खरेदी ऑनलाइन सध्या नाशिक जवळच माझ्या मालिकेचं चित्रीकरण सुरू आहे. त्यामुळे प्रवासाची फार दगदग नाहीय. सुट्टी घेऊन दिवाळीमध्ये नाशिकला माझ्या घरी जाता येणार आहे. यावेळी दिवाळीची सगळी खरेदी आम्ही ऑनलाइन केली आहे. अगदी सगळ्या नातेवाईकांना, भाऊबीजेला बहिणींना मी ऑनलाइन माध्यमातून भेटवस्तू पोहोचवणार आहे. वेगवेगळ्या अॅप्लिकेशन्स आणि वेबसाइट्सचा प्रभावी वापर करून ठरलेल्या दिवशी त्यांच्यापर्यंत या खास भेटवस्तू पोहोचतील अशी सोय केली आहे. आपल्या घरात राहून हा उत्सव मी कुटुंबियांसह साजरा करणार आहे. यंदाच्या दिवाळीवर सध्याच्या संकटकाळाचं सावट आहेच. त्यामुळे सर्व गोष्टींचं आवश्यक ते भान राखून आपण दिवाळीचा सण साजरा करायला हवा, असं आवाहन मी वाचकांना करू इच्छितो. करोना या संकटाचा प्रत्यक्ष फटका बसलेल्या आणि कोलमडून गेलेल्या एखाद्या कुटुंबाला आपण यानिमित्तानं मदत करायला हवी. आपला आनंद त्यांच्याशी शेअर करायला हवा. -अभिजित खांडकेकर अमेरिकेला प्रयाण यंदा दिवाळीच्या निमित्तानं मी अमेरिकेला जाणार आहे. माझा नवरा नीरज मोरे अमेरिकेत असतो. आमची भेट हेच आमच्यासाठी मोठं सेलिब्रेशन असणार आहे. दोन वर्षांनी आम्ही एकत्र दिवाळी साजरी करणार आहोत. एकमेकांसोबत वेळ घालवणार आहोत. दोघांच्याही आवडीचा फराळ मी भारतातून घेऊन जाणार आहे. म्हणजे तिथे फराळावर मनसोक्त ताव मारता येईल. करोनाच्या या सगळ्या कठीण काळानंतर अनेक महिन्यांनी आम्ही प्रत्यक्ष भेटणार आहोत. दिवाळीच्या सणाचा आनंद मी सोबत घेऊन जात आहे. -मृणाल दुसानिस नव्या मालिकेचा शुभारंभ पुढच्या आठवड्यात 'चंद्र आहे साक्षीला' ही माझी मालिका सुरू होत आहे. दिग्पाल लांजेकर या माझ्या मित्राबरोबर मी या मालिकेची निर्मितीही केली आहे. दिवाळीच्या शुभमुहूर्तावर रसिक प्रेक्षकांसाठी भेट म्हणून ही मालिका आम्ही घेऊन येत आहोत. त्यामुळे सध्या कामाची खूप धावपळ सुरू आहे. यंदाची दिवाळी नेहमीपेक्षा खूप वेगळी असणार आहे. कुठेही बाहेरगावी जाण्याचा बेत आखलेला नाहीय. कुटुंबीय व मित्रमंडळी यांच्यासह घरच्याघरी आनंदानं दिवाळी साजरी करणार आहोत. -चिन्मय मांडलेकर तळेगावच्या घरीसंकटकाळात घरात बसून आपण सगळेच जण खूप कंटाळलो आहोत. वातावरणात थोडा बदल हवा आहे. म्हणून दिवाळीत आम्ही कुटुंबीय तळेगावच्या आमच्या घरी जाणार आहोत. यानिमित्तानं तळेगावला जाणं होईल. थोड्या-फार भेटीगाठी होतील आणि एकूणच उत्साह वाढेल. आमच्याबरोबर माझी आजीसुद्धा असणार आहे. त्यामुळे सुरक्षिततेच्या दृष्टीनं सगळी काळजी घेणार आहोत. एखाद्या अनोळखी ठिकाणी जाण्यापेक्षा, हॉटेलमध्ये उतरण्यापेक्षा आपल्याच घरी जाणं खूप सुरक्षित आणि सोयीचं आहे. माझ्या आईची भाऊबीज तिथे होणार आहे. दिवाळीच्या निमित्तानं आम्ही सगळे छान एकत्र वेळ घालवणार आहोत. -अभिज्ञा भावे छोटी ट्रिप सध्या खूप काम सुरू आहे. शूटिंगचं व्यग्र वेळापत्रक आहे. दिवाळीच्या मुहूर्तावर एका नव्या प्रोजेक्टलाही मी सुरुवात करणार आहे. त्यामुळे दिवाळीनंतर धावपळ अजून वाढणार आहे. थोडं ताजंतवानं होण्यासाठी दिवाळीत एक खास बेत आम्ही आखला आहे. आम्ही काही दोस्त मंडळी आणि आमचे कुटुंबीय असे मिळून महाबळेश्वरला एका ट्रिपला जाणार आहोत. यानिमित्तानं छान एकत्र वेळ घालवता येणार आहे. जागेचा, वातावरणाचा बदल आणि आपल्या जिव्हाळ्याच्या माणसांसह मनसोक्त गप्पा असा या वर्षीच्या दिवाळीतला बेत आहे. -नम्रता संभेराव चित्रपटाचं काम या वर्षी दिवाळीच्या शुभमुहूर्तावर 'चंद्रमुखी' या माझ्या चित्रपटाचं चित्रीकरण आम्ही सुरू करत आहोत. खरं तर दिवाळी आणि चित्रपट हे माझ्यासाठी एक समीकरण आहे. गेल्या वर्षी मी दिग्दर्शित केलेला 'हिरकणी' हा सिनेमा दिवाळीत प्रदर्शित झाला होता. त्याआधी २०१८ साली 'आणि डॉ. काशिनाथ घाणेकर' हा चित्रपटही दिवाळीतच प्रेक्षकांच्या भेटीला आला होता. यंदा दिवाळीत काम सुरू होत आहे, याचा आनंद आहे. माझी पत्नी मंजिरीसुद्धा असिस्टंट म्हणून माझ्याबरोबर सेटवर असणार आहे. त्यामुळे आमची दिवाळी सेटवर साजरी होईल. दिवाळीच्या दिवशी शूटिंगला सुट्टी दिली, तरीही डोक्यात चित्रपटाचाच विचार सुरू असणार आहे. -प्रसाद ओक शब्दांकन - गौरी आंबेडकर, रुईया कॉलेज
from Marathi Bollywood News, Marathi Cinema News https://ift.tt/369vSue
