मुंबई टाइम्स टीम काटेकोरपणे सुरक्षा नियमांचं पालन करत चित्रीकरण सुरू असलं, तरी टीव्ही मालिकांच्या सेटवर करोनानं शिरकाव केल्याचं दिसून येतंय. अनेक मालिकांच्या सेटवर करोनाचा संसर्ग झाल्याची उदाहरणं समोर येत आहेत. त्यातच ज्येष्ठ अभिनेत्री यांच्या निधनामुळे तर टीव्ही विश्व हादरलं आहे. अनेक ज्येष्ठ कलाकार सध्या घरातूनच चित्रीकरण करत आहेत. परंतु, ज्यांना सेटवर येणं शक्य आहे त्यांच्यासाठी नसलेली विम्याची तरतूद, त्यांना द्यावं लागणारं हमीपत्र यामुळे ज्येष्ठांच्या सुरक्षेचा विषय ऐरणीवर आला आहे. चित्रिकरणाला परवानगी देताना केंद्र सरकारनं ज्येष्ठ कलाकारांना सेटवर येण्याची परवानगी दिली नव्हती. या निर्बंधांबाबत नाराजी व्यक्त झाल्यावर ते उठवण्यात येऊन ज्येष्ठांना सेटवर काम करण्याची परवानगी देण्यात आली. सध्या टीव्ही विश्वातून मिळालेल्या माहितीनुसार असं कळतंय की, जे ज्येष्ठ कलाकार किंवा तंत्रज्ञ चित्रीकरणासाठी सेटवर येत आहेत, त्यांचा कोव्हीड विमा उतरवलेला नाही. राज्य सरकारनं चित्रीकरणासाठी सशर्त परवानगी देताना, चित्रिकरण स्थळावर उपस्थित असणाऱ्या प्रत्येकाचा विमा उतरवला जावा; असा नियम केला होता. त्यानुसार इंडियन ब्रॉडकास्टर्स फाऊंडेशन (आयबीएफ), इंडियन फिल्म अँड टेलिव्हजन प्रोड्यूसर्स काऊन्सिल(आयएफटीसी) आणि कलाकारांची संघटना असलेल्या 'सिंटा'नं विमा प्रश्नावर चर्चा करुन कलाकारांचा कोव्हीड विमा उतरवण्यात पुढाकार घेतला. परंतु, ज्येष्ठ कलाकारांना वयोमानानुसार हा विमा मिळण्यात अडचण होत असल्याचं निदर्शनास आलं आहे. त्यामुळे काही निर्माते त्यांच्या मालिकेत काम करणाऱ्या ज्येष्ठ कलाकारांकडून काम करण्याबाबतचं लेखी हमीपत्र घेत आहेत. , अच्युत पोतदार, रवी पटवर्धन यांच्यासारखे ज्येष्ठ कलाकार सध्या त्यांच्या घरातूनच मालिकांचं चित्रीकरणात सहभागी होत आहेत. ज्येष्ठ कलाकारांनादेखील काम करण्याचा अधिकार आहे. चित्रीकरणाच्या सेटवर सर्वतोपरी नियमांचं पालन होत आहे. पण, दुर्दैवानं काही घटना घडतायत. ज्येष्ठ कलाकारांना विमा कंपनीकडून विमा मिळण्यात अडचण होतेय. विमा कंपन्यांचे काही नियम आहेत. सरकारनं यात हस्तक्षेप करुन त्यातून सुवर्णमध्य काढावा अशी आमची अपेक्षा आहे. आम्ही प्रोड्यूसर्स काऊन्सिलदेखील विमा कंपन्यांच्या संपर्कात असून, या पेचातून मार्ग काढण्याचा प्रयत्न करतोय. - जेडी मजीठिया, इंडियन फिल्म्स अँड टेलिव्हीजन प्रोड्यूसर्स काऊन्सिल - चेअरमन : टीव्ही विंग माझ्या माहितीनुसार विमा कंपनी सत्तर वर्षांहून अधिक वयाच्या व्यक्तींचा विमा उतरवत नाही. कदाचित त्याच कारणांमुळे ज्येष्ठ कलाकारांचा कोव्हीड विमा उतरवण्यात अडचण येत असावी. परंतु, ज्येष्ठांसाठी मेडीक्लेम उतरवला जाऊ शकतो. परंतु, त्याचा वैयक्तिक प्रीमियम हा मोठ्या रक्कमेचा असतो. जसा एकत्र कुटुंबाचा विमा काढला जातो, तसा चित्रीकरणात सहभागी असणाऱ्या सर्व कलाकारांचा विमा काढला जावा. ज्यात ज्येष्ठ कलाकारांनादेखील विमा संरक्षण मिळेल. - रोहिणी हट्टंगडी, ज्येष्ठ अभिनेत्री काय काळजी घेताहेत? सगळ्या मालिकांच्या सेटवर सरकारी नियमांचं पालन करत चित्रीकरण केलं जातंय. कलाकार आणि तंत्रज्ञांचं तापमान आणि ऑक्सिजनची पातळी तपासणं, वेळोवेळी सॅनिटायजरचा वापर करणं, मालिकेतल्या कपड्यांचं निर्जंतुकीकरण करणं, गर्दी करून गप्पा न मारणं, एकत्र जेवायला न बसणं, सुरक्षित वावराच्या नियमांचं पालन करणं, चित्रीकरणाची वेळ वगळता कायम मास्क वापरणं, वारंवार हात धुणं अशी सर्व प्रकारे काळजी घेतली जातेय. सरकारी नियमानुसार ३३ टक्के लोकांच्या उपस्थितीत चित्रीकरण करायचं असल्यामुळे प्रत्येक विभागातील कमीतकमी लोकं सध्या चित्रीकरणास रुजू झाले आहेत. कलाकारांच्या शिफ्ट्स शूटिंगच्या गरजेनुसार लावल्या जातात. जेणेकरून सेटवर गर्दी होणार नाही. विशिष्ट अंतर ठेवून प्रत्येकजण सेटवर वावरत असतो. काही मालिकांच्या सेटवर मेकअप रुम, तर काही सेटवर व्हॅनिटी व्हॅन्सची संख्या वाढवली आहे. चित्रीकरण नसल्यास स्टुडिओमध्ये न थांबता आपापल्या खोल्या किंवा व्हॅनिटी व्हॅनमध्ये जाऊन बसणं हा नियम कटाक्षानं पाळला जातोय. सेटवर प्रत्येकाकडे स्वत:च्या पाण्याच्या बाटल्या असतात. गरम पाणी मात्र सेटवर दिलं जातं. काही मालिकांमधले कलाकार स्वत:च त्यांचा मेकअप करत आहेत. काही मालिकांच्या सेटवर गरम पाणी आणि गरम पाण्याची वाफ घेणं सर्वांसाठीच सक्तीची आहे. सर्दी, खोकला यासारखी काहीही लक्षणं दिसली, तर सक्तीची सुट्टी दिली जाते.
from Marathi Bollywood News, Marathi Cinema News https://ift.tt/2G8IFUv
