मुंबई: अमली पदार्थ प्रकरणात अटकेत असलेली कॉमेडियन आणि तिचा पती यांना रविवारी सुटीकालीन न्यायालयाने ४ डिसेंबरपर्यंत न्यायालयीन कोठडी सुनावली. त्यानंतर या दोघांतर्फे लगेचच जामिनासाठी अर्ज करण्यात आला असून, त्यावर आज, सोमवारी सुनावणी होणार होती. पण काही कारणांमुळं त्यांच्या याचिकेवरची सुनावणी टळली असून उद्या सुनावणी होण्याची शक्यता आहे. त्यामुळं भारती आणि हर्ष यांची आजची रात्रही तुरुंगातच जाणार आहे. अभिनेता सुशांतसिंह राजपूत मृत्यू प्रकरणाच्या निमित्तानं बॉलीवूड आणि ड्रग्जचे कनेक्शन पुन्हा एकदा समोर आल्यानंतर नार्कोटिक्स कंट्रोल ब्युरोने (एनसीबी) त्याचा कसून तपास सुरू केला आहे. त्याअंतर्गत आजपर्यंत हिंदी सिने-टीव्हीसृष्टीतील अनेकांची चौकशी झाली आहे. एका ड्रगविक्रेत्याच्या चौकशीतून माहिती मिळाल्यानंतर एनसीबीच्या अधिकाऱ्यांनी भारतीच्या अंधेरी, वर्सोवा येथील घरावर व कार्यालयावर शनिवारी छापा टाकला. त्यावेळी अधिकाऱ्यांनी घरातून ८६.५ ग्रॅम गांजा हस्तगत केला. त्यानंतर भारतीला अटक करण्यात आली, तर हर्षला चौकशीसाठी ताब्यात घेण्यात आले. हर्षला १२ तासांच्या चौकशीनंतर रविवारी पहाटे अटक करण्यात आली. त्यानंतर दोघांनाही दुपारी सुटीकालीन न्यायदंडाधिकारी न्यायालयासमोर हजर करण्यात आले. 'न्यायालयाने एनसीबीचे म्हणणे ऐकून घेतल्यानंतर दोघांनाही ४ डिसेंबरपर्यंत न्यायालयीन कोठडी सुनावली', अशी माहिती एनसीबीचे वकील अतुल सरपांडे यांनी दिली. न्यायालयाच्या या आदेशानंतर या दाम्पत्याने लगेचच जामीन मिळण्यासाठी अर्ज केला. त्यावर आज, सोमवारी सुनावणी होण्याची शक्यता होती , परंतु आता उद्या सुनावणी होणार आहे. एनडीपीएस कायद्यातील तरतुदीप्रमाणे एक हजार ग्रॅमपर्यंतचे अमली पदार्थाचे प्रमाण हे कमी समजले जाते आणि त्यासाठी सहा महिन्यांचा कारावास आणि/किंवा दहा हजार रुपयांच्या दंडाची तरतूद आहे. यापूर्वी कमी प्रमाणात अमली पदार्थ बाळगलेल्या आरोपींना जामीन मिळाला असल्याने या दाम्पत्यालाही जामीन मिळण्याची शक्यता व्यक्त होत आहे.
from Marathi Bollywood News, Marathi Cinema News https://ift.tt/35RFYB0
