घरच्यांसाठी 'सरप्राइज'...मराठी सिनेसृष्टीतील सेलिब्रिटींचे हटके शॉपिंग प्लॅन्स

नाताळ आणि नववर्षाच्यानिमित्तानं खरेदीच्या नियोजनाला वेग आला आहे. यात कलाकार मंडळीसुद्धा मागे नाहीत. तुमचे लाडके कलाकार कोणकोणत्या वस्तूंची खरेदी करणार आहेत, हे त्यांच्याकडूनच जाणून घ्या.गेले काही महिने करोना संसर्गाच्या प्रादुर्भावामुळे अनेकांना खरेदीच्या आवडीला मुरड घालावी लागली. पण, आता सगळं काही पूर्वपदावर येत आहे. त्यामुळे तुमच्यापैकी अनेक जणांनी शॉपिंगचं नियोजन केलं असेल. काही कलाकारांनी खरेदीचे प्लॅन्स 'मटा'च्या वाचकांसोबत शेअर केले आहेत.

नाताळ सण काही दिवसांवर आल्यानं शहरातील ख्रिस्ती बांधव ख्रिसमसच्या जय्यत तयारीला लागले आहेत. ख्रिसमससाठी लागणाऱ्या सजावटीच्या साहित्यानं बाजारपेठा सजल्या आहेत. यंदा सजावटीत विविध प्रकारच्या माळा, ताऱ्यांच्या आकाराचे आकाशदिवे, विविध आकाराची सांताक्लॉजची कॅप, ख्रिसमस ट्री सजविण्यासाठी लागणारे ड्रम, बेल, छडी, गिफ्टच्या आकाराचे चौकोनी डबे, सांताक्लॉजचे मुखवटे, ड्रेस, थर्माकॉलपासून तयार केलेला सांताक्लॉज, विविध आकाराच्या रंगीबेरंगी विद्युत माळा यांची बाजारात विक्री सुरू आहे. हे सर्व साहित्य ६० रुपयांपासून अठराशे रुपयांपर्यंत उपलब्ध आहे. नाताळाच्या शुभेच्छा देणारे विविध आकार-प्रकारांचे केक शहरातील बेकऱ्यांमध्ये उपलब्ध आहेत. घरी सुरू असलेल्या फराळाच्या तयारीसह नाताळ सणासाठी खास कपड्यांची ऑनलाइन खरेदी देखील केली जात आहे.

नाताळ आणि नववर्षाच्यानिमित्तानं खरेदीच्या नियोजनाला वेग आला आहे. यात कलाकार मंडळीसुद्धा मागे नाहीत. तुमचे लाडके कलाकार कोणकोणत्या वस्तूंची खरेदी करणार आहेत, हे त्यांच्याकडूनच जाणून घ्या.गेले काही महिने करोना संसर्गाच्या प्रादुर्भावामुळे अनेकांना खरेदीच्या आवडीला मुरड घालावी लागली. पण, आता सगळं काही पूर्वपदावर येत आहे. त्यामुळे तुमच्यापैकी अनेक जणांनी शॉपिंगचं नियोजन केलं असेल. काही कलाकारांनी खरेदीचे प्लॅन्स 'मटा'च्या वाचकांसोबत शेअर केले आहेत.

​भेटवस्तूंची खरेदी

मला घरात घालण्याचे कपडे खरेदी करायचे आहेत. कारण, लॉकडाउनच्या दिवसात सर्वाधिक वेळ घरीच असल्यानं, घरात घालायचे कपडे वापरुन-वापरुन जुने दिसू लागले आहेत. त्यामुळे ते खरेदी करायचे आहेत. सोबतच आगामी प्रोजेक्ट्सच्या चित्रीकरणाचं काम सुरु झालं आहे. त्यानिमित्तानं बराच प्रवास होणार आहे. म्हणून प्रवासात लागणाऱ्या बऱ्याच वस्तूंची खरेदी करायची आहे. त्यापेक्षा महत्त्वाचं म्हणजे अनेक भेटवस्तूंची खरेदी करायची आहे. कारण, माझ्या भाचीचा, भावाचा आणि आई-बाबांच्या लग्नाचा वाढदिवस जानेवारी महिन्यात असतो. त्यांच्यासाठी भेटवस्तू घ्यायच्या आहेत.

