाहिजे, हे कळलं. ० मनोरंजनसृष्टीच्या कामाचं स्वरूप बदललंय, न्यू नॉर्मल असो वा पुन्हा सेटवर जाणं तू हे सगळं कसं स्वीकारलं आहेस? - इंडस्ट्री इतक्यात जोमानं काम सुरू करू शकत नाही. ती सर्वसाधारण व्हायला वेळ हा लागणारच आहे. ही खरं तर वाईट वेळ आहे. अभिनय आणि या कलेशी संबंधित गोष्टी सोडल्या, तर मी दुसरं काही करू शकणार नाही. हा कलाकारांसाठी टफ टाइम आहे. मात्र, ही वेळही जाईल याची खात्री आहे. इतके दिवस थांबलो, आणखी काही काळ थांबू. ० गेल्या काही वर्षांत मोजकं काम करण्याचं कारण काय आणि आगामी काळात कोणते प्रोजेक्ट्स आहेस? - '' या चित्रपटात मी भूमिका केली आहे. थोडं काम बाकी आहे. पुन्हा काम सुरू करायला वेळ लागेल. मी ठरवून मोजकं काम केलंय किंवा करतेय असं नाही. तशा भूमिकाही कमी आल्या आणि त्यातही मला आवडतील त्याच मी केल्या. त्यामुळे मी थोडी कमी दिसले. ० सेलिब्रेटी जोड्यांना जो एरवी एकत्र वेळ मिळत नाही, तो लॉकडाउनमध्ये खूप मिळाला, असं ते म्हणतात. तुझा आणि गौरवचा काय अनुभव? - आम्ही दोघं एकत्र नव्हतोच. लॉकडाउन सुरू झालं आणि मी पुण्यात आले. तो संपेल असं वाटत असतानाच वाढत गेला. त्यामुळे मी पुण्यात आणि तो मुंबईत असं झालं. २४ तास एकत्र असणाऱ्यांची कशी भांडणं होत होती, ते मित्रमंडळींकडून कळायचं. त्यामुळे हा काळही आमच्यासाठी छानच गेला. ० सोशल मीडियावर तू सक्रिय असतेस. तुझे व्हिडीओही चर्चेत असायचे. त्याबद्दल काय सांगशील? - चिनी अॅप्सवर बंदीचा निर्णय योग्यच आहे. विरंगुळा म्हणून मी सोशल मीडियावर होते. आता ते बंद झालंय, तर काहीही फरक पडत नाही. ० दाक्षिणात्य चित्रपटसृष्टीत पुन्हा काम करतेयस का? - मी त्या इंडस्ट्रीतलं काम सोडून चार-पाच वर्षं झाली. एकाचवेळी मराठी-हिंदी आणि दाक्षिणात्य चित्रपटसृष्टीत काम करणं अवघड आहे. किमान इथलं काम मुंबईत होतं. तिकडे भाषेनुसार चेन्नई, हैदराबाद किंवा आंध्र प्रदेश असं जावं लागतं. तिथलं काम सोपं व्हावं म्हणून मी खरं तमीळ भाषा शिकले. आता तिकडे काम करायचं नाही, असं काही ठरवलेलं नाही. चांगली भूमिका मिळाली तर नक्कीच करीन. ० ओटीटीबद्दल तुझं मत काय? - सध्याचं ते स्ट्राँग माध्यम म्हणता येईल. वायफाय, आयपॅड, मोबाईल या सगळ्यामुळे हे माध्यम लोकांना त्यांच्या वेळेनुसार उपलब्ध आहे. शिवाय, थिएटर सुरू झाली, तरी लोक लगेच जातील का, हा प्रश्न आहेच. जे इंडस्ट्रीतले कलाकार नाहीत त्यांच्यासाटी ओटीटी हे उत्तम व्यासपीठ आहे. कारण, तिथं स्टार नाही, तर अभिनेते कास्ट होतात. ० लग्नानंतर बोल्डनेस किंवा त्या धर्तीवरील भूमिका स्वीकारण्याचे मापदंड बदलतात. तू असं काही ठरवलं आहेस का ? - मी असं काहीही ठरवलेलं नाही. माझ्या मते मी साकारलेली भानूही बोल्डच होती. ती करताना खूप मजा आली. ज्या भूमिकेसाठी विचारणा झालीय, त्या दृष्टिकोनातून काय गरजेचं आहे, ते करण्याला मी प्राधान्य देते. त्यांच्यासाठी सोपं मनोरंजनसृष्टीतील घराणेशाहीवर सध्या खूप चर्चा होतेय. त्याबद्दल श्रुती म्हणाली, की 'जी संधी किंवा करिअर बदलून टाकणारा एक चित्रपट मिळवायला आम्हाला दहा वर्षंही द्यावी लागतात, ती संधी स्टारकिड्ससाठी काही क्षणांत उपलब्ध होते. त्यांच्यासाठी ही संधी मिळणं सोपं असतं.'
from Marathi Bollywood News, Marathi Cinema News https://ift.tt/2Ouq6uG
