मुंबई- डोळ्यांत स्वप्नं घेऊन एक तरुण 'इंडियन आयडॉल'च्या बाराव्या सीझनच्या मंचावर उभा होता. त्यानं स्वतःची ओळख करून दिली. परीक्षक नेहा कक्करनं सांगितलं, मी याला आधी कुठेतरी पाहिलं आहे. तो होता . 'आयडॉल'च्या यापूर्वीच्या दोन पर्वात सेटवर साफसफाईचं काम करणारा युवराज आता त्याच मंचावर एक स्पर्धक म्हणून उतरतोय. सलमान अली आणि सनी हिंदुस्थानी हे दोघेही 'इंडियन आयडॉल'च्या अनुक्रमे दहाव्या आणि अकराव्या पर्वाचे विजेते. या दोन्ही इंडियन आयडॉल्सच्या नावांची घोषणा झाल्यानंतर त्यांच्या अंगावर पताकांचा वर्षाव झाला होता. या दोन्ही वेळी सोहळा संपल्यानंतर त्या पताका उचलण्याची, सेट साफ करण्याचं काम युवराज मेढेनं केलं होतं. याच मंचावर आपणही आपलं गायन कौशल्य दाखवायचं, असा विचार करून युवराज आज त्याच मंचावर जिद्दीनं स्पर्धक म्हणून आपली गुणवत्ता दाखवण्यासाठी सज्ज झालाय. युवराज मूळचा जळगावचा. लहानपणापासून त्याला गाणी ऐकण्याची आवड होती. ऐकलेली गाणी तो सतत गुणगुणत राहायचा. मित्रांनी आग्रह केला की तो त्यांच्यासाठी गाणी गायचा. युवराजचा आवाज, त्याचं गाणं मित्रांना खूप आवडायचं. युवराजही हौसेनं मित्रांच्या फर्माईशी पूर्ण करायचा. पोटापाण्यासाठी तो जळगावात छोटी-मोठी कामं करायचा. तेव्हा त्याचे काही मित्र मुंबईमधल्या फिल्मसिटीत काम करत होते. त्यापैकीच एक मित्र सुट्टीसाठी गावी गेला असताना त्याची युवराजशी भेट झाली. 'अरे, तू इतका छान गातोस. तू मुंबईला चल. ती मायानगरी नक्कीच तुझ्या गुणवत्तेला न्याय देईल. तिथे काम करताकरता संगीत क्षेत्रातील लोकांशी तुझी ओळखही होऊ शकेल. तू चल' असा आग्रह मित्रानं केला आणि युवराज फिल्मसिटीत दाखल झाला. गेली तीन वर्ष तो सेट विभागात काम करतोय. सेटवरचं सामान व्यवस्थित लावणं, साफसफाई हे त्याचं काम होतं. काम करताकरता तो बारकाईनं निरीक्षणही करत होता. त्याच्या कामातील नीटनेटकेपणा पाहून इंडियन आयडॉलच्या बॅकस्टेज संचामध्ये त्याची नेमणूक झाली. आता काम करताकरता त्याला स्पर्धकांची गाणीही ऐकायला मिळत होती. परीक्षकांच्या प्रतिक्रियांकडे त्याचं विशेष लक्ष असायचं. नेहा कक्कर, विशाल दादलानी, हिमेश रेशमिया हे तिन्ही परीक्षक स्पर्धकांना ज्या टिप्स द्यायचे, त्या तो लक्षात ठेवायचा. घरी जाऊन त्या टिपून ठेवायचा आणि त्यावर अभ्यास करायचा. स्वतः गाताना त्याला त्याचा उपयोग व्हायचा. ऑडिशन देताना युवराजच्या मनात थोडी भीती होती. पण, स्वतःच्या कलेवर, मेहनतीवर विश्वास ठेवून त्यानं हे धाडस केलं आणि त्याची निवड झाली. अजय-अतुल यांनी संगीत दिलेलं 'खेळ मांडला' हे गाणं त्यानं पहिल्या भागात गायलं आहे. परीक्षकांनी युवराजच्या गाण्याचं भरभरून कौतुक तर केलंच. पण, त्याचा संघर्ष पाहून परीक्षकांचेही डोळे पाणावले. 'इंडियन आयडॉल' या मानाच्या स्पर्धेत गायला मिळणं ही युवराजसाठी एक स्वप्नपूर्ती आहे. गौरी आंबेडकर, एसएनडीटी विद्यापीठ
from Marathi Bollywood News, Marathi Cinema News https://ift.tt/365zrTi