​घरच्यांसाठी 'सरप्राइज'

यंदा करोना आणि त्यामुळे जाहीर झालेल्या लॉकडाउनमुळे मनसोक्त खरेदी करायला संधी मिळाली नाही. पण, आता सर्व सुरळीत होत आहे. नवीन वर्ष देखील जवळ आलं आहे. त्यामुळे सर्वत्र नवचैतन्याचं वातावरण आहे. मी वर्षभर न केलेल्या शॉपिंगची कसर आता येत्या महिन्यांत भरुन काढणार आहे. घरासाठी काही वस्तू खरेदी करायच्या आहेत. मुळात घर नव्यानं सजवायचं आहे. त्यामुळे घरातले पडदे, लॅम्प यासारख्या बारीकसारीक वस्तूंची मोठी यादी आहे. मला लाकडी कोरीवकाम देखील खूप आवडतं. त्यामुळे कोरीव काम असलेलं फर्निचर घ्यायचं आहे. तसंच काही मातीची भांडीसुद्धा खरेदी करायची आहेत. या सगळ्यासह घरच्यांसाठी सरप्राइज शॉपिंग करायची आहे. सरप्राइज असल्यानं ते नेमकं काय असेल? याबद्दल आतापासून सांगू शकणार नाही.

- पूजा सावंत, अभिनेत्री

​घेणार चित्रपट-नाटकाची तिकीटं

माझा ऑनलाइन शॉपिंगकडे कल वाढला आहे. पण, आता पूर्वीसारखी दुकानं सुरु झाली असल्यानं मी येत्या काही दिवसांत दुकानात जाऊन खरेदी करणार आहे. घरासाठी काही वस्तू खरेदी करायच्या आहेत. त्याचीच नववर्षाच्या निमित्तानं खरेदी होईल. पण, त्यातही स्वदेशी आणि लोकल वस्तू घेण्याकडे माझा कल असेल. आणखीन एक महत्त्वाची गोष्ट मला नववर्षाच्या निमित्तानं खरेदी करायची आहे, ती म्हणजे सिनेमा आणि नाटकाची तिकीटं. थिएटरमध्ये जाऊन चित्रपट आणि नाटक बघायचं आहे. हे गेल्या काही महिन्यांमध्ये मिस केलं. आता संधी सोडणार नाही.

- आदिनाथ कोठारे, अभिनेता

​नवा मोबाइल

मी दर दोन वर्षांनी मोबाइल बदलते. पण, यंदा करोनामुळे उद्भवलेल्या परिस्थितीत जीवनावश्यक वस्तू मिळणं कठीण होतं. त्यात नवा मोबाइल घेणं दूरची गोष्ट होती. त्यामुळे काही महिने थांबायचा निर्णय घेतला. पण, आता सगळं काही पूर्वपदावर आलं आहे. त्यामुळे लवकरच नवीन मोबाइल घेणार आहे. तसंच माझं जानेवारीमध्ये लग्न आहे. त्यादृष्टीनं खरेदी सुरु आहे. शूटिंगच्या व्यग्र वेळापत्रकातून वेळ काढून खरेदीचं नियोजन करत आहे. काही वस्तूंची खरेदी झाली आहे तर बरीचशी खरेदी बाकी आहे. ती येत्या काही दिवसांत पूर्ण करण्याचा मानस आहे.

- अभिज्ञा भावे, अभिनेत्री

​हौस म्हणून नव्हे...गरजेपुरतं!

मला शॉपिंग करायला खूप आवडतं. मी लॉकडाउनपूर्वी प्रचंड खरेदी करायचो. पण, लॉकडाउनच्या दिवसांनी माझी मानसिकता बदलली आहे. आता हौस म्हणून नाही तर गरज म्हणून आणि गरजेपुरतंच खरेदी करू लागलो आहे. लॉकडाउनच्या काळात मॉल बंद असल्यानं मी काही गोष्टी ऑनलाइन खरेदी केल्या होत्या. पण, आता सर्व अनलॉक झाल्यानं बाहेर पडून, दुकानात-मॉलमध्ये जाऊन खरेदी करण्याची वेळ आली आहे. नववर्षाच्या निमित्तानं ऑनलाइन वस्तू बघून त्यातील निवडकच गोष्टी खरेदी करायला जाणार आहे. याला मी फोकस शॉपिंग असं म्हणेन.

- निलेश मोहरीर, संगीतकार

from Marathi Bollywood News, Marathi Cinema News https://ift.tt/3hdwUur